បក្សកម្លាំងជាតិស្នើមហាផ្ទៃកុំឲ្យទទួលស្គាល់ក្រុមប្រឹក្សាថ្មីរបស់បក្សភ្លើងទៀន
គណបក្សកម្លាំងជាតិចេញមុខបរិហារគណបក្សភ្លើងទៀនពីបទបានបោះបង់គោលជំហរដើមជាអ្នកប្រជាធិបតេយ្យ សេរី និងបានងាកទៅចាប់យកជម្រើសផ្តាច់ការនៅពេលចុងក្រោយនេះ។ ការបរិហារបែបនេះធ្វើឡើង បន្ទាប់ពីគណបក្សភ្លើងទៀនបានបណ្តេញសមាជិកក្រុមប្រឹក្សាឃុំ សង្កាត់ ជាប់ឆ្នោត ចំនួន៥រូបបន្ថែមទៀត ចេញពីគណបក្ស កាលពីថ្ងៃទី២៤ ខែមករា ឆ្នាំ២០២៤។ ត្រង់ចំណុចនេះ គណបក្សកម្លាំងជាតិស្នើឲ្យក្រសួងមហាផ្ទៃកុំទទួលស្គាល់សំណើរបស់គណបក្សភ្លើងទៀនដែលសុំផ្លាស់ប្តូរក្រុមប្រឹក្សាឃុំសង្កាត់។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងសេចក្តីថ្លែងការណ៍ចេញផ្សាយថ្ងៃទី២៩ ខែមករា ឆ្នាំ២០២៤ គណបក្សកម្លាំងជាតិដែលបែកចេញពីគណបក្សភ្លើងទៀនបានចាត់ទុកមេដឹកនាំគណបក្សភ្លើងពេលនេះថាជាអ្នកបង្កើតនូវភាពអយុត្តិធម៌ និងការឈឹចាប់ដល់សមាជិកក្រុមប្រឹក្សា ដែលជាប់ឆ្នោតទូទាំងប្រទេស។
តែលោក ទាវ វណ្ណុល ប្រធានគណបក្សភ្លើងទៀនបានប្រាប់វិទ្យុបារាំងអន្តរជាតិRFIថា ការដែលគណបក្សរបស់លោកលុបឈ្មោះសមាជិកមួយចំនួនចេញពីបញ្ជីគណបក្សនៅពេលនេះ ក៏ព្រោះតែអ្នកទាំងនោះ បានទៅចូលរួមជាមួយគណបក្សនយោបាយផ្សេងទៀត។
គួរបញ្ជាក់ថា នេះមិនមែនជាលើកទី១ ដែលសមាជិកក្រុមប្រឹក្សាឃុំ សង្កាត់ ជាប់ឆ្នោតពីគណបក្សភ្លើងទៀនត្រូវបានបណ្តេញចេញពីគណបក្ស។ តាមគណបក្សភ្លើងទៀន មានក្រុមប្រឹក្សាសរុបជាង៣០រូប ត្រូវបានលុបឈ្មោះចេញ ក្នុងនោះក៏មានឈ្មោះរបស់អ្នកដែលទៅចុះចូលជាមួយគណបក្សកម្លាំងជាតិដែរ។
ជាការកត់សំគាល់ ការដែលគណបក្សចេញមកពីក្រុមតែមួយបើកការបរិហារគ្នាចំៗពេលនេះ គឺស្របពេលដែលការបោះឆ្នោតព្រឹទ្ធសភាកាន់តែខិតចូលជិតដល់នៅថ្ងៃទី២៥កុម្ភៈខាងមុខ។
ទោះជាយ៉ាងណា កាលពីថ្ងៃទី២២ មករា គណបក្សកម្លាំងជាតិបានដាក់លិខិតសុំជួបមេដឹកនាំគណបក្សភ្លើងទៀនដើម្បីជជែកពីការបែងចែកមណ្ឌលគ្នាក្នុងការឈរឈ្មោះបោះឆ្នោតដើម្បីកុំឲ្យបែកសំឡេងបក្សប្រឆាំងសម្រាប់ការបោះឆ្នោតអសកលខាងមុខ។ បក្សភ្លើងទៀនបានឆ្លើយតបនឹងលិខិតរបស់បក្សកម្លាំងជាតិដោយផ្តល់ឱកាសឲ្យជួបពិភាក្សានៅថ្ងៃទី៩កុម្ភៈ។ តែលោក ស៊ុន ចន្ធី ប្រធានគណកម្លាំងជាតិប្រាប់វិទ្យុបារាំងអន្តរជាតិRFIថា គឺយឺតពេលដែលត្រូវពិភាក្សាគ្នា ខណៈដែលយុទ្ធនាការឃោសនាបោះឆ្នោតត្រូវចាប់ផ្តើមនៅថ្ងៃទី១០កុម្ភៈ។
តាម លោក ស៊ុន ចន្ធី គណបក្សប្រឆាំងអាចទទួលបានកៅអីសមាជិកព្រឹទ្ធសភាចំនួនយ៉ាងតិច ៨អាសនៈ ប្រសិនបើគណបក្សកម្លាំងជាតិ និងគណបក្សភ្លើងទៀនស្រុះស្រួលគ្នានៅមុនការបោះឆ្នោត។ តែលោកព្រមានថា បើគណបក្សប្រឆាំងទាំងពីរនេះមិនរួមគ្នាទេ សំឡេងរបស់គណបក្សប្រឆាំងនឹងធ្លាក់ទៅគណបក្សផ្សេងទៀតដែលចូលរួមប្រកួតដណ្តើមកៅអីព្រឹទ្ធសភាដែលមានសរុប ៥៨អាសនៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ