ក្រសួងការងារព្រមានម្ចាស់សហគ្រាសក្នុងករណីមានអគ្គិភ័យដោយខ្វះការត្រួតពិនិត្យ
ក្រសួងការងារព្រមានម្ចាស់សហគ្រាស ឬនាយកសហគ្រាស គ្រឹះស្ថានថា បើធ្វេសប្រហែសបណ្តាលឲ្យមានអគ្គិភ័យឆាបឆេះ ប៉ះពាល់អាយុជីវិត ព្រទ្យសម្បត្តិ និងសន្តិសុខ គឺត្រូវទទួលរងការពិន័យ តាមច្បាប់ស្តីពីការងារ។ លើសពីនេះក៏ត្រូវផ្តន្ទាទោសព្រហ្មទណ្ឌផ្សេងទៀត តាមមាត្រា៣០ នៃ ច្បាប់ស្តីពីការបង្កា និងពន្លត់អគ្គិភ័យដែរ។
ចុះផ្សាយនៅថ្ងៃ៖
ស្តាប់ - ០២:២៨
ការចេញមកព្រមានយ៉ាងដូច្នេះរបស់ក្រសួងការងារធ្វើឡើងតាមរយៈសេចក្តីណែនាំចុះថ្ងៃទី១៩មករាឆ្នាំ២០២៤ ពោលបន្ទាប់ពី មានអគ្គិភ័យបានឆាបឆេះរោងចក្រយីដា(Yi Da Manufacturer Co;Ltd) នៅស្រុកកៀនស្វាយ ខេត្ដកណ្ដាលនៅថ្ងៃទី១៨ ខែមករា ឆ្នាំ២០២៤។ អគ្គិភ័យនេះបានបណ្ដាលឲ្យកម្មករម្នាក់ស្លាប់ និងម្នាក់ទៀតរងរបួសបញ្ជូនទៅសង្រ្គោះបន្ទាន់នៅមន្ទីរពេទ្យ។
ប្រធានសហជីពស៊ីខាវឌូ (C.CADWU) ប្រចាំរោងចក្រយីដាបានបញ្ជាក់ប្រាប់វិទ្យុបារាំងអន្តរជាតិ RFI ដោយស្រង់សម្តី កម្មករថា អគ្គិភ័យនោះ គឺមកពីផ្ទុះសេខ្សែភ្លើង ឆេះចេញពីកន្លែងផ្ទុកសារធាតុគីមីសម្រាប់បោកខោអាវ។
សេចក្តីណែនាំរបស់ក្រសួងការងារបានគូសបញ្ជាក់ថា ក្នុងករណីចាំបាច់ ម្ចាស់សហគ្រាស ឬនាយកគ្រឹះស្ថាន ត្រូវទាក់ទងទៅអាជ្ញាធរពាក់ព័ន្ធ ដើម្បីចុះវាយតម្លៃពីហានិភ័យដែលអាចកើតមានចំពោះសុវត្ថិភាពកម្មករ និយោជិត នៅក្នុងអំឡុងពេលដែលសីតុណ្ហភាពឡើងកម្តៅខ្លាំង។
តាមការព្យាករណ៍របស់ក្រសួងធនធានទឹក កម្តៅនឹងកើនឡើងដល់៤១អង្សាសេនៅអំឡុងខែមេសា និងខែឧសភាឆ្នាំ២០២៤នេះ។ នៅក្នុងករណីនេះ ក្រសួងការងារបានរំឭកឲ្យសហគ្រាសទាំងអស់បង្កើនការត្រួតពិនិត្យជាប្រចាំលើប្រព័ន្ធអគ្គិសនី វាយតម្លៃពីហានិភ័យនៅកន្លែងការងារ អប់រំបុគ្គលិក កម្មករ ឲ្យយល់ដឹងពីសញ្ញាសុវត្ថភាព និងត្រួតពិនិត្យជាប្រចាំនូវច្រកចេញពេលប្រកាសអាសន្ន។
នៅឆ្នាំ២០២៣ មានគ្រោះអគ្គីភ័យកើតឡើងសរុបចំនួន៧៦១លើក កើនឡើងលើសឆ្នាំ២០២២ចំនួន១៤៣លើក។ ក្នុងនោះបណ្តាលឱ្យជនរងគ្រោះចំនួន៥៤នាក់បានស្លាប់បាត់បង់ជីវិត និង៩៧នាក់ផ្សេងទៀតរងរបួស ហើយផ្ទះ៥៧៩ខ្នង និងតូបចំនួន៥៧ ត្រូវបានបំផ្លាញដោយសារអគ្គិភ័យ។ នេះបើតាមរបាយការណ៍របស់នាយកដ្ឋានបង្កា ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ។
បើតាមសមត្ថកិច្ចជំនាញ កម្ពុជាអាចប្រឈមនឹងអគ្គិភ័យកាន់តែច្រើន ដោយសារអាគារខ្ពស់ៗកើនឡើង ខ្វះអ្នកជំនាញ និងសម្ភារៈជួយសង្រ្គោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ