លោកទាវ វណ្ណុល ថារដ្ឋាភិបាលដាក់កាំមេរ៉ាឃ្លាំមើលលោកនៅផ្ទះ តែក្រសួងមហាផ្ទៃថាមិនពិត
លោក ទាវ វណ្ណុល ប្រធានគណបក្សភ្លើងទៀនកំពុងបំពេញទស្សនកិច្ចនៅក្នុងប្រទេសជប៉ុន។ នៅក្រុងតូក្យូ លោកបានប្រាប់លោក Akira Koike អគ្គលេខាធិការបក្សកុម្មុយនីស្តជប៉ុននិងជាសមាជិកសភាថា រដ្ឋាភិបាលកម្ពុជាបានដំឡើងកាម៉ារ៉ាឃ្លាំមើលនៅខាងមុខផ្ទះរបស់លោកក្នុងក្រុងភ្នំពេញ។ នេះបើតាមការចុះផ្សាយរបស់កាសែតជប៉ុនឈ្មោះ Shimbun Akahata នៅថ្ងៃអាទិត្យទី៤ កុម្ភៈ។ ជាការឆ្លើយតបវិញ លោក Akira Koike បានចាត់ទុកការលើកឡើងរបស់លោក ទាវ វណ្ណុល ថាជាការរំលោភសិទ្ធិមនុស្សធ្ងនធ្ងរដែលមិនគួរកើតមាននៅកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងអំឡុងបំពេញទស្សនកិច្ចនៅក្នុងប្រទេសជប៉ុន លោក ទាវ វណ្ណុល ប្រធានគណបក្សភ្លើងទៀនបានជួបលោក Akira Koike អគ្គលេខាធិការបក្សកុម្មុយនីស្តជប៉ុន និងជាសមាជិកសភាក្នុងថ្ងៃទី៣ កុម្ភៈ។ នៅក្នុងជំនួប លោកទាវ វណ្ណុល ប្រាប់លោក Akira Koike ពីការដែលរដ្ឋាភិបាលកម្ពុជាបានដំឡើងកាម៉ារ៉ាឃ្លាំមើលនៅខាងមុខផ្ទះរបស់លោកក្នុងក្រុងភ្នំពេញ។ ទន្ទឹមគ្នានេះ មេបក្សភ្លើងទៀនក៏បានចោទរដ្ឋាភិបាលកម្ពុជាពីបទបានចាប់ឃុំខ្លួនមន្ត្រីបក្សប្រឆាំង និងពលរដ្ឋដែលរិះគន់រដ្ឋាភិបាលជាបន្តបន្ទាប់។
តាមការចុះផ្សាយរបស់កាសែតជប៉ុនឈ្មោះ Shimbun Akahata នៅថ្ងៃទី៤កុម្ភៈ អគ្គលេខាធិការបក្សកុម្មុយនីស្តជប៉ុននិងជាសមាជិកសភា បានប្រាប់មេបក្សប្រឆាំងនៅកម្ពុជាថា ការរំលោភសិទ្ធិមនុស្សធ្ងន់ធ្ងរមិនគួរកើតមាននៅកម្ពុជាទេ។ ក្រៅពីនេះ សេរីភាពនៃការបញ្ចេញមតិ និងការបោះឆ្នោតដោយសេរី ត្រឹមត្រូវ និងយុត្តិធម៌ជាមូលដ្ឋាននៃលទ្ធិប្រជាធិបតេយ្យ។ នេះជាការបន្ថែមរបស់លោក Akira Koike។
ការលើកឡើងរបស់លោក ទាវ វណ្ណុល ប្រាប់លោក Akira Koike ត្រូវបានក្រសួងមហាផ្ទៃតាមរយៈអ្នកនាំពាក្យរង លោក ទូច សុខៈ ច្រានចោលនៅថ្ងៃទី៥កុម្ភៈនេះ។ តាមលោក ទូច សុខៈ បើពិតជាមានករណីលួចដំឡើងកាំមេរ៉ាឃ្លាំមើលលោក ទាវ វណ្ណុល នៅផ្ទះគាត់ពិតមែន នោះលោក ទាវ វណ្ណុល ប្រាកដជាប្រកាសផ្សព្វផ្សាយរឿងនេះផ្លូវការ ឬ ដាក់ពាក្យបណ្ដឹងទៅកាន់អាជ្ញាធរបាត់ទៅហើយ។ ចំពោះលោក ទូច សុខៈ ការលើកឡើងដូចនេះរបស់លោក ទាវ វណ្ណុល គ្រាន់ជាការទាក់ទាញចំណាប់អារម្មណ៍ដើម្បីកេងចំណេញប្រយោជន៍នយោបាយតែប៉ុណ្ណោះ។
សូមជម្រាបថា ក្រៅពីជួបអគ្គលេខាធិការបក្សកុម្មុយនីស្តជប៉ុន និងជាសមាជិកសភា Akira Koike មេបក្សភ្លើងទៀនលោក ទាវ វណ្ណុលក៏បានតំណាងរាស្ត្រជប៉ុន អ្នកគាំទ្រ និងសារព័ត៌មានជាច្រើនក្នុងអំឡុងទស្សនកិច្ចនៅជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ