លោកសុក ហាច ត្រូវបានសមាជបក្សឆន្ទៈខ្មែរតែងតាំង ជាប្រធានគណបក្ស
នៅថ្ងៃទី២០ មករា ឆ្នាំ២០២៤នេះ គណបក្សឆន្ទះខ្មែរបានធ្វើសមាជដើម្បីផ្លាស់ប្តូរក្បាលម៉ាស៊ីនដឹកនាំគណបក្ស បន្ទាប់ពីប្រធានគណបក្សនេះបានទៅចូលរួមជាមួយគណបក្សភ្លើងទៀនតាំងពីខែវិច្ឆិកា ឆ្នាំ២០២២។ ប៉ុន្តែការធ្វើសមាជរបស់គណបក្សជំទាស់ពេល នេះ គឺដើម្បីចូលរួមបោះឆ្នោតព្រឹទ្ធសភានៅថ្ងៃទី២៥ កុម្ភៈ ២០២៤។ នេះដោយសារតែគណបក្សឆន្ទះខ្មែរត្រូវបានចាត់តាំងឲ្យជំនួសគណបក្សភ្លើងទៀន ខណៈដែលបក្សភ្លើងទៀនបាត់សំបុត្រកំណើត។
ចុះផ្សាយនៅថ្ងៃ៖
ស្តាប់ - ០២:០៣
លទ្ធផលនៃសមាជរបស់គណបក្សឆន្ទះខ្មែរនៅរសៀលថ្ងៃទី២០ មករា ២០២៤ បានសម្រេចជ្រើសរើសលោកបណ្ឌិត សុក ហាច ឲ្យធ្វើជាប្រធានគណបក្ស លោក សុន ឆ័យ លោក ហុង សុខហួរ និង លោក សេង មារឌី គឺជាអនុប្រធាន ខណៈលោក គីមសួរ ភីរិទ្ធ ត្រូវបានជ្រើសរើសជាប្រធានក្រុមប្រឹក្សាវិន័យ។ ចំណែក លោក គង់ ម៉ូនីកា អតីតប្រធានគណបក្សឆន្ទៈខ្មែរ ត្រូវបានជ្រើសរើសជាអគ្គលេខាធិការ និងលោក មាស ខេង ជាអគ្គហិរញ្ញឹក។
សូមរំឭកថា លោក គង់ ម៉ូនីកា និងថ្នាក់ដឹកនាំ ប្រមាណ ២០នាក់របស់គណបក្សឆន្ទៈខ្មែរបានទៅចូលរួមធ្វើនយោបាយជាមួយគណបក្សភ្លើងទៀន បន្ទាប់ពីការបោះឆ្នោតឃុំ សង្កាត់ កាលពីខែមិថុនា ២០២២។ នៅពេល នោះ លោក ផល សុផា ត្រូវបានតែងតាំងជាប្រធានគណបក្សឆន្ទះខ្មែរ ហើយលោក គង់ ម៉ូនីកា ក្លាយជាអគ្គលេខាធិការរងគណបក្សភ្លើងទៀន។
ប៉ុន្តែពេលនេះ ថ្នាក់ដឹកនាំគណបក្សភ្លើងទៀនភាគច្រើនបំផុតបានចាកចេញពីផ្ទះភ្លើងទៀន ទៅចូលរួមជាមួយគណបក្សឆន្ទះខ្មែរវិញដោយសារតែបក្សភ្លើងទៀនមិនអាចឈរបោះឆ្នោតព្រឹទ្ធសភាបាន។
គួរជម្រាបជូនថា គណបក្សឆន្ទៈខ្មែររបស់កូនប្រុសលោក គង់ គាំ ត្រូវបានបង្កើតឡើងនៅក្រោយការំលាយគណបក្សសង្គ្រោះជាតិពីតុលាការកំពូលក្នុង ឆ្នាំ ២០១៧។ គណបក្សឆន្ទៈខ្មែរបានចូលរួមការបោះឆ្នោតឆ្នាំ២០១៨ តែមិនទទួលបានកៅអីតំណាងរាស្ត្រ។ ចំណែក ការចូលរួមបោះឆ្នោតឃុំ សង្កាត់កាលពីឆ្នាំ២០២២ កន្លងមកក៏ គណបក្សជំទាស់មួយនេះមិនទទួលបានកៅអីក្រុមប្រឹក្សាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ