នាយករដ្ឋមន្ត្រី៖ក្រសួងពាណិជ្ជកម្មត្រៀមចរចារកប្រព័ន្ធអនុគ្រោះថ្មីពេលកម្ពុជាចេញពីប្រទេសក្រីក្រ
នៅក្នុងពិធីបិទសន្និបាតក្រសួងពាណិជ្ជកម្មនារសៀលថ្ងៃទី២២ ខែធ្នូនេះ លោកនាយករដ្ឋមន្ត្រី ហ៊ុន ម៉ាណែត បានប្រាប់ឲ្យក្រសួងពាណិជ្ជកម្មត្រៀមខ្លួនក្នុងការចរចាស្នើសុំប្រព័ន្ធអនុគ្រោះពាណិជ្ជកម្មថ្មី ខណៈដែលកម្ពុជានឹងត្រូវចាកចេញពីឋានៈប្រទេស ដែលមានការអភិវឌ្ឍន៍តិចតួចនៅឆ្នាំ ២០២៧ខាងមុខ។ លោកនាយករដ្ឋមន្ត្រីក៏បានប្រាប់បន្ថែមឲ្យមានការសិក្សាពីផលប៉ះពាល់នៃការបាត់បង់ភាពអនុគ្រោះ។ លោកថា វាជាការចាំបាច់ដែលកម្ពុជាត្រូវរៀនរស់ និងពង្រឹងខ្លួនឯង បន្ទាប់ពីកម្ពុជារឹងដៃរឹងជើង។សូមរំលឹកថាទីផ្សារធំៗរបស់ប្រទេសកម្ពុជារួមមានសហរដ្ឋអាមេរិក សហភាពអឺរ៉ុប និងប្រទេសមួយចំនួនទៀតនៅតំបន់អាស៊ី។ កម្ពុជាក្នុងនាមជាប្រទេសដែលមានការអភិវឌ្ឍន៍តិចតួច ទទួលបានភាពអនុគ្រោះពាណិជ្ជកម្មពីសហរដ្ឋអាមេរិក(GSP) និងពីសហភាពអឺរ៉ុប(EBA) ជាពិសេសទៅលើមុខទំនិញវាយនភណ្ឌ កាត់ដេរ និងសម្ភារៈធ្វើដំណើរ។ ក៏ប៉ុន្តែប្រទេសកម្ពុជាបានបាត់បង់ ២០%នៃ EBA និងបាត់បង់ទាំងស្រុងនូវ GSPពីអាមេរិក ដែលការបាត់បង់នេះ ត្រូវគេមើលឃើញថាបណ្តាលមកពីឥទ្ធិពលនយោបាយ។ ទោះយ៉ាងណា កម្ពុជានៅតែបន្តការនាំចេញផលិតផលទៅកាន់ប្រទេសលោកខាងលិចទាំងនោះ ស្របពេលដែលរដ្ឋាភិបាលកម្ពុជាប្រកាន់ជំហរថាប្រទេសនេះមិនអាចយកអធិបតេយ្យរបស់ខ្លួនទៅដូរជាមួយភាពអនុគ្រោះទាំងនោះបានឡើយ៕
ចុះផ្សាយនៅថ្ងៃ៖
ស្តាប់ - ០១:៣៥
