អាការៈអូទីហ្សឹម(Autism) កំពុងក្លាយជាកង្វល់សម្រាប់ឪពុកម្ដាយគ្រប់រូបនៅកម្ពុជា និងនិយាយដោយឡែកសម្រាប់ឪពុកម្ដាយដែលមានកើតអូទីហ្សឹមរួចទៅហើយ។ សម្រាប់អ្នកដែលមានកូនកើតអូទីហ្សឹមអ្នកជំនាញផ្នែកនេះលើកទឹកចិត្តឲ្យឪពុក-ម្ដាយ ងើបឈរឡើងប្រែក្លាយវិបត្តិទៅជាឱកាសប្រសើរជាងគេចវេសពីការពិតនិងបន្ទោសលើព្រហ្មលិខិត។ ចំណែកឪពុកម្ដាយដែលមិនទាន់មានកូនកើតអាការៈអូទីហ្សឹម ត្រូវតែចំណាយពេលវេលានៅជាមួយកូនឲ្យបានច្រើនតាមដែលអាចធ្វើទៅបាន និងតាមដានការវិវត្តន៍របស់កូនឲ្យបានជាប់លាប់។
លោកស្រី កែវ ពិសី ចាប់ផ្ដើមជួយកូនស្រីនៅពេលនាងមានអាយុ៧ឆ្នាំបន្ទាប់ពីគាត់ចំណាយពេលបាក់ទឹកចិត្តអស់រយៈពេល២ឆ្នាំក្រោយដឹងថា យូអ៊ីកើតមានអាការៈអូទីហ្សឹម«ដំបូងខ្ញុំអត់ទាន់ស្គាល់ថា អូទីហ្សឹមហ្នឹងជាអីទេ តែក្រោយមកខ្ញុំចាប់ផ្ដើមស្រាវជ្រាវឯកសារ ក៏ផ្ដើមរកមូលហេតុថា ហេតុអ្វីបានជាកុមារកើតមានអូទីហ្សឹម? តែយ៉ាងណាក៏ដោយមូលហេតុពិតនៃអូទីហ្សឹមគេអត់ទាន់រកឃើញទេ អ៊ីចឹងខ្ញុំក៏អត់ទាន់ដឹងដែរថា កូនខ្ញុំកើតអូទីហ្សឹមដោយសារអ្វី?»
ពីដំបូងឡើយក្រោយដឹងថា យូអ៊ីនាងកើតមានអាការៈអូទីហ្សឹមលោកស្រីពិសី ខូចចិត្តមិនតិចឡើយ«ខ្ញុំ ខូចចិត្តខ្លាំងក្នុងនាមជាម្ដាយម្នាក់ ហើយពិបាកមែនទែនគាត់(កូន)អត់មានទំនាក់ទំនងអីសោះ រស់នៅក្នុងពិភពរបស់គាត់តែឯង កាច ឆេវឆាវ ធ្វើបាបខ្លួនឯងតាមរយៈការវាយដំលើរាងកាយ ដល់ឃើញបែបហ្នឹងយើងធ្លាក់ទឹកចិត្តកាន់តែខ្លាំង។»
បន្ទាប់ពីខូចចិត្តនិងបាក់ទឹកចិត្តរយៈពេល២ ឆ្នាំលោកស្រីពិសីចាប់ផ្ដើមងើបឈរឡើងប្រឆាំងនឹងអូទីហ្សឹមដោយផ្ដើមចេញពីការលើកទឹកចិត្តខ្លួនឯងមុន«ខ្ញុំចាប់ផ្ដើមស្រាវជ្រាវ ខ្ញុំចាប់ផ្ដើមរកវិធីជួយកូន ហើយចុះឈ្មោះចូលរៀនជាមួយអង្គការនានាពីវិធីសាស្ត្របង្រៀនកូន កូនក៏មានភាពល្អប្រសើរបន្តិចម្ដងបន្តិចម្ដងខ្ញុំក៏មានសង្ឃឹម មានកម្លាំងចិត្ត ថាកូនខ្ញុំនឹងបានប្រសើរនៅថ្ងៃក្រោយ។»
កម្លាំងចិត្តមួយទៀតដែលលោកស្រីពិសីទទួលបាននោះគឺសម្លឹងមើលពិភពលោកខាងក្រៅដែលសូម្បីតែបុគ្គលល្បីៗមួយចំនួនក៏ធ្លាប់ឆ្លងកាត់អាការៈអូទីហ្សឹម«ខ្ញុំចាប់ផ្ដើមស្រាវជ្រាវលើមនុស្សល្បីៗជាច្រើនលើពិភពលោកដែលគាត់ធ្លាប់ជាកុមារអូទីហ្សឹមពីមុនមកដូចជាៈអាល់បឺតអេនស្ទេន (Albert Einstein) ប្រធានាធិបតីអាមេរិកម្នាក់ក៏ធ្លាប់មានសញ្ញាអូទីហ្សឹមដែរ កាលពីតូច ហើយបើទោះបីជាអ្វីដែលខ្ញុំដឹងនិងស្រាវជ្រាវនេះមិនអាចជួយកូនខ្ញុំបានទាំងស្រុង អាចជួយកុមារផ្សេងទៀតបានដែរតាមរយៈការចែករំលែកបទពិសោធន៍ខ្ញុំកន្លងមក។»
ក្រៅពីអ្នកជំនាញ បេសកម្មសង្គ្រោះកុមារអូទីហ្សឹម ផ្ដើមចេញពីមនុស្សគ្រប់រូបពិសេសមនុស្សក្នុងរង្វង់គ្រួសារ«មិនថាម្ដាយឬឪពុកទេសូម្បីតែជីដូនជីតាក៏ដោយ យើងត្រូវរួមគ្នាដើម្បីជួយកុមារអូទីហ្សឹមហ្នឹង។ ចំណែកឪពុកទោះបីជាមេគ្រួសារក៏ដោយក៏ត្រូវចូលរួមដែរ ពេលទំនេរពីការងារ ព្រោះអីកូនវាត្រូវការទំនាក់ទំនងទាំងអស់ពីគ្រួសារ។»
បន្ទាប់ពីទទួលបានការថែទាំពីម្ដាយនិងក្រុមគ្រួសារទាំងមូលដោយចិត្តទុកដាក់ក្នុងរយៈពេល៦ឆ្នាំមកនេះយូអ៊ីបានផ្លាស់ប្ដូរឥរិយាបថរឹងរូសមកស្ដាប់បង្គាប់។ នេះជាផ្នែកមួយនៃការរាប់បញ្ចូលការប្រែក្លាយវិបត្តិទៅជាឱកាសសម្រាប់លោកស្រីពិសី ហើយឱកាសមួយទៀតដែលលោកស្រីពិសីរាប់បញ្ចូលដែរនោះគឺការបង្កើតទំព័រហ្វេសបុកចែករំលែកថែរក្សាកុមារអូទីហ្សឹមក្រោមឈ្មោះថា U E Khmer Autism។«ពេលខ្ញុំបង្កើតផេកនេះឡើង ខ្ញុំក៏បានបង្ហាញសម្ភារៈសម្រាប់កូនរៀន ក៏មានការចាប់អារម្មណ៍ពីឪពុកម្ដាយមួយចំនួនខ្ញុំក៏បង្កើតសម្ភារៈទាំងនោះសម្រាប់លក់តែម្ដងទៅ ហើយឪពុកម្ដាយខ្លះគាត់ក៏ផ្ញើកូនគាត់ឲ្យមករៀនជាមួយខ្ញុំ នេះជាផ្នែកមួយជួយខ្ញុំរកចំណូលបានពីនេះ ជំនួសការងារខ្ញុំដែលបាត់បង់។»
សុំកុំភ្លេចថា កុមារដែលមានអាការៈអូទីហ្សឹមហើយពួកគេត្រូវរស់នៅជាមួយអូទីហ្សឹមរៀងរហូត។ ក៏ប៉ុន្តែនៅពេលដែលឪពុកម្ដាយមានកូនកើតអូទីហ្សឹមហើយ កុំទម្លាក់កំហុសលើព្រហ្មលិខិត ឬជំនឿផលកម្ម។ នេះជាការផ្ដាំផ្ញើរបស់លោក ចាន់ សារិន ប្រធានអង្គការជំនួយនៃក្ដីសង្ឃឹមសម្រាប់សហគមន៍។ ជំនួសឲ្យការបាក់ទឹកចិត្តប្រែក្លាយវិបត្តិទៅជាយុទ្ធសាស្ត្រ«សូម្បីតែខ្ញុំពិការជើងម្ខាងតាំងពីអាយុ៣ឆ្នាំ អង្គុយលើតែរទេះផង ខ្ញុំនៅអត់ជឿលើកម្មផល ហើយគេមើលងាយសព្វគ្រប់ ដូច្នេះឪពុកម្ដាយមួយចំនួនពេលគាត់ជួបបញ្ហាសូមប្ដូរវាមកជាយុទ្ធសាស្ត្រមក កុំទុករឿងហ្នឹងនៅក្នុងចិត្តនាំឲ្យគាត់ស្ត្រេសទៅជាការបង្កើតបញ្ហាផ្សេងទៀត។»
ទោះបីជាជនរងគ្រោះខំរើបម្រះពីបញ្ហាអូទីហ្សឹមយ៉ាងណាក៏ដោយ តែពួកគេគេចមិនផុតពីការរើសអើងឡើយ។ ការរើសអើងកើតមានគ្រប់រូបភាពនៅក្នុងសង្គមទោះបីជាដឹងថា គ្រួសារមួយកំពុងមានវិបត្តិដោយសារកូនកើតអូទីហ្សឹមក៏សង្គមមិនលើកលែងដែរ«ដោយសារភាពរើសអើងក្នុងសង្គម ឪពុកម្ដាយមួយចំនួនអត់ចង់បញ្ចេញអត្តសញ្ញាណកូនគាត់ទេ ហើយពេលដែលឪពុកម្ដាយដទៃ ឃើញអាកប្បកិរិយាកូនយើងមានបញ្ហា គាត់រើសអើង គាត់មើល គាត់ពេបជ្រាយ ធ្វើឲ្យយើងដែលជាឪពុកម្ដាយកុមារអូទីហ្សឹមហ្នឹងពាល់អារម្មណ៍ពេលនាំកូនចេញក្រៅ។»
គេវិភាគលើបីចំណុចដើម្បីឲ្យដឹងថា កុមារមានផ្ទុកអូទីហ្សឹម។ បីចំណុចនោះរួមមាន៖ទំនាក់ទំនងសង្គម ការប្រើប្រាស់ភាសា អាកប្បកិរិយា។ នៅចំពោះមុខការកើនឡើងនៃអាការៈអូទីហ្សឹមនៅកម្ពុជាទោះបីជាមិនទាន់មានការស្រាវជ្រាវមកបញ្ជាក់ក៏ដោយ តែឪពុកម្ដាយដែលមានកូនកើតអូទីហ្សឹមស្នើឲ្យរដ្ឋាភិបាលយកចិត្តទុកដាក់ឲ្យបានទ្វេដងតាមរយៈការទ្រទ្រង់ផ្នែកថវិកា និងបណ្ដុះបណ្ដាលអ្នកជំនាញបង្រៀនផ្នែកនេះ។ បើតាមអ្នកជំនាញលក្ខណៈពិសេសរបស់កុមារអូទីហ្សឹមគេចូលចិត្តសិក្សាពីជំនាញកសិកម្ម បច្ចេកវិទ្យា និងសិល្បៈតូរ្យតន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ