លោកសម រង្ស៊ី ប្រាប់ឲ្យសកម្មជនគាំទ្របក្សប្រឆាំងតែមួយពេលបោះឆ្នោតព្រឹទ្ធសភាខាងមុខ
នៅថ្ងៃទី១១ ខែមករា ឆ្នាំ២០២៤ លោក សម រង្ស៊ី ប្រធានស្តីទីអតីតគណបក្សសង្រ្គោះជាតិបានអំពាវនាវឲ្យកម្លាំងប្រជាធិបតេយ្យទាំងអស់រួបរួមគ្នា និងឈប់វាយប្រហារគ្នា។ ការចេញសារជាលើកទីពីររបស់លោក សម រង្ស៊ី ធ្វើឡើងក្នុងគោលដៅឲ្យគណបក្សប្រឆាំងចំនួន៣នៅកម្ពុជារួមគ្នាតែមួយ ដើម្បីយកជ័យជម្នះលើការបោះឆ្នោតព្រឹទ្ធសភានីតិកាលទី៥ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤នេះ។
ចុះផ្សាយនៅថ្ងៃ៖
ស្តាប់ - ០២:២៧
ជាថ្មីម្តងទៀត លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ បានប្រាប់កម្លាំងប្រជាធិបតេយ្យទាំងអស់នៅក្នុងប្រទេសកម្ពុជាឲ្យសហការគ្នាលើកកម្ពស់លទ្ធិប្រជាធិបតេយ្យនៅកម្ពុជា។ ក្នុងន័យនេះ លោកបានស្នើឲ្យអ្នកគាំទ្រគណបក្សប្រឆាំងចំនួនបី គឺគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ រក្សាភាពស្មោះត្រង់ចំពោះជាតិ និងប្រជាជន រក្សាឧត្តមគតិដើម ឈរលើសីលធម៌ សច្ចធម៌ និងយុត្តិធម៌។
នៅក្នុងលិខិតបង្ហោះតាមហ្វេសប៊ុកពីទីក្រុងប៉ារីស ប្រទេសបារាំង លោក សម រង្ស៊ី បានពន្យល់ទៅកាន់អ្នកគាំទ្រគណបក្សទាំងបីថា ឧត្តមគតិដើម គឺជារឿងសំខាន់ដែលធ្វើឲ្យព្រលឹងជាតិរស់រវើកជានិច្ច។ លោក សម រង្ស៊ី បានបញ្ជាក់ថា ឈ្មោះគណបក្សដែលអ្នកគាំទ្រកំពុងប្រទាញប្រទង់គ្នាមិនសំខាន់ និងណែនាំឲ្យសហការគ្នារវាងគណបក្សកម្លាំងជាតិ និងគណបក្សឆន្ទៈខ្មែរ ក្នុងការចូលរួមបោះឆ្នោតជ្រើសតាំងសមាជិកព្រឹទ្ធសភានៅខែកុម្ភៈខាងមុខ ដោយចៀសវាងការប្រកួតប្រជែងគ្នានៅតាមភូមិភាគនីមួយៗដែលនាំឲ្យបរាជ័យទាំងអស់គ្នា។
មេដឹកនាំបក្សប្រឆាំងចាស់វស្សារូបនេះ ក៏បានប្រាប់ទៅអង្គបោះឆ្នោតគណបក្សភ្លើងទៀន ដែលមិនមានសិទ្ធិចូលរួមបោះឆ្នោតព្រឹទ្ធសភានោះ ឲ្យប្រកាន់ខ្ជាប់នូវវិន័យ បោះឆ្នោតដោយសម្ងាត់តាមសម្បជញ្ញៈរបស់ខ្លួនម្នាក់ៗ ឲ្យគណបក្សប្រជាធិបតេយ្យណាមួយរវាងគណបក្សកម្លាំងជាតិ និងគណបក្សឆន្ទៈខ្មែរនៅតាមភូមិភាគនីមួយៗ។
ជុំវិញសារអំពាវនាវជាថ្មីរបស់លោក សម រង្ស៊ីពេលនេះ អ្នកនយោបាយគណបក្សប្រឆាំងទាំងពីរក្រុមនៅមិនទាន់មានអត្ថាធិប្បាយយ៉ាងណានៅឡើយទេ។ ក៏ប៉ុន្តែលោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយយល់ឃើញថា លោក សម រង្ស៊ី នៅតែមានឥទ្ធិពលទៅលើគណបក្សប្រឆាំងនៅកម្ពុជា ហើយសាររបស់លោកអាចមានប្រសិទ្ធភាព។ លោក ឯម សុវណ្ណារ៉ា មានជំនឿថា អ្នកនយោបាយប្រឆាំងនឹងស្តាប់លោក សម រង្ស៊ី ហើយរកយន្តការជជែកគ្នាដើម្បីរួមកម្លាំងតែមួយ។
សូមរំលឹកថាកាលពីថ្ងៃទី៧ ខែធ្នូ ឆ្នាំ២០២៣ កន្លងទៅ លោក សម រង្ស៊ី ក៏បានចេញសារបង្រួបបង្រួមសកម្មជន និងអ្នកនយោបាយប្រឆាំងម្តងហើយអំឡុងពេលគណបក្សភ្លើងទៀន និងគណបក្សកម្លាំងជាតិបើកការវាយប្រហារគ្នា។
បច្ចុប្បន្នអ្នកនយោបាយនៃគណបក្សទាំងពីរ ក៏កំពុងបន្តឃោសនាហែកទាញអង្គបោះឆ្នោតរបស់គណបក្សភ្លើងទៀនចំនួនជាង២ពាន់នាក់ តាមរយៈឈ្មោះគណបក្សឆន្ទៈខ្មែរ និងគណបក្សកម្លាំងជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ