ប្រធានគណបក្សកម្លាំងជាតិលោក ស៊ុន ចន្ធី រងបណ្តឹងឆបោកប្រាក់ជាង១២លានរៀល
លោក ស៊ុន ចន្ធី ប្រធានគណបក្សកម្លាំងជាតិរងបណ្ដឹងព្រហ្មទណ្ឌពាក់ព័ន្ធនឹងករណីឆបោកប្រាក់ដែលប្ដឹងដោយ លោក ស៊ន សុខហេង ប្រធានប្រតិបត្តិគណបក្សភ្លើងទៀនប្រចាំខេត្តកំពង់ធំ។ លោក ស៊ន សុខហេងបានប្តឹងលោកស៊ុន ចន្ធី ទៅកាន់សាលាដំបូង ខេត្តកំពង់ធំកាលពីថ្ងៃទី១ ខែកុម្ភៈ។ តែលោក ស៊ុន ចន្ធីនៅមិនទាន់ឆ្លើយតបយ៉ាងណានឹងបណ្ដឹងនេះនៅឡើយទេមកដល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ពាក្យបណ្តឹងប្តឹងលោកស៊ុន ចន្ធី ទៅកាន់សាលាដំបូងខេត្តកំពង់ធំបានធ្វើឡើងដោយអ្នកតំណាងលោក ស៊ន សុខហេង។ នៅក្នុងពាក្យបណ្តឹងដែលមានស្នាមមេដៃទទួលស្គាល់ដោយមនុស្ស៥នាក់ផ្សេងទៀតបានរៀបរាប់ថា កាលនៅជាប្រធានប្រតិបត្តិគណបក្សភ្លើងទៀនប្រចាំស្រុកសន្ទុក លោក ស៊ុន ចន្ធី បានប្រមូលថវិកាពីសមាជិកចំនួន១៩នាក់ដោយម្នាក់ៗត្រូវបង់ជាង១លានរៀល(១,៦០,០០០រៀល) ដោយអ្នកខ្លះបង់គ្រប់ និងអ្នកខ្លះបង់បានពាក់កណ្ដាលដើម្បីចូលរួមចំណាយនៅក្នុងយុទ្ធនាការឃោសនាការបោះឆ្នោតក្នុង២០២៣។
លោក ស៊ន សុខហេង បានរៀបរាប់នៅក្នុងពាក្យបណ្ដឹងថា លោកស៊ុន ចន្ធី បានសន្យានៅពេលនោះថា បើមិនបានឃោសនាទេ លោកនឹងប្រគល់ប្រាក់ទៅសមាជិកទាំង១៩នាក់វិញ។ តែផ្ទុយមកវិញ លោក ស៊ុន ចន្ធី យកប្រាក់ទាំងនោះទៅបង្កើតគណបក្សថ្មីដោយមិនបានបង់សង់ត្រឡប់វិញដូចការសន្យាឡើយ។
បន្ទាប់ពីបានរៀបរាប់សាវតានៃរឿងរ៉ាវរួចហើយ ម្ចាស់បណ្ដឹងលោក ស៊ន សុខហេងបានស្នើឲ្យសាលាដំបូងខេត្តកំពង់ធំរកយុត្តិធម៌ជូនលោក និងមនុស្ស៨នាក់ផ្សេងទៀត។ ទន្ទឹមគ្នានេះ លោកស៊ន សុខហេងបានសំណូពរ ៣ចំណុច ទី១ គឺផ្ដន្ទាទោសលោក ស៊ុន ចន្ធីតាមផ្លូវច្បាប់ ទី២ សងប្រាក់ជាង១២លានរៀលឲ្យអ្នកទាំង៩នាក់វិញ និងទី៣ សងជំងឺចិត្ត និងសងការចំណាយផ្សេងៗ សរុបចំនួន ៥ពាន់ដុល្លារ។ ជុំវិញពាក្យបណ្តឹងដែលលោកស៊ន សុខហេងបានប្តឹងលោកសុន ចន្ធីពេលនេះ វិទ្យុបារាំងអន្តរជាតិបានព្យាយាមទាក់ទងលោក ស៊ុន ចន្ធី តាមទូរស័ព្ទច្រើនដង តែអត់មានអ្នកលើក។
គួរបញ្ជាក់ថា បន្ទាប់ពីលាឈប់ពីតំណែងជាប្រធានគណៈកម្មាធិការប្រតិបត្តិគណបក្សភ្លើងទៀនខេត្តកំពង់ធំ លោក ស៊ុន ចន្ធី ចេញមកបង្កើតគណបក្សនយោបាយថ្មីនេះមានឈ្មោះថា «គណបក្សកម្លាំងជាតិ» និងបានទទួលស្គាល់ជាផ្លូវការពីក្រសួងមហាផ្ទៃកាលពីថ្ងៃទី១២ ខែតុលាឆ្នាំ២០២៣។
មួយវិញទៀត លោក ស៊ុន ចន្ធី ដែលជាមនុស្សស្និទ្ធនឹងលោក សម រង្ស៊ីធ្លាប់បានចូលរួមជាមួយបក្សប្រឆាំងយូរដែរ ពោលពីនៅជាមួយអតីតគណបក្សសង្គ្រោះជាតិមកម្ល៉េះ។ លោកស្ថិតក្នុងចំណោមថ្នាក់ដឹកនាំជាង១០០នាក់របស់អតីតគណបក្សសង្គ្រោះជាតិដែលត្រូវបានដកសិទ្ធិមិនឲ្យធ្វើនយោបាយ៥ឆ្នាំ។ គឺទើបនៅចុងឆ្នាំ២០២១ ដែលលោកទទួលបានសិទ្ធិធ្វើនយោបាយវិញ បន្ទាប់ពីបានស្នើសុំទៅរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ