នាយករដ្ឋមន្ត្រីប្រកាសបិទក្លឹបបាញ់កាំភ្លើងខេត្តព្រះសីហនុ និងបិទការស្នើសុំទូទាំងប្រទេស
នៅក្នុងពិធីដាក់ឲ្យដំណើរការ«កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤» នាព្រឹកថ្ងៃទី៣១ ខែមករា ឆ្នាំ២០២៤នេះ នៅខេត្តព្រះសីហនុ លោកនាយករដ្ឋមន្ត្រី ហ៊ុន ម៉ាណែត បានប្រកាសជាសាធារណៈឲ្យបិទក្លឹបបាញ់កាំភ្លើងឯកជនទាំងអស់នៅក្នុងខេត្តព្រះសីហនុចាប់ពីពេលនេះតទៅ។ ការប្រកាសបិទក្លឹបបាញ់កាំភ្លើងឯកជននេះ លោកនាយករដ្ឋមន្ត្រីសំអាងថាខេត្តព្រះសីហនុមិនមានភាពចាំបាច់ ហើយប្រាប់ឲ្យទេសចរដើរកម្សាន្តតាមកោះវិញល្អជាង។ បន្ថែមពីនេះ លោក ហ៊ុន ម៉ាណែត ក៏បានបង្ហើបថាលោកបានឲ្យមន្ត្រីរបស់លោកព្រាងសារាចរណ៍ណែនាំទូទាំងប្រទេសមួយ មិនអនុញ្ញាតច្បាប់ឲ្យមានការបើកកន្លែងបាញ់ស៊ីបថ្មី ព្រមទាំងឲ្យពិនិត្យមើលឡើងវិញទីតាំងបាញ់កាំភ្លើងដែលមានស្រាប់។សូមរំលឹកថាចាប់តាំងពីមានការអភិវឌ្ឍន៍ខេត្តព្រះសីហនុកាលពីចុងឆ្នាំ ២០១០ ខេត្តព្រះសីហនុត្រូវបានញ៉ាំញីដោយអំពើហិង្សា បាញ់បោះដោយអាវុធ ដែលភាគច្រើនបង្កឡើងដោយជនជាតិចិនទៅលើជនជាតិចិនគ្នាឯង ឬទៅលើជនបរទេសដទៃ។ ក៏ប៉ុន្តែស្ថានភាពនេះបានស្ងប់ស្ងាត់ទៅវិញដោយអន្លើរបន្ទាប់ពីមានកិច្ចសហការរវាងសមត្ថកិច្ចប៉ូលិសខ្មែរ និងស្ថាប័នសន្តិសុខចិន។ ទោះយ៉ាងណាប្រមុខរដ្ឋាភិបាលកម្ពុជាមិនបានបញ្ជាក់ថាវត្តមានអាជីវកម្មក្លឹបបាញ់កាំភ្លើងឯកជននៅខេត្តព្រះសីហនុមានជាប់ពាក់ព័ន្ធទៅនឹងអំពើហិង្សារបស់ជនបរទេសនៅក្នុងខេត្តទេសចរណ៍នេះនោះទេ៕
ចុះផ្សាយនៅថ្ងៃ៖
ស្តាប់ - ០២:២៤