កម្ពុជានៅចំពោះមុខការលេចឡើងនៃមេរោគកូវីដ១៩បំប្លែងខ្លួន «អូមីក្រុង»
ចុះផ្សាយនៅថ្ងៃ៖
ស្តាប់ - ០៤:៥៥
ទើបតែលេចមុខឡើងមែនពិត តែមេរោគកូវីដ១៩បំប្លែងខ្លួនប្រភេទថ្មី ឈ្មោះ «អូមីក្រុង» បានបង្កជាក្ដីបារម្ភយ៉ាងខ្លាំងដល់ប្រទេសទាំងអស់ នៅទូទាំងពិភពលោក។ ជាបន្តបន្ទាប់ ប្រទេសនានាបានដាក់ចេញវិធានការរឹតបន្តឹង ដើម្បីបង្ការការឆ្លងរាលដាលនៃមេរោគកូវីដ១៩ អូមីក្រុង ចូលមកប្រទេសរបស់ខ្លួន។ ចំណែកអង្គការសុខភាពពិភពលោកប្រចាំកម្ពុជាវិញ ក៏បានប្រាប់ឲ្យកម្ពុជាត្រៀមខ្លួន និងកែតម្រូវវិធានការឆ្លើយតបចំពោះវត្តមាននៃមេរោគកូវីដ១៩បំប្លែងថ្មីនេះផងដែរ។
កាលពីចុងសប្ដាហ៍កន្លងទៅនេះ វិបត្តិជំងឺកូវីដ១៩ ដែលបានបង្ហាញសញ្ញាធូរស្រាលឡើងវិញទៅហើយនោះ ស្រាប់តែរំកិលមួយរំពេចមកដល់មាត់ជ្រោះសារជាថ្មី។ នោះក៏ព្រោះតែពិភពលោករកឃើញមេរោគកូវីដ១៩បំប្លែងខ្លួនថ្មី ដែលមានអត្តសញ្ញាណ B.1.1.529 ឬហៅដោយខ្លីថា «អូមីក្រុង»។ អង្គការសុខភាពពិភពលោក បានដាក់មេរោគកូវីដ១៩បំប្លែងខ្លួនថ្មី ឈ្មោះ អូមីក្រុង នេះ ទៅក្នុងបញ្ជីមេរោគបំប្លែងខ្លួន «គួរឲ្យព្រួយបារម្ភ» នៅថ្ងៃទី២៦វិច្ឆិកា ដោយបញ្ជាក់ថា អូមីក្រុង មានចំនួនបំប្លែងខ្លួនច្រើនមែនទែន។ ពោល គឺមិនតិចជាង៣០ដងទេ បើធៀបទៅនឹងមេរោគកូវីដ១៩បំប្លែងខ្លួន «ដែលតា» ដែលមានចំនួនតែ២ដងប៉ុណ្ណោះ។ ការណ៍នេះ នាំឲ្យគេបារម្ភថា មេរោគកូវីដ១៩បំប្លែងខ្លួន អូមីក្រុង អាចនឹងមានអត្រាឆ្លងលឿនរហ័ស និងបង្កគ្រោះថ្នាក់ខ្លាំងដល់សុខភាពនិងជីវិតមនុស្ស។ មួយវិញទៀត អ្នកវិទ្យាសាស្ត្រ នៅមិនទាន់ដឹងអំពីប្រសិទ្ធភាពវ៉ាក់សាំងចំពោះវីរុសបំប្លែងខ្លួនថ្មីនេះទេ។
បើទោះបីជារហូតមកទល់ពេលនេះ គេនៅមិនទាន់មានការសិក្សាបែបវិទ្យាសាស្ត្រយ៉ាងលម្អិតអំពីមេរោគបំប្លែងខ្លួន អូមីក្រុង ក៏ដោយ ក៏គេកត់សម្គាល់ឃើញថា ប្រទេសជាច្រើននៅលើសកលលោក ចាប់ផ្ដើមដាក់ចេញនូវវិធានការបង្ការភ្លាមៗ ធ្វើយ៉ាងណាទប់ឲ្យជាប់ កុំឲ្យមេរោគកូវីដ១៩បំប្លែងខ្លួន អូមីក្រុង ដែលមានប្រភពពីតំបន់អាហ្វ្រិកខាងត្បូងនេះ ចូលទៅក្នុងប្រទេសរបស់ខ្លួនបាន។
សហភាពអឺរ៉ុប បានដាក់ចេញនូវវិធានការហាមឃាត់និងពិនិត្យយ៉ាងតឹងតែងជាទីបំផុត ចំពោះអ្នកដំណើរដែលមកពីតំបន់អាហ្វ្រិកខាងត្បូង ខណៈដែលមេរោគកូវីដ១៩បំប្លែងខ្លួន អូមីក្រុង នេះ បានចល័តទៅដល់ប្រទេសនៅអឺរ៉ុបទៅហើយ។ ចំណែកអាមេរិក កាណាដា អូស្ត្រាលី រុស្ស៊ី និងប្រេស៊ីលវិញ ក៏បានហាមឃាត់ការធ្វើដំណើរពីប្រទេសនៅតំបន់អាហ្វ្រិកខាងត្បូងដែរ។ រីឯអ៊ីស្រាអែលវិញ ដាក់ចេញវិធានការកាន់តែតឹងតែងថែមទៀត គឺបិទខ្ទប់ការធ្វើដំណើរពីបរទេសទាំងស្រុងតែម្ដង។ ដោយឡែក ប្រទេសថៃក្បែរខាងកម្ពុជា បានសម្រេចហាមឃាត់ការហោះហើរពីប្រទេសនៅតំបន់អាហ្វ្រិកខាងត្បូង ចាប់ពីខែធ្នូខាងមុខតទៅ។
នៅកម្ពុជា កាលពីយប់ថ្ងៃសៅរ៍ទី២៧វិច្ឆិកា អង្គការសុខភាពពិភពលោកប្រចាំកម្ពុជា ក្រើនរំឭកដល់កម្ពុជា ឲ្យត្រៀមខ្លួនសម្រាប់ការកើនឡើងជាគំហុក ជាយថាហេតុ នូវករណីជំងឺកូវីដ១៩។ លោកស្រីវេជ្ជបណ្ឌិត លី អាយឡាន ប្រធានអង្គការសុខភាពពិភពលោកប្រចាំកម្ពុជា សង្កត់ធ្ងន់ថា កម្ពុជាគួរតែបារម្ភពីវីរុសបំប្លែងខ្លួនថ្មី អូមីក្រុង ដែលទើបរកឃើញនេះ បើទោះបីជាកម្ពុជា សម្រេចបានអត្រាចាក់វ៉ាក់សាំងកូវីដ១៩ខ្ពស់ក៏ដោយ។ និងថា បុគ្គលគ្រប់រូប គួរតែត្រៀមខ្លួនសម្រាប់ការកើនឡើងជាគំហុកជាយថាហេតុ នៃករណីជំងឺកូវីដ១៩ យើងគួរតែបន្តរៀនសូត្រ និងកែតម្រូវវិធានការឆ្លើយតបផងដែរ។
មែនទែនទៅ កម្ពុជាមិនបានបិទភ្នែក បិទច្រមុះ មិនអើពើចំពោះការវិវដ្តនេះទេ។ ក្រសួងសុខាភិបាលកម្ពុជា បានចេញមុខព្រមានពីហានិភ័យនៃមេរោគកូវីដ១៩បំប្លែងខ្លួនថ្មី ឈ្មោះ អូមីក្រុង នេះ តាមរយៈសេចក្ដីប្រកាសព័ត៌មានមួយ។ ចំណែកអ្នកនាំពាក្យក្រសួងសុខាភិបាល ក៏បានថ្លែងសារពន្យល់យ៉ាងក្បោះក្បាយអំពីមេរោគប្រភេទថ្មីនេះដែរ ដោយថែមទាំងបានបញ្ជាក់ទៀតថា លទ្ធភាពដែលអាចឆ្លង អូមីក្រុង គឺប្រាកដជាមាន ព្រោះតែចរាចរណ៍អ្នកដំណើរចេញចូលកម្ពុជា។ ក្នុងដំណាក់កាលនេះ លោកស្រីប្រកាសថា ក្រសួងសុខាភិបាលនឹងរឹតបន្តឹងវិធានការសុខាភិបាល និងធ្វើតេស្តឲ្យបានហ្មត់ចត់ចំពោះអ្នកដំណើរដែលចូលមកស្រុកខ្មែរ ទាំងតាមផ្លូវគោក ផ្លូវទឹក និងផ្លូវអាកាស។
យ៉ាងណាក៏ដោយ វិធានការនេះ បើប្រៀបធៀបទៅនឹងប្រទេសដទៃទៀត ឃើញថា នៅមានលក្ខណៈធូរស្រាលនៅឡើយ។ តើកម្ពុជាត្រូវដាក់ចេញនូវវិធានការឆ្លើយតបយ៉ាងណាបន្ថែមទៀត នៅចំពោះមុខការលេចឡើងនៃមេរោគកូវីដ១៩បំប្លែងខ្លួនថ្មី ឈ្មោះ «អូមីក្រុង»? នេះគឺជាសំណួរដ៏លំបាក ដែលតម្រូវឲ្យរដ្ឋាភិបាលកម្ពុជាគិតគូរ ពិនិត្យពិច័យ និងវាយតម្លៃឲ្យបានហ្មត់ចត់ មុននឹងអាចឆ្លើយនឹងសំណួរនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ