កម្ពុជាបន្តពន្យល់ពីគម្រោងព្រែកជីកហ្វូណន និងច្រានចោលកង្វល់នានា
លោក ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជានៅបន្តចេញពន្យល់សាធារណជនពីគម្រោងព្រែកហ្វូណនបន្ថែមទៀត នៅថ្ងៃសៅរ៍នេះ ធ្វើឡើងនៅវិទ្យាស្ថានពហុច្ចេកវិទ្យា(តិចណូ)។ ការបន្តចេញមុខពន្យល់ពីគម្រោងនេះ ខណៈដែលគណៈកម្មាការទន្លេមេគង្គវៀតណាម នៅថ្ងៃទី០៣ ឧសភា បានបន្តស្នើឱ្យកម្ពុជាផ្តល់ព័ត៌មានលម្អិតពីគម្រោងព្រែកជីកនេះ និងជំរុញឱ្យមានកិច្ចសហការវាយតម្លៃពីផលប៉ះពាល់ និងស្វែងរកដំណោះស្រាយរួមគ្នា។
ចុះផ្សាយនៅថ្ងៃ៖
ស្តាប់ - ០២:៤៣
ក្នុងបទបង្ហាញដល់សិស្ស-និស្សិត នាព្រឹកថ្ងៃទី៤ ខែឧសភា ឆ្នាំ២០២៤នេះ លោក ស៊ុន ចាន់ថុល ឧបនាយករដ្ឋមន្ត្រី បានពន្យល់ទៅកាន់អ្នកទាំងឡាយដែលប្រឆាំងនឹងគម្រោងព្រែកជីករបស់កម្ពុជានោះថា គម្រោងនេះគឺបានប្រើពេលសិក្សាអស់រយៈពេល២៦ខែដោយមានអ្នកជំនាញ និងប្រើដ្រូនហោះពិនិត្យស្ថានភាពជាក់ស្តែង។
បើតាម លោក ស៊ុន ចាន់ថុល អ្នកដែលនិយាយថា ព្រែកជីកនេះធ្វើបាត់ទឹក ៥០ភាគរយហូរចូលសមុទ្រនោះ គឺអ្នកនិយាយទាំងនោះ មិនបានសិក្សាឱ្យបានច្បាស់លាស់ ទើបពួកគាត់មិនដឹង ប៉ុន្តែលោកថា អ្នកខ្លះទៀតបានដឹងហើយ តែនៅតែធ្វើមិនដឹង ទើបលោកនៅតែបន្តចេញមុខពន្យល់។ លោក ស៊ុន ចាន់ថុល បញ្ជាក់ថា ទឹកសាបដែលហូរចូលសមុទ្រតាមព្រែកជីកថ្មីនេះ មានកម្រិតត្រឹម ០.០៦ភាគរយប៉ុណ្ណោះ។
នៅថ្ងៃទី០៣ ឧសភា កាសែតក្នុងស្រុកវៀតណាម Vietnam Net បានរាយការណ៍ថា គណៈកម្មាការទន្លេមេគង្គវៀតណាមបានរៀបចំសិក្ខាសាលាមួយដើម្បីជជែកពីគម្រោងព្រែកជីកហ្វូណនរបស់កម្ពុជា។
សម្រាប់វៀតណាម គម្រោងព្រែកជីកនេះបង្កផលប៉ះពាល់ដល់លំហូរទឹកនៃទន្លេមេគង្គ និងការហូរទឹកប្រៃពីសមុទ្រចូលទន្លេដែលអាចជះផលអវិជ្ជមានខ្លាំងដល់ជីវិតរស់នៅរបស់ពលរដ្ឋតាមដីសណ្តទន្លេមេគង្គ និងប្រព័ន្ធអេកូឡូស៊ី ជាដើម។
ជុំវិញការស្នើរបស់វៀតណាមនេះ លោក ស៊ុន ចាន់ថុល បានថ្លែងនៅក្នុងសន្នីសីទសារព័ត៌មាននាព្រឹកថ្ងៃទី០៣ ឧសភានេះថា កម្ពុជាបានប្រគល់ឯកសារស្តីពីផលប៉ះពាល់ដល់គណៈកម្មាការទន្លេមេគង្គអន្តរជាតិ(MRC)រួចរាល់ហើយ។ ដូច្នេះវៀតណាមអាចស្នើគណៈកម្មាការទន្លេមេគង្គអន្តរជាតិដើម្បីពិនិត្យមើលឯកសារទាំងនោះបាន។
នៅថ្ងៃទី៣ឧសភា ដដែល លោក ស៊ុន ចាន់ថុល ក៏បានប្រាប់ទៅលោក Paul Clement ប្រធានសភាពាណិជ្ជកម្មអន្តរជាតិ នៃកម្ពុជា(IBC) ថាគម្រោងព្រែកជីករបស់កម្ពុជានេះ ពុំមានផលប៉ះពាល់អវិជ្ជមានដល់បរិស្ថានកម្ពុជា និងប្រទេសជិតខាងនោះទេ។ ផ្ទុយទៅវិញ បើតាមមន្ត្រីជាន់ខ្ពស់កម្ពុជារូបនេះ គម្រោងព្រែកជីក បានផ្តល់អត្ថប្រយោជន៍ដល់សកលលោកទាំងមូល ដោយបានចូលរួមកាត់បន្ថយការបំភាយឧស្ម័នផ្ទះកញ្ចក់ ទៅក្នុងបរិយាកាសដោយសារចម្ងាយ ការធ្វើនាវាចរណ៍ មានរយៈចម្ងាយខ្លីជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ