បក្សប្រឆាំងរិះគន់សេដ្ឋកិច្ចបច្ចុប្បន្ន តែបក្សកាន់អំណាចថាមានស្ថិរភាព
នៅក្នុងអំឡុងយុទ្ធនាការឃោសនារកសម្លេងគាំទ្រសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥នេះ គណបក្សឆន្ទៈខ្មែរ ដែលជាគណបក្សប្រឆាំងបានលើកឡើងថាសេដ្ឋកិច្ចកម្ពុជាមានកំណើនយឺតជាងគេធៀបនឹងប្រទេសនៅក្នុងតំបន់អាស៊ាន ក្នុងរយៈពេល៣០ឆ្នាំចុងក្រោយ។ តែគណបក្សកាន់អំណាចថាសេដ្ឋកិច្ចកម្ពុជាត្រូវបានធានានូវអត្រាកំណើនខ្ពស់ ប្រកបដោយចីរភាព និងបរិយាបន្ន។
ចុះផ្សាយនៅថ្ងៃ៖
ស្តាប់ - ០២:៣៤
លោកបណ្ឌិត សុខ ហាច ប្រធានគណបក្សឆន្ទៈខ្មែរ បានចាត់ទុកថាប្រទេសកម្ពុជាសព្វថ្ងៃកំពុងជួបប្រទះវិបត្តិសេដ្ឋកិច្ចធ្ងន់ធ្ងរ។ វិបត្តិទាំងនោះមានបញ្ហាបំណុល ទីផ្សារការងារ ចំណូលប្រជាពលរដ្ឋទាប។ ប្រធានគណបក្សប្រឆាំងដែលចូលរួមការបោះឆ្នោតព្រឹទ្ធសភានីតិកាលទី៥នេះ បានលើកយកវិស័យកសិកម្ម និងធារាសាស្ត្រមករំលេច ដូចជាកង្វះខាតទឹកនៅរដូវប្រាំង ទីផ្សារកសិផលតូច និងមិនមានភាពនឹងន។
មេដឹកនាំគណបក្សឆន្ទៈខ្មែរ ក៏បានរិះគន់ផងដែរដល់វិស័យឧស្សាហកម្ម និងកាត់ដេរដែលមានការធ្លាក់ចុះ។ តាមលោក សុខ ហាច ដើម្បីឲ្យវិស័យកាត់ដេរមានភាពប្រសើរលុះត្រាតែកម្ពុជាមានការគោរពសិទ្ធិមនុស្សនិងលទ្ធិប្រជាធិបតេយ្យ ព្រមទាំងទទួលបាននូវភាពអនុគ្រោះពន្ធពីអឺរ៉ុប(EBA) និងភាពអនុគ្រោះពន្ធពីអាមេរិក(GSP)។ លោកថា ដើម្បីឲ្យសេដ្ឋកិច្ចកម្ពុជាមានការប្រសើរឡើង លុះត្រាតែបញ្ហាដូចដែលគណបក្សឆន្ទៈខ្មែរលើកឡើងខាងលើត្រូវបានដោះស្រាយ។
ដោយឡែក លោក ប៉ុល លឹម បេក្ខជនសមាជិកព្រឹទ្ធសភាមកពីគណបក្សប្រជាជនកម្ពុជា មិនបានធ្វើការឆ្លើយតបអ្វីទេ នៅក្នុងអំឡុងយទ្ធនាការផ្សព្វផ្សាយតាមប្រព័ន្ធឃោសនានេះ គឺគ្រាន់តែលើកឡើងពីគោលនយោបាយរបស់គណបក្សលើវិស័យសេដ្ឋកិច្ចប៉ុណ្ណោះ។
តាមលោក ប៉ុល លឹម គណបក្សប្រជាជនបន្តធានាឲ្យបាននូវស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ រក្សាអត្រាអតិផរណាក្នុងកំរិតទាប ស្ថិរភាពអត្រាប្តូរប្រាក់ និងរក្សាតុល្យភាពថវិកាជាតិ។ គណបក្សកាន់អំណាចប្តេជ្ញានឹងបន្តធានាឲ្យបានកំណើនសេដ្ឋកិច្ចខ្ពស់នូវអត្រាមធ្យមប្រចាំឆ្នាំក្នុងរង្វង់៧% ប្រកបដោយចីរភាព និងបរិយាបន្ន ដើម្បីកាត់បន្ថយភាពក្រីក្រក្នុងអត្រាទាបជាង១០%។
លើសពីនេះ លោក ប៉ុល លឹម ក៏បានបញ្ជាក់ដែរថាគណបក្សប្រជាជននឹងជំរុញប្រភពកំណើនថ្មីរួមមានវិស័យកសិកម្ម ឧស្សាហកម្ម ពាណិជ្ជកម្ម សេវាកម្ម ការវិនិយោគ និងទេសចរណ៍ ព្រមទាំងបង្កើនសមត្ថភាពប្រកួតប្រជែង អភិវឌ្ឍន៍សហគ្រាសធុនតូច និងមធ្យម រួមនឹងគោលនយោបាយជំរុញសេដ្ឋកិច្ច ពាណិជ្ជកម្ម និងការការពារសិទ្ធិមនុស្សផងដែរ។
សូមបញ្ជាក់ថាប្រទេសកម្ពុជានឹងមានការបោះឆ្នោតជ្រើសតាំងសមាជិកព្រឹទ្ធសភានីតិកាលពី៥ នៅថ្ងៃទី២៥ ខែកុម្ភៈ ឆ្នាំ២០២៤នេះ ដោយមានគណបក្សចំនួន៤ចូលរួមប្រកួតប្រជែង គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សហ្វុនស៊ិនប៉ិច និងគណបក្សកម្លាំងជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ