នាយករដ្ឋមន្ត្រីកម្ពុជាស្នើឲ្យជប៉ុនមកវិនិយោគវិស័យកសិកម្មនៅកម្ពុជា
ប្រមុខរដ្ឋាភិបាលកម្ពុជា លោក ហ៊ុន ម៉ាណែត ស្នើឱ្យក្រុមហ៊ុនជប៉ុនមកវិនិយោគលើវិស័យកសិកម្មនៅកម្ពុជា ដោយធ្វើការផលិតផ្ទាល់ ដើម្បីលក់នៅទីផ្សារកម្ពុជា និងនាំចេញទៅប្រទេសជិតខាង និងប្រទសក្នុងតំបន់។ ការស្នើនេះធ្វើឡើងក្នុងជំនួបថ្ងៃទី១៩ធ្នូ រវាង លោក ហ៊ុន ម៉ាណែត និងលោកកាត្សឹណារី ម៉ាត្សឹដា នាយកក្រុមហ៊ុន Meiji ក្នុងឱកាសចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ ពីថ្ងៃទី១៥-១៩ ខែធ្នូ ឆ្នាំ២០២៣ នៅទីក្រុងតូក្យូ។
ចុះផ្សាយនៅថ្ងៃ៖
ស្តាប់ - ០២:២៨
ជាមួយនឹងការស្នើឲ្យជប៉ុនមកវិនិយោគវិស័យកសិកម្មនេះ នាយករដ្ឋមន្ត្រីកម្ពុជាក៏បានស្នើឱ្យក្រុមហ៊ុនជប៉ុនជួយបណ្តុះបណ្តាលធនធានមនុស្សកម្ពុជាលើជំនាញកសិកម្ម ដើម្បីលើកកម្ពស់ផលិតភាពក្នុងវិស័យនេះឱ្យកាន់តែខ្លាំងក្លាថែមទៀត។
បើតាមការផ្សព្វផ្សាយនៅលើហ្វេសប៊ុករបស់លោក ហ៊ុន សែន ក្នុងឱកាសនៃជំនួបនោះ លោក កាត្សឹណារី ម៉ាត្សឹដា បានលើកឡើងពីការរីកចម្រើននៃសកម្មភាពអាជីវកម្មរបស់ខ្លួន និងអំពីគម្រោងនៃការវិនិយោគរបស់ក្រុមហ៊ុននេះ លើភាពសម្បូរបែបនៃផលិតផល នៅក្នុងប្រទេសកម្ពុជា នាពេលខាងមុខ។
លោក ហ៊ុន ម៉ាណែត គូសបញ្ជាក់ថា រដ្ឋាភិបាលកម្ពុជា បាន និងកំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និងវិនិយោគ និងផ្តល់នូវការលើកទឹកចិត្តប្រកបដោយភាពអនុគ្រោះ និងភាពទាក់ទាញដល់វិនិយោគិនដែលមកវិនិយោគនៅក្នុងប្រទេសកម្ពុជា។
សូមបញ្ជាក់ថា ក្នុងជំនួប កាលពីថ្ងៃទី១៦ ខែធ្នូ ឆ្នាំ២០២៣ ជាមួយលោក ហ៊ុន ម៉ាណែត លោក គីម មូចូ (Kim Mujo) នាយកក្រុមហ៊ុន Pharma Foods International ក៏បានអះអាងថាខ្លួនសម្លឹងឃើញសក្តានុពលអាជីវកម្ម ហើយមានបំណងពង្រីកការវិនិយោគ មកកាន់កម្ពុជា ជាពិសេស លើវិស័យកសិកម្ម។
កាលពីដើមខែមេសាឆ្នាំ២០២៣ លោក Kunihiko HIRABAYASHI អគ្គលេខាធិការ នៃមជ្ឈមណ្ឌល អាស៊ាន-ជប៉ុន បានថ្លែងពីចំណាប់អារម្មណ៍ចំពោះការដាំដុះនៅកម្ពុជា ថា មានភាពសម្បូរបែបប្រកបដោយសក្តានុពលខ្ពស់ និងធម្មជាតិ ដោយរក្សាទុករស់ជាតិដើម និងក្លិន តួយ៉ាង ស្វាយ ស្វាយចន្ទី និងម្រេច ជាដើម។
គួរឲ្យដឹងថា ជប៉ុនបានចុះគម្រោងវិនិយោគនៅកម្ពុជា រួមមាន៖ គ្រឿង បង្គុំរថយន្ដ និងបរិក្ខារបច្ចេកទេសកសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។ ក្រៅពីនេះក៏មានដែរ ក្នុងវិស័យធនាគារ អាកាសចរណ៍ និងភោជនីយដ្ឋាន ដែលសរុប មាន ១ ៧០០ ក្រុមហ៊ុន។ នេះបើតាមអគ្គនាយកនៃអគ្គនាយកដ្ឋានជំរុញពាណិជ្ជកម្មកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ