គណបក្សភ្លើងទៀនថា អាជ្ញាធរធ្វើឲ្យរាំងស្ទះសំណើរសុំផ្លាស់ប្តូរក្រុមប្រឹក្សាឃុំសង្កាត់របស់ខ្លួន
នៅថ្ងៃទី២២ ខែមករានេះ គណបក្សភ្លើងទៀនបានធ្វើសេចក្តីថ្លែងការណ៍មួយ ដោយសម្តែងការខកចិត្ត និងស្នើឲ្យអាជ្ញាធរពាក់ព័ន្ធបញ្ឈប់នូវការរាំងស្ទះក្នុងការផ្លាស់ប្តូរសមាជិកក្រុមប្រឹក្សាឃុំ សង្កាត់ជាប់ឆ្នោតរបស់ខ្លួន។ ប្រតិកម្មរបស់គណបក្សភ្លើងទៀនធ្វើឡើង បន្ទាប់ពីស្ថាប័នមានសមត្ថកិច្ច មិនបានឆ្លើយតបរួសរាន់នឹងសំណើរសុំផ្លាស់ប្តូរសមាសភាពក្រុមប្រឹក្សាឃុំ សង្កាត់ជាប់ឆ្នោតរបស់គណបក្សភ្លើងទៀនដែលចេញទៅចូលរួមជាមួយគណបក្សផ្សេង។
ចុះផ្សាយនៅថ្ងៃ៖
ស្តាប់ - ០២:៣០
គណបក្សភ្លើងទៀនបានសម្តែងនូវការបារម្ភ និងខកចិត្តចំពោះការធ្វើឲ្យរាំងស្ទះក្នុងការផ្លាស់ប្តូរ ឬដោះដូរសមាជិកក្រុមប្រឹក្សាឃុំ សង្កាត់ជាប់ឆ្នោតមកពីគណបក្សភ្លើងទៀន។
តាមរយៈសេចក្តីថ្លែងការណ៍របស់ខ្លួន គណបក្សប្រឆាំង ដែលមិនមានសិទ្ធិបោះឆ្នោតមួយនេះចាត់ទុកថា ទង្វើរបស់អាជ្ញាធរហាក់ដូចជាមានចេតនាក្នុងការបំបាក់ស្មារតីអង្គបោះឆ្នោត ដែលជាសមាជិកក្រុមប្រឹក្សាឃុំ សង្កាត់ គណបក្សភ្លើងទៀន បំពានលើមាត្រា១៦ នៃច្បាប់ស្តីពីការគ្រប់គ្រងរដ្ឋបាលឃុំ សង្កាត់ និងមិនស្របតាមសេចក្តីណែនាំរបស់ក្រសួងមហាផ្ទៃ។
សូមបញ្ជាក់ថាសមាជិកក្រុមប្រឹក្សាឃុំ សង្កាត់ ចំនួន៣២នាក់ របស់គណបក្សភ្លើងទៀន ត្រូវបានគណបក្សស្នើសុំផ្លាស់ប្តូរឈ្មោះដាក់អ្នកថ្មី បន្ទាប់ពីពួកគេបានទៅគាំទ្រគណបក្សផ្សេង ដែលគេដឹងថាជាគណបក្សកម្លាំងជាតិ។
លោក លី សុធារ៉ាយុត្តិ អគ្គលេខាធិការគណបក្សភ្លើងទៀនបានប្រាប់វិទ្យុបារាំង RFI នៅថ្ងៃចន្ទ ទី២២ មករានេះថា គណបក្សបានស្នើសុំទៅស្ថាប័នមានសមត្ថកិច្ចនៅតាមទីតាំងផ្សេងៗជាយូរមកហើយ ពោលគឺមានរយៈពេលចាប់ពី១ខែទៅ៥ខែ ឲ្យធ្វើការផ្លាស់ប្តូរសមាសភាពក្រុមប្រឹក្សាថ្មីទាំងជាង៣០នាក់។ ប៉ុន្តែនៅមិនទាន់មានការឆ្លើយតបពីស្ថាប័នមានសមត្ថកិច្ចទាំងនោះនៅឡើយ។ លោកថាតាមនីតិវិធី គេមិនអាចប្រើពេលយូររាប់ខែដូចនេះទេ។ អាជ្ញាធរមានសមត្ថកិច្ច ក៏ដូចជាក្រសួងមហាផ្ទៃមិនទាន់មានការឆ្លើយតបយ៉ាងណានៅឡើយជុំវិញបញ្ហានេះ។
សូមរំលឹកថា គណបក្សភ្លើងទៀនមានក្រុមប្រឹក្សាឃុំ សង្កាត់ជាប់ឆ្នោតរបស់ខ្លួនសរុបចំនួន ២១៩៨នាក់។តែដោយគណបក្សនេះមិនមានសិទ្ធិចូលរួមបោះឆ្នោតព្រឹទ្ធសភានៅថ្ងៃទី២៥ ខែកុម្ភៈខាងមុខ គណបក្សភ្លើងទៀនបានជ្រើសរើសបក្សឆន្ទៈខ្មែរ ដែលនៅក្នុងសម្ព័ន្ធភាពជាមួយគ្នាឲ្យឈរឈ្មោះប្រកួតប្រជែង។
ក៏ប៉ុន្តែ ក្រុមមេដឹកនាំមួយចំនួនរបស់គណបក្សភ្លើងទៀនមិនគាំទ្រ ហើយចេញទៅបង្កើតគណបក្សកម្លាំងជាតិ និងបានអូសទាញសមាជិកក្រុមប្រឹក្សាឃុំសង្កាត់របស់គណបក្សភ្លើងទៀន ដែលជាអង្គបោះឆ្នោតដ៏សំខាន់សម្រាប់ជ្រើសតាំងព្រឹទ្ធសភានីតិកាលទី៥នេះ។
ដូច្នេះ បើអាជ្ញាធរយឺតយ៉ាវក្នុងការយល់ព្រមលើសំណើរសុំផ្លាស់ប្តូរសមាសភាពរបស់គណបក្សភ្លើងទៀន មានន័យថាគណបក្សភ្លើងទៀន ដែលពេលនេះជំនួសដោយគណបក្សឆន្ទៈខ្មែរ នឹងបាត់បង់អង្គបោះឆ្នោតជាង៣០រូប ដែលទៅគាំទ្រគណបក្សកម្លាំងជាតិ និងអាចបាត់បង់អាសនៈព្រឹទ្ធសភាមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ