លោក ហ៊ុន ម៉ាណែត៖ ២០២៤ ជាឆ្នាំរស់ឡើងវិញនៃទេសចរណ៍ខេត្តសៀមរាប
ដើម្បីស្តារទេសចរណ៍ខេត្តសៀមរាប រដ្ឋាភិបាលកម្ពុជាបានរៀបចំគម្រោងសំខាន់ៗមួយចំនួន ដែលគម្រោងទាំងនោះមាន E-Arrival ការទាក់ទាញទេសចរចិន ការបើកឲ្យភ្ញៀវទេសចរអន្តរជាតិចូលមកពីប្រទេសថៃតាមផ្លូវគោកអាចចូលដល់ខេត្តសៀមរាប និងអង្គរវត្ត ដោយគ្មានលិខិតឆ្លងដែន និងផែនការសំខាន់ៗមួយចំនួនទៀត។ ការដាក់ចេញផែនការស្រូបទាញទេសចរសំខាន់ៗ ដោយលោកនាយករដ្ឋមន្ត្រី ហ៊ុន ម៉ាណែត ដូច្នេះ បានធ្វើឡើងអំឡុងពេលដែលលោកជាអធិបតីនៃពិធីសម្ពោធព្រលានយន្តហោះអន្តរជាតិថ្មីនៃខេត្តសៀមរាបនាព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖
ស្តាប់ - ០២:១៩
ដើម្បីជាការទាក់ទាញ និងជួយសង្គ្រោះវិស័យទេសចរណ៍នៅខេត្តសៀមរាប លោកនាយករដ្ឋមន្ត្រី ហ៊ុន ម៉ាណែត បានថ្លែងថាអគ្គនាយកដ្ឋានអន្តោប្រវេសន៍បានរៀបចំប្រព័ន្ធ E-Arrival ដើម្បីសម្រួលដល់ភ្ញៀវទេសចរ ដែលចូលមកកម្ពុជាមិនឲ្យមានភាពស្មុគ្រស្មាញក្នុងការបំពេញបែបបទ ខណៈដែលការបំពេញបែបបទ ត្រូវបានបង្រួមមកតែមួយ ដែលជាគម្រោងគំរូ ហើយនឹងត្រូវអនុវត្តមុនគេនៅឆ្នាំ២០២៤។
គម្រោងពង្រីកផ្លូវ Highway ពីព្រលានយន្តហោះទៅកាន់ខេត្តសៀមរាប និងការសិក្សាផ្លូវរថភ្លើងតភ្ជាប់ពីព្រលានទៅខេត្ត ក្នុងគោលដៅស្រូបទាញយកទេសចរបរទេស ជាពិសេសទេសចរចិនឲ្យច្រើនបំផុត គឺជាគម្រោងតភា្ជប់ដែលមានសារៈសំខាន់ ដែលអាចជួយកាត់បន្ថយពេលវេលាក្នុងការធ្វើដំណើរ។
មួយវិញទៀត តាមលោកនាយករដ្ឋមន្ត្រី ភ្ញៀវទេសចរថៃ នឹងត្រូវជួយសម្រួលឲ្យពួកគេមានវិសាលភាពធ្វើដំណើរចូលទៅដល់ខេត្តសៀមរាបដោយមិនចាំបាច់ប្រើលិខិតឆ្លងដែន ខណៈខេត្តជាប់ព្រំដែនប្រទេសទាំងពី កម្ពុជា-ថៃ មានកិច្ចព្រមព្រៀងប្រើបណ្ឌឆ្លងកាត់ព្រំដែនរវាងគ្នារួចហើយ។ លើសពីនេះ លោកលើកទឹកចិត្តឲ្យបង្កើតព្រឹត្តិការណ៍កីឡានានា និងបង្កើតក្រុមប្រឹក្សាទេសចរណ៍មួយជាបន្ទាន់ ដើម្បីរៀបចំផែនការសកម្មភាពដឹកនាំ និងអនុវត្ត។
សូមបញ្ជាក់ថាចាប់តាំងពីដាក់ឲ្យដំណើរការព្រលានយន្តហោះថ្មីក្នុងខេត្តសៀមរាប កំណើននៃការទិញសំបុត្រចូលទស្សនាអង្គររបស់ជនបរទេសមានការកើនឡើងរហូតដល់ជាង ៣ពាន់នាក់ក្នុងមួយថ្ងៃ ខណៈកាលពី៣ ទៅ៤សប្តាហ៍មុន សំបុត្រចូលទស្សនាអង្គរមានត្រឹមជាង១ពាន់ ប៉ុណ្ណោះក្នុងមួយថ្ងៃ។ ជាមួយគ្នានេះ លោកនាយករដ្ឋមន្ត្រី ក៏បានជំរុញឲ្យមន្ត្រីនិងអ្នកពាក់ព័ន្ធប្រឹងប្រែងទាក់ទាញទេសចរចិន ដោយលោករំលឹកថាកាលពីខែតុលាកន្លងទៅ លោក និងមេដឹកនាំកំពូលចិនបានប្រកាសរួមគ្នាថាឆ្នាំ២០២៤ គឺជាឆ្នាំទំនាក់ទំនងសំខាន់រវាងប្រជាជន និងប្រជាជននៃចិន-កម្ពុជា។
សូមរំលឹកដែរថាកន្លងមកក្រសួងទេសចរណ៍កម្ពុជាបានដាក់គោលដៅស្រូបទាញទេសចរចិនឲ្យបានក្នុងរង្វង់១លាននាក់នៅឆ្នាំ ២០២៣នេះ ខណៈដែលមានការព្យាករណ៍ថាអាចមានភ្ញៀវទេសចរអន្តរជាតិចន្លោះពី៣ ទៅ៤លាននាក់នៅឆ្នាំ ២០២៣ ដោយក្នុងនោះក៏មានបញ្ចូលគម្រោង «China Ready» ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ