នាយករដ្ឋមន្ត្រី៖ ការជ្រើសរើសមន្ត្រីកសិកម្មឃុំ ត្រូវមានតម្លាភាព និងសុក្រឹតភាព
រដ្ឋាភិបាល តាមរយៈក្រសួងកសិកម្ម កំពុងដំណើរការជ្រើសរើសមន្ត្រីកសិកម្មឃុំតាមផែនការដែលបានគ្រោងទុកចំនួន ១៦០០នាក់។ ក៏ប៉ុន្តែក្រសួងកសិកម្មប្រកាសជ្រើសរើសជាលើកដំបូងចំនួន ២៥០នាក់ ខណៈបេក្ខជនបានដាក់ពាក្យដល់ទៅ ១ម៉ឺននាក់។ លោកនាយករដ្ឋមន្ត្រី ហ៊ុន ម៉ាណែត នៅក្នុងពិធី ប្រកាសដាក់ឲ្យអនុវត្តកម្មវិធីនយោបាយអាទិភាពពាក់ព័ន្ធនឹងវិស័យកសិកម្មនាព្រឹកថ្ងៃទី២០ ខែវិច្ឆិកានេះ បានណែនាំឲ្យការរៀបចំប្រលងជ្រើសរើសមន្ត្រីប្រកបដោយតម្លាភាព សមត្ថភាព និងគុណភាព។
ចុះផ្សាយនៅថ្ងៃ៖
ស្តាប់ - ០២:១៩
លោកនាយករដ្ឋមន្ត្រី ហ៊ុន ម៉ាណែត បានណែនាំឲ្យក្រសួងចំនួន៣ គឺក្រសួងកសិកម្ម ក្រសួងមុខងារសាធារណៈ និងក្រសួងហិរញ្ញវត្ថុ សហការគ្នារៀបចំការប្រលងជ្រើសរើសមន្ត្រីកសិកម្មឃុំប្រកបដោយតម្លាភាព និងគុណភាព ដើម្បីទទួលបានមន្ត្រីដែលមានសមត្ថភាពផ្នែកកសិកម្មជួយដល់ប្រជាពលរដ្ឋ។
លោកនាយករដ្ឋមន្ត្រីថាការប្រលងជ្រើសរើសមន្ត្រីកសិកម្មនេះ មានការបើកទូលាយមិនចំពោះតែអ្នកមានបរិញ្ញាបត្រនោះទេ អ្នកដែលមានសមត្ថភាព និងបទពិសោធន៍នៅមូលដ្ឋានក៏ត្រូវបានអនុញ្ញាតឲ្យមានការប្រកួតប្រជែង ដោយមានការធានាថាអ្នកមានសមត្ថភាព«ចេះជាប់» គឺជាប់ដោយមោទនភាព។ អ្វីដែលប្រមុខរដ្ឋាភិបាលសង្កត់បញ្ជាក់នោះគឺ ការជ្រើសរើសមន្ត្រីត្រូវមានលក្ខខណ្ឌជាក់លាក់ ដោយតម្រូវឲ្យមន្ត្រីដែលប្រលងជាប់ចុះទៅបំពេញការងារតាមមូលដ្ឋាន មិនអាចដើម្បីតែយកក្របខណ្ឌមន្ត្រីហើយផ្ទេរចេញនោះទេ។
វិស័យកសិកម្មជាវិស័យឆ្អឹងខ្នងមួយក្នុងការជួយទ្រទ្រង់ដល់សេដ្ឋកិច្ចកម្ពុជា។ ក្រសួងកសិកម្ម ដែលតែងតែរងនូវការវាយប្រហារពីរឿងទីផ្សារកសិផលកន្លងមក បានដាក់យុទ្ធសាស្ត្រពង្រាយមន្ត្រីកសិកម្មនៅតាមឃុំនានាទូទាំងប្រទេស ដើម្បីជួយផ្នែកបច្ចេកទេសដល់កសិករនៅក្នុងការដាំដុះ។
សូមរំលឹកថាតម្លៃកសិកផលទូទៅរបស់កម្ពុជា កន្លងមកតែងប្រឈមនូវបញ្ហា ដោយសារឈ្មួញក្រឡុកតម្លៃទីផ្សារ ជាពិសេសតម្លៃស្រូវ ក៏ប៉ុន្តែនៅឆ្នាំនេះ តម្លៃស្រូវហាក់មានភាពប្រសើរ។ ទោះយ៉ាងណា ការចិញ្ចឹមជ្រូក និងការនាំជ្រូកចូលពីប្រទេសជិតខាង នៅជាបញ្ហាចម្រូងចម្រាសនៅឡើយ។ ក្រៅពីនេះ ការនាំបន្លែចូលពីក្រៅប្រទេស ការដាំដុះនៅក្នុងស្រុក ដែលជាប់ពាក់ព័ន្ធនឹងការប្រើប្រាស់ថ្នាំគីមីហួសកំរិត ក៏នៅជាសំណួរ ដែលក្រសួងកសិកម្មត្រូវបន្តមានចំលើយ និងដំណោះស្រាយផងដែរ។
ជាការពិតកសិកម្មគឺជាវិស័យជន្ទល់សេដ្ឋកិច្ចមួយរបស់ប្រទេស ក៏ប៉ុន្តែយោងតាមការព្យាកររបស់ក្រសួងសេដ្ឋកិច្ចកាលពីឆ្នាំ២០២២ វិស័យកសិកម្ម មានកំណើនតិចតួចគឺមិនដល់១%ផង។ ដោយឡែកនៅឆមាសទី១ ឆ្នាំ២០២៣នេះ ប្រទេសកម្ពុជារកចំណូលពីកសិកម្មចំនួនជាង ២ ៤០០លានដុល្លារ គឺធ្លាក់ចុះជាង២២% ធៀបនឹងរយៈពេលដូចគ្នាក្នុងឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ