លោកហ៊ុន សែន៖គ្មានកម្លាំងនយោបាយណាអាចបំបែកបក្សប្រជាជនក្រៅពីបក្សប្រជាជនខ្លួនឯង
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានឲ្យដឹងថា ប្រធានគណបក្សលោក ហ៊ុន សែន បានគូសបញ្ជាក់ថាមិនមានកម្លាំងប្រតិកិរិយាណា អាចបំបែកបំបាក់គណបក្សប្រជាជនបានទេ លើកលែងតែគណបក្សប្រជាជនខ្លួនឯងជាអ្នកធ្វើ។ ការថ្លែងរបស់អ្នកនាំពាក្យគណបក្សកាន់អំណាចដូច្នេះ ធ្វើឡើងបន្ទាប់ពីគណបក្សនេះ បានបិទបញ្ចប់មហាសន្និបាតវិសាមញ្ញតំណាងទូទាំងប្រទេសរបស់ខ្លួនកាលពីរសៀលថ្ងៃទី១០ ខែធ្នូ ឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០១:៥៧
ឆ្លើយតបទៅនឹងសំណួររបស់អ្នកសារព័ត៌មានបន្ទាប់ពីបិទបញ្ចប់មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនរយៈពេល២ថ្ងៃ លោក សុខ ឥសាន អ្នកនាំពាក្យគណបក្សប្រជាជនបានលើកឡើងនូវការគូសបញ្ជាក់របស់លោក ហ៊ុន សែន ប្រធានគណបក្ស នៅក្នុងអង្គសន្និបាតថាគ្មានមជ្ឈដ្ឋាន ឬកម្លាំងខាងក្រៅណាអាចបំបែកបំបាក់សាមគ្គីផ្ទៃក្នុងគណបក្សប្រជាជនបានទេ។
លោក សុខ ឥសាន បន្តការកត់សម្គាល់ថាចាប់តាំងពីគណបក្សប្រជាជនបានបង្កើតឡើង មជ្ឈដ្ឋានប្រឆាំងតែងប្រើឧបាយកលគ្រប់បែបយ៉ាង និងគ្រប់រូបភាព ដើម្បីបំបែកបំបាក់ផ្ទៃក្នុងគណបក្ស។ ក៏ប៉ុន្តែរហូតមកដល់ពេលនេះ គណបក្សប្រជាជនកាន់តែមានសក្តានុពល និងរឹងម៉ាំបន្ថែមទៀត។
សូមរំលឹកថា សកម្មជន និងអ្នកនយោបាយប្រឆាំង រួមទាំងអ្នកវិភាគនយោបាយខ្លះផងដែរ តែងបានលើកឡើងតាមរយៈប្រព័ន្ធផ្សព្វផ្សាយ និងបណ្តាញសង្គមពីការបែកបាក់ផ្ទៃក្នុងគណបក្សប្រជាជន ដែលកំពុងកាន់អំណាច។ ភាពមិនចុះសម្រុងនឹងគ្នាដែលតែងមានការលើកឡើងពីមជ្ឈដ្ឋានប្រឆាំងនោះគឺ ពួកគេផ្តោតទៅលើក្រុមលោក ហ៊ុន សែន ប្រធានគណបក្ស និងក្រុមលោក ស ខេង អនុប្រធានគណបក្ស ដែលសុទ្ធសឹងជាមនុស្សដែលមានឥទ្ធិពល។
ក៏ប៉ុន្តែកាលពីខែសីហា ឆ្នាំ២០២៣ កន្លងទៅ លោក ស ខេង បានបញ្ជាក់ថាគណបក្សប្រជាជនកម្ពុជាកំពុងតែមានឯកភាពផ្ទៃក្នុងរឹងមាំ និងទទួលបានទំនុកចិត្តពីប្រជាពលរដ្ឋឲ្យដឹកនាំប្រទេសជាបន្ត។ ក្នុងខែកញ្ញា ឆ្នាំ២០២៣ ដដែល លោក ស ខេង ក៏បានចេញមកបញ្ជាក់សារជាថ្មីថា លោកមានគោលជំហរឥតងាករេក្នុងការបន្តគំាទ្រ ដល់រាជរដ្ឋាភិបាលអាណត្តិទី៧ នៃរដ្ឋសភា ដែលដឹកនាំដោយលោក ហ៊ុន ម៉ាណែត ជានាយករដ្ឋមន្ត្រី។
ទោះយ៉ាងណា លោក សុខ ឥសាន បានបញ្ជាក់ថាគណបក្សប្រជាជនបានទាញអារម្មណ៍ផ្ទៃក្នុងឲ្យខិតខំពង្រឹងពង្រីករបៀបរបបធ្វើការតាមគោលការណ៍ប្រជាធិបតេយ្យប្រកបដោយរបៀបរៀបរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ