ក្រសួងមហាផ្ទៃព្រមានរំលាយគណបក្សប្រឆាំង បើធ្វើតាមលោក សម រង្ស៊ី
ក្រសួងមហាផ្ទៃនៅថ្ងៃទី១២មករា២០២៤ បានចេញលិខិតព្រមានជាចំហមួយសំដៅទៅគណបក្សប្រឆាំង បន្ទាប់ពីលោក សម រង្ស៊ី អំពាវនាវឲ្យគណបក្ស៣រួមកម្លាំងគ្នាទៅកាន់គោលដៅតែមួយក្នុងការបោះឆ្នោតព្រឹទ្ធសភាខាងមុខ។ ប៉ុន្តែបើតាមក្រសួងមហាផ្ទៃ ការអំពាវនាវរបស់លោក សម រង្ស៊ី គឺផ្ទុយពីស្មារតីនៃច្បាប់ ខណៈច្បាប់ស្តីពីគណបក្សនយោបាយ បានហាមមិនឲ្យគណបក្សនយោបាយ មានការពាក់ព័ន្ធនឹងទណ្ឌិត។
ចុះផ្សាយនៅថ្ងៃ៖
ស្តាប់ - ០២:៣៧
នៅក្នុងលិខិតដដែល ក្រសួងមហាផ្ទៃបានព្រមានទុកជាមុនឲ្យគណបក្សនយោបាយដែលបានចុះឈ្មោះចូលរួមបោះឆ្នោតព្រឹទ្ធសភានៅថ្ងៃទី២៥កុម្ភៈ២០២៤ បញ្ឈប់ជាបន្ទាន់រាល់សកម្មភាពដែលបំពានច្បាប់ស្តីពីគណបក្សនយោបាយមាត្រា៦ថ្មី(ពីរ)។ មាត្រាថ្មីមួយ នេះត្រូវបានធ្វើវិសោនកម្មបន្ថែម ក្រោយពេលរំលាយគណបក្សសង្គ្រោះជាតិ ក្នុងន័យ ហាមប្រាមមិនគណបក្សនយោបាយទាក់ទងជាមួយបុគ្គលដែលត្រូវបានតុលាការកាត់ទោស ឬហៅថា «ទណ្ឌិត»។
បើតាមក្រសួងមហាផ្ទៃ មាត្រា៤៤ថ្មីនៃច្បាប់ដដែលនេះក៏បានចែងថា គណបក្សណាដែលប្រព្រឹត្តិល្មើស គឺអាចប្រឈមនឹងការផ្អាកសកម្មភាពប្រាំឆ្នាំ ឬប្រឈមនឹងការរំលាយដោយតុលាការ។
អ្វី ជា ការកត់សម្គាល់ ការព្រមានរបស់ក្រសួងមហាផ្ទៃបានសំដៅចំៗលើលោក សម រង្ស៊ី ប្រធានស្តីទីអតីតគណបក្សសង្រ្គោះជាតិដែលនៅថ្ងៃទី១១ ខែមករា ឆ្នាំ២០២៤ បានអំពាវនាវឲ្យកម្លាំងប្រជាធិបតេយ្យទាំងអស់រួបរួមគ្នា និងឈប់វាយប្រហារគ្នា។
ការចេញសារជាលើកទីពីររបស់លោក សម រង្ស៊ី ធ្វើឡើងក្នុងគោលដៅឲ្យគណបក្សប្រឆាំងចំនួន៣នៅកម្ពុជា រួមគ្នាតែមួយ ដើម្បីយកជ័យជម្នះលើការបោះឆ្នោតព្រឹទ្ធសភានីតិកាលទី៥ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤នេះ។ ក្នុងន័យនេះ លោក សម រង្ស៊ី បានស្នើឲ្យអ្នកគាំទ្រគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ រក្សាភាពស្មោះត្រង់ចំពោះជាតិ និងប្រជាជន រក្សាឧត្តមគតិដើម ឈរលើសីលធម៌ សច្ចធម៌ និងយុត្តិធម៌។
បើតាមលោក សម រង្ស៊ី ឧត្តមគតិដើមជារឿងសំខាន់ដែលធ្វើឲ្យព្រលឹងជាតិរស់រវើកជានិច្ច ខណៈលោក ចាត់ទុកឈ្មោះគណបក្សដែលកំពុងមានការប្រទាញប្រទង់គ្នានៅពេលនេះជារឿងមិនសំខាន់ឡើយ។
សូមរំលឹកថា កាលពីថ្ងៃទី៧ ខែធ្នូ ឆ្នាំ២០២៣ លោក សម រង្ស៊ី ក៏បានចេញសារបង្រួបបង្រួមសកម្មជន និងអ្នកនយោបាយប្រឆាំងម្តងហើយ អំឡុងពេលគណបក្សភ្លើងទៀន និងគណបក្សកម្លាំងជាតិ បើកការវាយប្រហារគ្នា។ ប៉ុន្តែ បច្ចុប្បន្នអ្នកនយោបាយនៃគណបក្សទាំងពីរ កំពុងបន្តឃោសនាអូសទាញអង្គបោះឆ្នោតរបស់គណបក្សភ្លើងទៀនចំនួនជាង២ពាន់នាក់ ដើម្បីទុកសម្រាប់ការបោះឆ្នោតព្រឹទ្ធសភា ដែលមានការចូលរួមពីគណបក្សប្រឆាំងចំនួនពីរគឺ ឆន្ទៈខ្មែរ និងកម្លាំងជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ