បោះឆ្នោតព្រឹទ្ធសភា៖សង្គមស៊ីវិល១ក្រុមអំពាវនាវឲ្យអង្គបោះឆ្នោតបក្សភ្លើងទៀនពហិការ តែបក្សប្រឆាំងថាគ្មានឥទ្ធិពល
នៅថ្ងៃទី០៨ ខែកុម្ភៈនេះ សង្គមស៊ីវិលចំនួន៥០ ដែលមាននិន្នាការគាំទ្រនយោបាយរដ្ឋាភិបាលដឹកនាំដោយគណបក្សប្រជាជន បានចេញសារអំពាវនាវមួយដល់អង្គបោះឆ្នោតគណបក្សភ្លើងទៀនឲ្យពិចារណាកុំទៅបោះឆ្នោតជ្រើសតាំងសមាជិកព្រឹទ្ធសភានាពេលខាងមុខ។ ប៉ុន្តែអតីតមេដឹកនាំគណបក្សភ្លើងទៀន បានហៅការអំពាវនាវនេះថាមិនមានឥទ្ធិពលលើអង្គបោះឆ្នោតរបស់គណបក្សប្រឆាំងឡើយ។
ចុះផ្សាយនៅថ្ងៃ៖
ស្តាប់
សហភាពអង្គការសង្គមស៊ីវិលគាំទ្ររដ្ឋាភិបាលរបស់គណបក្សប្រជាជនដែលអះអាងថាតំណាងឲ្យសង្គមស៊ីវិលចំនួន៥០ បានលើកហេតុផល ៣ចំណុចទាក់ទងនឹងការអំពាវនាវដល់អង្គបោះឆ្នោតគណបក្សភ្លើងទៀនឲ្យពិចារណាកុំទៅបោះឆ្នោតជ្រើសតាំងព្រឹទ្ធសភានីតិកាលទី៥ នៅថ្ងៃទី២៥ ខែកុម្ភៈខាងមុខ។
ចំណុចទី១ គឺគណបក្សភ្លើងទៀនបង្កើតវប្បធម៌អាក្រក់ដល់សង្គមជាតិ គឺវប្បធម៌បែកបាក់។ ចំណុចទី២ អង្គបោះឆ្នោតនឹងត្រូវដកចេញពីគណបក្ស ឬតំណែងក្រុមប្រឹក្សាឃុំ សង្កាត់របស់គណបក្សភ្លើងទៀន ប្រសិនបើពួកគេបោះឆ្នោតឲ្យគណបក្សឆន្ទៈខ្មែរ ឬបោះឆ្នោតឲ្យគណបក្សកម្លាំងជាតិ និងចំណុចទី ៣ ចុងក្រោយ មេដឹកនាំគណបក្សភ្លើងទៀនគិតតែប្រយោជន៍ផ្ទាល់ខ្លួន តាមរយៈការវាយប្រហារគ្នាដើម្បីអំណាច។
ក៏ប៉ុន្តែ លោក គីមសួរ ភីរិទ្ធ អតីតអ្នកនាំពាក្យគណបក្សភ្លើងទៀនបានប្រតិកម្មតបវិញថា ការអំពាវនាវរបស់អង្គការសង្គមស៊ីវិលទាំងនេះ ធ្វើឡើងគ្រាន់ជាការឃោសនាឲ្យគណបក្សដែលជាដៃគូប្រកួតប្រជែងធំរបស់គណបក្សប្រឆាំងតែប៉ុណ្ណោះ។ តាមលោក គីមសួរ ភីរិទ្ធ ការអំពាវនាវរបស់ក្រុមអង្គការទាំងនោះ មិនបានធ្វើឲ្យប៉ះពាល់ដល់អង្គបោះឆ្នោតរបស់គណបក្សភ្លើងទៀនទេ។
អតីតអ្នកតំណាងរាស្ត្របក្សប្រឆាំង ៤អាណត្តិរូបនេះបន្ថែមថា គណបក្សភ្លើងទៀនក៏ដូចជាគណបក្សឆន្ទៈខ្មែរផ្តល់ជាយោបល់ឲ្យក្រុមអង្គការសង្គមស៊ីវិលទាំងនេះ សម្លឹងមើលតួនាទីខ្លួនឯងថា តើការអំពាវនាវរបស់ខ្លួនអាចជាការញុះញង់នយោបាយធ្វើឲ្យគេមានការបែកបាក់ ឬយ៉ាងណា។
សូមរំលឹកថា កម្ពុជានឹងរៀបចំការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នៅថ្ងៃទី២៥ ខែកុម្ភៈ ឆ្នាំ២០២៤ ដោយមានគណបក្សចំនួន៤ ចុះឈ្មោះចូលរួមប្រកួតប្រជែង គឺគណបក្សប្រជាជនកម្ពុជាគណបក្សឆន្ទៈខ្មែរ គណបក្សកម្លាំងជាតិ និងគណបក្សហ្វុនស៊ិនប៉ិច។ យុទ្ធនាការឃោសនាបោះឆ្នោតព្រឹទ្ធសភាដែលមានរយៈពេល១៤ថ្ងៃ នឹងចាប់ផ្តើមពីថ្ងៃទី១០ ដល់ថ្ងៃទី២៣ ខែកុម្ភៈ ឆ្នាំ២០២៤។
គណបក្សភ្លើងទៀនដែលមានអង្គបោះឆ្នោតចំនួនជាង ២ពាន់នាក់មិនមានសិទ្ធិចូលរួមបោះឆ្នោតទេព្រោះខ្វះឯកសារចុះបញ្ជីគណបក្សច្បាប់ដើម។ តែបក្សប្រឆាំងមួយនេះបានជ្រើសរើសគណបក្សឆន្ទៈខ្មែរ ដែលស្ថិតនៅក្នុងសម្ព័ន្ធភាពជាមួយគ្នាជាតំណាងក្នុងការប្រកួតប្រជែងការបោះឆ្នោតអសកលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ