លោកហ៊ុន ម៉ាណែត៖ចំណូលពន្ធគយធ្លាក់ចុះមិនមែនជាបញ្ហា ព្រោះពន្ធដារកើនឡើង
លោកហ៊ុន ម៉ាណែត នាយករដ្ឋមន្ដ្រីកម្ពុជាបានប្រកាសនៅថ្ងៃទី២ ខែឧសភា ឆ្នាំ២០២៤ នេះថា ទោះបីចំណូលពន្ធគយដែលបានពីការនាំចូលបានធ្លាក់ចុះក៏ដោយក៏មិនមែនជាបញ្ហាសម្រាប់កម្ពុជាដែរ។ មិនមែនជាបញ្ហា ព្រោះក្រុមហ៊ុន ឬរោងចក្រដែលបាននាំចូលទាំងនោះបានមកបើកដំណើរការផលិតនៅកម្ពុជាដោយបានបង្កើតការងារឲ្យពលរដ្ឋ និងនាំឱ្យពន្ធដារអាចប្រមូលពន្ធអាករបានវិញ។
ចុះផ្សាយនៅថ្ងៃ៖
ស្តាប់ - ០២:២៥
លោកហ៊ុន ម៉ាណែតបានថ្លែងដូចនេះនៅក្នុងកម្មវិធីសម្ពោធដាក់ឱ្យដំណើរការរោងចក្រដំឡើងរថយន្តតូយូតាដោយបញ្ជាក់ថា ចំណូលពន្ធគយធ្លាក់ចុះ តែពន្ធដារកើនឡើងដែលលោកបានប្រៀបដូចជាលុយចេញពីហោប៉ៅឆ្វេងចូលហោប៉ៅស្ដាំ។ តាមលោកហ៊ុន ម៉ាណែត ការបង្កើតរោងចក្រ ឬក្រុមហ៊ុនក្នុងស្រុក នឹងនាំឱ្យមានការងារដល់ពលរដ្ឋ និងចំណូលពន្ធដារសម្រាប់សេដ្ឋកិច្ចកម្ពុជា។ គួរជម្រាបថា នៅពេលមានការបង្កើតរោចក្រ ឬក្រុមហ៊ុនដែលផលិតក្នុងស្រុក គឺជាឱកាសសម្រាប់យកពន្ធអាករ ពិសេសពន្ធលើប្រាក់ចំណេញ និងពន្ធច្រើនមុខផ្សេងទៀតពីក្រុមហ៊ុន ឬរោងចក្រទាំងនោះ។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានថ្លែងនៅក្នុងវេទិកាផ្សព្វផ្សាយវិធានការសម្រួលពាណិជ្ជកម្មក្រោមដែនសមត្ថកិច្ចគយកាលពីចុងឆ្នាំ ២០២៣ ថា នាយកដ្ឋានគយបានបាត់ចំណូលពន្ធគយប្រមាណជាង ៤០០លានដុល្លារពីការនាំចូលសរុបក្នុងឆ្នាំ ២០២៣។ ការបាត់បង់ចំណូលពន្ធគយដ៏ច្រើនសន្ធឹកសន្ធាប់នេះដោយសារកម្ពុជាអនុវត្តពាណិជ្ជកម្មសេរីដូចជាពហុភាគី និងទ្វេភាគី។ ចំណែកអគ្គនាយកដ្ឋានពន្ធដារបានប្រកាសថា ការប្រមូលពន្ធក្នុងឆ្នាំ២០២៣មានទឹកប្រាក់ជាង ៣៦០០លានដុល្លារ ពោលកើន ៤,៤៩% ធៀបនឹងឆ្នាំ២០២២។
កំណើននេះត្រូវបានអគ្គនាយកពន្ធដារកម្ពុជាលោក គង់ វិបុលចាត់ទុកជាការរួមចំណែកអភិវឌ្ឍប្រទេសជាតិ។ ដោយឡែក លោកបណ្ឌិតគី សេរីវឌ្ឍន៍ អ្នកជំនាញសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជាយល់ថា ការធ្លាក់ចុះពន្ធគយ តែកើនពន្ធដារបង្ហាញឱ្យឃើញពីស្ថានភាពសេដ្ឋកិច្ចកម្ពុជាកើនឡើងជាងមុន តាមរយៈការកាត់បន្ថយការនាំចូល និងកើនឡើងការផលិតក្នុងស្រុក។ តែលោក គី សេរីវឌ្ឍន៍មិនភ្លេចបញ្ជាក់ថា ក្នុងរយៈពេលវែងនឹងជួយជំរុញសន្ទុះនៃការកំណើនសេដ្ឋកិច្ចឡើងវិញ។
គួររម្លឹកថាកាលពីថ្ងៃទី១៣ ខែកុម្ភៈ ឆ្នាំ២០២៣ រដ្ឋាភិបាលកម្ពុជាបានចេញអនុក្រឹត្យកាត់បន្ថយ ឬលុបបំបាត់ពន្ធគយសម្រាប់ទំនិញនាំចូលទាំងឡាយដែលមានដើមកំណើតមកពីប្រទេសអាស៊ានទាំង១០ និងជប៉ុន។ តែដើម្បីបំពេញការបាត់បង់ចំណូលពន្ធគយមួយនេះ រដ្ឋាភិបាលបានបង្កើនពន្ធអាករផ្សេង ពិសេសបន្ថែមលើផលិតផលមួយចំនួនដែលប៉ះពាល់ដល់បរិស្ថាន ឬសុខភាពពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ