គណៈកម្មាធិការអចិន្ត្រៃយ៍រដ្ឋសភារុះរើក្បាលម៉ាស៊ីនគ.ជ.ប
អគ្គលេខាធិការដ្ឋានរដ្ឋសភា បានទទួលពាក្យស្នើសុំឈរឈ្មោះជាសមាជិក គណៈកម្មាធិការជាតិរៀបចំការបោះឆ្នោតចាប់ពីថ្ងៃទី១៤វិច្ឆិកា រហូតដល់ថ្ងៃទី២៣ ខែវិច្ឆិកា ឆ្នាំ២០២៣។ គិតត្រឹមថ្ងៃទី១៧វិច្ឆិកា គឺមាន លោក ប្រាជ្ញ ចន្ទ ប្រធាន គជប លោក ឌឹម សុវណ្ណរុំ សមាជិក និងមន្ត្រីគជប មួយចំនួនទៀត បានយកពាក្យស្នើសុំទៅដាក់នៅនាយកដ្ឋានបុគ្គលិកនៃអគ្គលេខាធិការដ្ឋានរដ្ឋសភារួចហើយ។
ចុះផ្សាយនៅថ្ងៃ៖
ស្តាប់ - ០២:០៥
ការរុះរើក្បាលម៉ាស៊ីន គជប នៅពេលនេះគឺធ្វើឡើងដោយអនុលោមតាមមាត្រា៥ និងមាត្រា៦ នៃច្បាប់ស្តីពី ការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតបន្ទាប់ពីគណបក្សហ្វ៊ុនស៊ិន មានកៅអីតំណាងរាស្ត្រចំនួន៥ លើ១២៥។
អគ្គលេខាធិការរង និងជាអ្នកនាំពាក្យម្នាក់របស់ គជប លោក សោម សូរីដា ប្រាប់វិទ្យុបារាំងអន្តរជាតិRFI នៅថ្ងៃសៅរ៍នេះថា តាមច្បាប់គឺមានរយៈពេល៦ខែសម្រាប់រៀបចំសមាសភាពដឹកនាំ គជប ឡើងវិញ បន្ទាប់ពីបោះឆ្នោតអាណត្តិទី៧រួច។ លោកពន្យល់ថា សម្រាប់កូតា សមាសភាព គជប មិនមានអ្វីប្រែប្រួលឡើយ ពោលនៅតែមានសមាសភាព៨រូបពីគណបក្សដែលជាប់ឆ្នោត និងម្នាក់មកពីអង្គការមិនមែនរដ្ឋាភិបាលដដែល។
សូមបញ្ជាក់ថា សមាសភាពក្បាលម៉ាស៊ីន គជប ត្រូវបានកំណត់៤រូបមកពីគណបក្សប្រជាជនកម្ពុជា ៤រូបមកពីគណបក្សសង្គ្រោះជាតិ គឺយោងលើការស្រុះស្រួលនយោបាយតាំងពីក្រោយឆ្នោត២០១៣ ខណៈដែល១រូបមកពីអង្គការសង្គមស៊ីវិល។
ប៉ុន្តែក្រោយបក្សប្រឆាំងត្រូវបានរំលាយ តំណែង សមាជិក គជប គឺធ្លាក់ទៅលើគណបក្សមួយចំនួនដែលទទួលយកកៅតំណាងរាស្ត្រពីអតីតគណបក្សសង្គ្រោះជាតិ ហើយក្រោយការបោះឆ្នោតឆ្នាំ២០១៨ ដែលគណបក្សប្រជាជនកម្ពុជាឈ្នះការបោះឆ្នោតតែឯងនោះ គឺកៅអីគជប ភាគច្រើនធ្លាក់ទៅលើកូតាគណបក្សកាន់អំណាច។ ទោះជាយ៉ាងណា ការរុះរើក្បាលម៉ាស៊ីនគជប នៅពេលនេះគឺធ្វើឡើង បន្ទាប់ពីគណបក្សហ្វ៊ុនស៊ិនប៉ិច ជាប់ឆ្នោតបាន៥អាសនៈផងដែរនៅអាណត្តិទី៧នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ