បក្សភ្លើងទៀនថាអាជ្ញាធរបំបាក់ស្មារតីសកម្មជនខ្លួន តែតុលាការថាពួកគេធ្វើខុសច្បាប់
នៅថ្ងៃទី០១ ខែកុម្ភៈ ឆ្នាំ២០២៤នេះ គណបក្សភ្លើងទៀនបានចេញសេចក្តីថ្លែងការណ៍មួយថ្កោលទោសអាជ្ញាធរក្រុងភ្នំពេញ ដែលបានបន្តចាប់សកម្មជនរបស់ខ្លួនពីរនាក់បន្ថែមទៀតនៅភ្នំពេញ។ ប៉ុន្តែចៅក្រមសាលាដំបូងរាជធានីភ្នំពេញបញ្ជាក់ថា ការបង្គាប់ឲ្យនាំខ្លួនសកម្មជនបក្សប្រឆាំងទាំង២រូបគឺលោក ម៉ា ចិន្តា និងលោក ហាក់ កុសល ធ្វើឡើងក្រោមបទចោទក្លែងបន្លំឯកសារ។
ចុះផ្សាយនៅថ្ងៃ៖
ស្តាប់ - ០១:៥៤
គណបក្សភ្លើងទៀនបានហៅការចាប់ខ្លួន លោក ហាក់ កុសល លេខាគណៈកម្មាធិការប្រតិបត្តិគណបក្សនៅខណ្ឌជ្រោយចង្វារ និងលោក ម៉ា ចិន្តា អនុប្រធានគណៈកម្មាធិការប្រតិបត្តិគណបក្សប្រចាំខណ្ឌដូនពេញថាជារូបភាពគំរាមកំហែងថ្មីៗទៀត ដើម្បីបំបាក់ស្មារតីប្រជាពលរដ្ឋខ្មែរ មិនឲ្យចូលរួមសកម្មភាពនយោបាយជាមួយគណបក្សភ្លើងទៀន។
ទង្វើរបស់អាជ្ញាធរដោយមិនបង្ហាញដីកា និងមិនបង្ហាញពីមូលហេតុច្បាស់លាស់ បានធ្វើឲ្យបរិយាកាសមុនការបោះឆ្នោតអសកលក្នុងឆ្នាំ២០២៤នេះ រឹតតែមានភាពអាប់អួរថែមទៀត។ នេះបើតាមសេចក្តីថ្លែងការណ៍ររបស់គណបក្សភ្លើងទៀន។
ជាមួយគ្នានេះ គណបក្សភ្លើងទៀនក៏បានអំពាវនាវឲ្យអាជ្ញាធរដោះលែងសកម្មជនទាំងពីរដោយគ្មានលក្ខខណ្ឌ ហើយបញ្ឈប់ការចាប់ខ្លួន និងការធ្វើទុក្ខបុកម្នេញដល់ថ្នាក់ដឹកនាំ និងសកម្មជនបក្សប្រឆាំង ដើម្បីធានាឲ្យមានភាពសេរី ត្រឹមត្រូវ និងយុត្តិធម៌ដល់ការបោះឆ្នោតអសកលខាងមុខ។
តែយោងតាមដីកាបង្គាប់ឲ្យនាំខ្លួនរបស់ចៅក្រមសាលាដំបូងរាជធានីភ្នំពេញយី សុខវួច ចុះថ្ងៃទី៣១ ខែមករា ឆ្នាំ២០២៣ លោក ហាក់ កុសល និងលោក ម៉ា ចិន្តា បានជាប់ពាក់ព័ន្ធនឹងបទក្លែងបន្លំ និងបទប្រើប្រាស់លិខិតក្លែងប្រព្រឹត្តនៅភ្នំពេញក្នុងអំឡុងខែវិច្ឆិកា ឆ្នាំ២០២៣ ដែលជាបទល្មើសព្រហ្មទណ្ឌ។
ចៅក្រមក៏បានបញ្ជាក់ដែរថាការនាំខ្លួនអ្នកទាំងពីរ គឺដើម្បីធានាដល់ការបង្ហាញខ្លួនជនត្រូវចោទចំពោះមុខចៅក្រមស៊ើបសួរ និងធានាដល់ការស៊ើបសួរឲ្យបានពេញលេញ។
សូមរំលឹកថាកាលពីថ្ងៃទី១៥ ខែមករា ឆ្នាំ២០២៤ លោក ខឹម ចាន់វណ្ណៈ ប្រធានស្ដីទីគណៈកម្មាធិការប្រតិបត្តិគណបក្សភ្លើងទៀនប្រចាំរាជធានីភ្នំពេញត្រូវបានអាជ្ញាធរចាប់ខ្លួនក្រោមហេតុផលដូចគ្នា។ តាមរយៈដីការបស់តុលាការនៅពេលនេះ ការចាប់ខ្លួនសកម្មជនបក្សភ្លើងទៀន២នាក់បន្ថែមទៀត គឺដោយសារអ្នកទាំងពីរជាប់ពាក់ព័ន្ធជាគូកននឹងលោក ខឹម ចាន់វណ្ណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ