នាយករដ្ឋមន្ត្រីបណ្តេញប៉ូលីស៤នាក់ដែលបាញ់បោះសេរីចេញពីក្របខ័ណ្ឌ
នៅក្នុងពិធីសម្ពោធដាក់ឲ្យប្រើប្រាស់ស្ពានកោះនរា នារសៀលថ្ងៃពុធនេះ លោកនាយករដ្ឋមន្ត្រី ហ៊ុន ម៉ាណែត បានប្រកាសបណ្តេញមន្ត្រីប៉ូលីស ៤នាក់ចេញពីក្របខ័ណ្ឌនគរបាលជាតិ បន្ទាប់ពីពួកគេបាននាំគ្នាប្រព្រឹត្តកំហុសធ្ងន់ធ្ងរដោយបាញ់បោះសេរីនៅភ្នំគីរីរម្យខេត្តកំពង់ស្ពឺ។ សូមរំលឹកថា កាលពីថ្ងៃទី១១ ខែវិច្ឆិកា កន្លងទៅ ប្រជាពលរដ្ឋមានការភ្ញាក់ផ្អើលនឹងការផ្ទុះអាវុធដោយខុសច្បាប់ចំនួនជាង ២០០គ្រាប់ នៅចំការតែនៃភ្នំគីរីរម្យ ខណៈពេលដែលមានមនុស្សមួយក្រុមនាំគ្នាធ្វើពិធីជប់លៀងខួបកំណើត។បញ្ហានេះ ត្រូវបានមហាជន និងប្រព័ន្ធផ្សព្វផ្សាយនានាដាក់ការសង្ស័យទៅលើកូនប្រុស លោក គៀង សាវុធ អគ្គបញ្ជាការរងកងទ័ពជាតិ ក៏ប៉ុន្តែលោក គៀង សាវុធ បានបដិសេធ និងព្រមានប្តឹងកាសែត ដែលចុះផ្សាយគ្មានការពិត។ ហេតុការណ៍នេះ មានមន្ត្រីប៉ូលីស ៤នាក់ទទួលទោស ហើយម្ចាស់កម្មសិទ្ធិទីតាំងបាញ់បោះ បានរត់គេចខ្លួន។ ទោះយ៉ាងណា តាមរយៈការបញ្ចេញមតិលើបណ្តាញសង្គម មហាជនហាក់មិនសូវជឿ និងយល់ថាអ្នកទទួលខុសត្រូវលើការបាញ់បោះនេះ អ្នកមានបុណ្យសក្តិតូចតាចទំនងមិនហ៊ានប្រព្រឹត្តទេ ដោយហេតុថាការប្រើអាវុធ និងបាញ់បោះខុសបទបញ្ជា និងបេសកកម្មជារឿងខុសច្បាប់៕
ចុះផ្សាយនៅថ្ងៃ៖
ស្តាប់ - ០១:០៤