ស្ត្រីម្នាក់មានវិប្បដិសារីប្រៀបដូចជាយកថ្នាំពុលឲ្យកូនផឹកបន្ទាប់ពីជ្រើសរើសម្សៅទឹកដោះគោខុស
ចុះផ្សាយនៅថ្ងៃ៖
ស្តាប់ - ០៩:៥០
ប្រទេសកម្ពុជាកំពុងប្រារព្ធទិវាសប្ដាហ៍បំបៅដោះកូនដោយទឹកដោះម្ដាយឆ្នាំ២០២១ ចាប់ពីថ្ងៃទី១ដល់ថ្ងៃទី៧សីហា។ នៅកម្ពុជាការបំបៅដោះកូនដោយទឹកដោះម្ដាយនៅតែជាបច្ចុប្បន្នភាព នៃការជម្រុញទៅកាន់គ្រួសារទាំងមូលជាពិសេសស្ត្រីឲ្យយកចិត្តទុកដាក់លើភាពចាំបាច់នៃទឹកដោះ។ បើតាមអ្នកជំនាញ ភាពសម្បូរបែបនៃម្សៅទឹកដោះគោជម្រុញឲ្យស្ត្រីមើលរំលងការបំបៅដោះកូនដោយទឹកដោះ។ លើសពីនេះទៀតកត្តាជីវភាព និងបញ្ហាសុខភាពផ្ទាល់ខ្លួន ក៏បង្ខំឲ្យស្ត្រីបោះបង់ចោលប្រយោជន៍នៃទឹកដោះសម្រាប់ទារកដែរ។ ស្ត្រីម្នាក់ក្នុងចំណោមពីរនាក់ដែលវិទ្យុបារាំងបានជួបសម្ភាសមានវិប្បដិសារីប្រៀបដូចជាយកថ្នាំពុលឲ្យកូនផឹកបន្ទាប់ពីជ្រើសរើសម្សៅទឹកដោះគោខុស។ ផ្ទុយមកវិញសម្រាប់ស្ត្រីម្នាក់ទៀតដែលព្យាយាមបំបៅដោះកូនដោយទឹកដោះរយៈពេលមួយឆ្នាំបង្ហាញមោទកភាពចំពោះភាពរឹងមាំរបស់កូន។
នៅក្នុងវ័យ៣១ឆ្នាំអ្នកនាង ជា សុគន្ធារី ដែលទើបសម្រាលកូនប្រុសទី២បានជិត១សប្ដាហ៍នៅក្នុងខែសីហានេះបង្ហាញក្ដីសោកសង្រេងបន្ទាប់ពីជ្រើសរើសម្សៅដោះគោខុសសម្រាប់បំបៅដោះកូនជំនួសឲ្យការបំបៅដោះ។«ខ្ញុំធ្លាប់មានបទពិសោធន៍ឲ្យកូនទី១បៅដោះគោ គេក៏មានបញ្ហាខ្វះជាតិដែក និងខ្វះគ្រាប់ឈាមខ្លាំងដោយសាររើសដោះគោខុស។ បច្ចុប្បន្ននេះកូនទី២ ដែលទើបសម្រាលខ្ញុំព្យាយាមបំបៅដោះគាត់(កូន)ឲ្យបានច្រើនកុំឲ្យប៉ះពាល់ដូចកាលកូនទី១។ កាលពីកូនទី១ហ្នឹងខ្ញុំមិនមានទឹកដោះគ្រប់គ្រាន់សម្រាប់ផ្ដល់ឲ្យកូន ហើយពេលហ្នុងខ្ញុំខ្លួនឯងក៏មិនព្រមព្យាយាមបន្ថែមទៀតក៏សម្រេចទិញម្សៅដោះគោឲ្យកូនបៅជំនួស។»
គ្រប់ម្សៅដោះគោមិនមែនសុទ្ធតែមិនល្អ! តែវានឹងជះផលអាក្រក់ បើអ្នកម្ដាយជ្រើសរើសផលិតផលដោះគោយកមកប្រើដោយគ្រាន់តែភាពពេញនិយមតាមគ្នា។ និយាយដោយមិនលាក់លៀមអ្នកនាង ជា សុគន្ធារី បានលើកឡើងទាំងសំឡេងខ្សឹបខ្សួរអួលដើមកថា នាងជឿលើការឃោសនារបស់តារាខ្មែរមួយចំនួនផ្សព្វផ្សាយពាណិជ្ជកម្មលើម៉ាក់ម្សៅដោះគោមួយប្រភេទ ទើបបន្សល់ទុកភាពសៅហ្មងដល់ឥលូវនៅចំពោះមុខកូនប្រុសទី១អាយុ២ឆ្នាំ។«ខ្ញុំគិតថា កូនតារាគេនៅប្រើដោះគោម៉ាក់ហ្នឹងបាន រឿងអីយើងមិនហ៊ានប្រើតាមគេ។ កាលហ្នឹងពេលកូនអឹម(បៅដោះគោ)អ៊ីចឹង! កូនកន្ទ្រាក់ដៃ កន្ទ្រាក់ជើង មុខមាត់អត់ស្អាត ដកដង្ហើមខុសពីគេ ដែលទាំងអស់នេះ យើងអត់ដឹងថា កូនកំពុងតែរងគ្រោះដោយសារម្សៅទឹកដោះគោសោះ។ ពេលដឹងមូលហេតុខ្ញុំបន្ទោសខ្លួនឯងដូចជា យកថ្នាំពុលឲ្យកូនផឹកអ៊ីចឹង! ពេលចូលពេទ្យម្ដងៗកូនខ្ញុំចាក់ម្ជុលតាមដៃមិនចូលបែរជាចាក់តាមសសៃរជើងទៅវិញ។»
បច្ចុប្បន្នកូនប្រុសទី១របស់អ្នកនាងជា សុគន្ធារី មានភាពល្អប្រសើរបន្តិចតែមិនទាន់រឹងមាំទាំងស្រុងឡើយ។«តាំងពីដឹងមូលហេតុថា កូនឈឺដោយសារដោះគោមក ខ្ញុំក៏ចាប់ផ្ដើមដូរទឹកដោះគោ ហើយផ្ដល់អាហាររូបត្ថម្ភបន្ថែម និងតាមដានសុខភាពជាមួយពេទ្យនៅរៀងរាល់ខែ។ តែយ៉ាងណាគេមិនទាន់រឹងមាំទាំងស្រុងទេដើរក្នុងដំណើរមួយទន់ អត់សូវមាំទាំដូចកូនគេដទៃ។»
បទពិសោធន៍លើកទី១បានបង្រៀនអ្នកម្ដាយរូបនេះ អត់ធ្មត់ក្នុងការបំបៅដោះកូនទី២ ដោយយកចិត្តទុកដាក់។ ការបំបៅដោះកូនត្រូវបានកំណត់នៅក្នុងបរិមាណស្តង់ដា៦ខែ តែរយៈពេលនេះអាចលំបាកសម្រាប់អ្នកម្ដាយគ្រប់រូបដែលបំពេញការងារតាមវិស័យឯកជន ក្រុមហ៊ុន ជាដើម។«ខ្ញុំក៏បានគិតពីបញ្ហាហ្នឹងដែរថា បន្ទាប់ពីសម្រាកមាតុភាព៣ខែ តើខ្ញុំត្រូវប្ដូរការងារដើម្បីឲ្យបាននៅជិតកូនមានពេលបំបៅដោះគេឲ្យបានគ្រប់គ្រាន់ឬយ៉ាងណា? ព្រោះខ្ញុំអត់ចង់មានវិប្បដិសារីដូចកូនទី១ទេ។»
បូមទឹកដោះទុកជាវិធីសាស្ត្រមួយ ដែលអ្នកម្ដាយសម័យថ្មីអនុវត្ត ខណៈដែលខ្លួនត្រូវចេញមកធ្វើការបន្ទាប់ពីចប់មាតុភាព។ នេះជាទម្លាប់របស់ អ្នកនាង ទេ រ័ត្ននីរ៉ា វ័យ២៩ឆ្នាំដែលបានព្យាយាមបំបៅដោះកូនបានរយៈពេល១ឆ្នាំនិងបន្តបំបៅរហូតដល់កូនតូចមានអាយុ២ឆ្នាំ។«បំបៅដោះកូនមួយឆ្នាំមកនេះ គឺមានភាពលំបាកច្រើនដែរ តែត្រូវទាមទារឲ្យយើងព្យាយាមនិងអត់ធ្មត់។ ពេលខ្ញុំទៅធ្វើការខ្ញុំត្រូវងើបពីព្រលឹមដើម្បីបូមទឹកដោះទុកឲ្យកូនបៅ ហើយត្រឡប់មកពីធ្វើការវិញយើងត្រូវបូមទឹកដោះជាថ្មីទៀត សរុបមកសកម្មភាពនេះវាធ្វើឲ្យយើងហត់ ធម្មតាពេលយើងចេញមកធ្វើការទឹកដោះលែងសូវចេញដូចមុនហើយ អ៊ីចឹងហើយបានជាទាមទារឲ្យខ្លួនយើងគ្រប់គ្រងខ្លួនឯងឲ្យបានល្អទាំងរបបអាហារ អារម្មណ៍ផ្លូវចិត្ត លំហាត់ប្រាណជាដើមហ្នឹង!»
បើតាមនីរ៉ា ទម្លាប់ប្រចាំថ្ងៃបំបៅដោះកូនដោយទឹកដោះ មិនបានប៉ះពាល់ដល់ការងាររបស់នាងទេ។«ការបន្តបំបៅដោះកូនវាមិនប៉ះពាល់រហូតដល់ធ្វើឲ្យយើងមិនអាចមកធ្វើការបាននោះទេព្រោះសម័យនេះបច្ចេកទេសយើងទំនើបជាពិសេសការបូមទឹកដោះទុកនេះឯង។» ភាពជោគជ័យដែលព្យាយាមបំបៅដោះកូនមួយឆ្នាំមកនេះ អ្នកនាង ទេ រ័ត្ននីរ៉ា កត់សម្គាល់ឃើញថា កូនមានភាពរឹងមាំ ការលូតលាស់របស់កូនត្រូវតាមស្តង់ដា សុខភាពរបស់គេមួយឆ្នាំមកនេះមិនឈឺថ្កាត់នោះទេ។
នៅកម្ពុជាការបំបៅដោះកូនដោយទឹកដោះម្ដាយតាំងពីកើតរហូតដល់អាយុ៦ខែ ធ្លាប់ទទួលបានជោគជ័យម្ដងហើយដែលមានអត្រាពី១១ភាគរយដល់ជាង៧០ភាគរយនៅចន្លោះឆ្នាំ២០០០ដល់ឆ្នាំ២០១០។ ដោយមើលឃើញពីកំណើនៃការបំបៅដោះកូនដោយទឹកដោះមានការកើនឡើងគួរឲ្យកត់សម្គាល់ ការប្រារព្ធសប្ដាហ៍ពិភពលោកបំបៅដោះកូនដោយទឹកដោះម្ដាយត្រូវបានបញ្ឈប់នៅឆ្នាំ២០១០ ប៉ុន្តែផ្ទុយមកវិញ ការប្រារព្ធសប្ដាហ៍ពិភពលោកបំបៅដោះកូនដោយទឹកដោះម្ដាយបានត្រឡប់មកជាថ្មីនៅឆ្នាំ២០១៥ ក្រោយរបាយការណ៍មួយក្នុងឆ្នាំ២០១៤បង្ហាញថា ការបំបៅដោះកូនដោយទឹកដោះម្ដាយតែមួយមុខបានធ្លាក់ចុះ ហើយការប្រើប្រាស់ផលិតផលទឹកដោះគោមានការកើនឡើងទៅវិញ។
បើតាមអ្នកជំនាញ គេមិនអាចបន្ទោសលើស្ត្រីស្រុងបានទេអំពីភាពខ្វះចន្លោះនៃការបំបៅដោះកូន។ ក្រៅពីភាពសម្បូរបែបនៃផលិតផលម្សៅទឹកដោះគោ ស្ត្រីជាម្ដាយអាចជួបប្រទះនឹងបញ្ហាសុខភាពខ្វះការលើកទឹកចិត្តពីក្រុមគ្រួសារក្នុងការបំបៅដោះកូននិងកត្តាជីវភាពជាដើម។ លោក ហ៊ូ ក្រើន នាយករងនៃអង្គការហេឡែន ខេលល័រ អន្តរជាតិប្រចាំកម្ពុជាលើកឡើងថា «ការជម្រុញពីគ្រួសារ កន្លងមកយើងធ្លាប់គិតថា ការបំបៅដោះកូនជាផ្ដាច់មុខរបស់ម្ដាយ ប៉ុន្តែផ្អែកតាមការសិក្សាស្ត្រីជាម្ដាយត្រូវការកម្លាំងចិត្ត ពីប្ដី ពីម្ដាយ ម្ដាយក្មេកជាដើម។ ហើយភាពសម្បូរបែបនៃការផ្សព្វផ្សាយម្សៅដោះគោហ្នឹង ធ្វើឲ្យគេយល់ច្រឡំច្រើនណាស់អំពីគុណតម្លៃល្អឥតខ្ចោះនៃម្សៅទឹកដោះគោ។ ចុងក្រោយគឺជាកត្តាជីវភាពជាហេតុធ្វើឲ្យស្ត្រីមិនអាចបំបៅដោះកូនឲ្យបានពេញលេញដោយត្រូវបង្ខំចិត្តឡើងមកធ្វើការឬចំណាកស្រុករកការធ្វើនៅក្រៅប្រទេស។»
លោក រឿន ភារិន ដែលមានភរិយាកំពុងពពោះបានលើកឡើងថា«ខ្ញុំតែងតែជម្រុញទៅប្រពន្ធខ្ញុំឲ្យគាត់បំបៅដោះកូនដោយទឹកដោះត្រឹមរយៈពេលបីខែ ទម្រាំគាត់ចូលធ្វើការវិញ។ ខ្ញុំធ្លាប់មើលក្មួយឃើញថា ពេលគេបៅដោះម្ដាយត្រឹមតែ៦ខែ គេមាំមួន អត់សូវឈឺ ហើយមើលទៅរហ័សរហួន។ ចំណែកប្រពន្ធខ្ញុំមើលទៅគាត់រឹងមាំស្រាប់ សុខភាពក៏ល្អ ហើយប្រភេទឈាមគាត់ក៏ល្អទៀត វារឹតតែជាកត្តាជម្រុញឲ្យខ្ញុំចង់ឲ្យគាត់បំបៅដោះកូនដោយទឹកដោះខ្លាំងណាស់។»
ការសិក្សាអន្តរជាតិថ្មីមួយទៀត ក្នុងប្រទេសចំនួន១៦៤ បានបង្ហាញថា ការបំបៅកូនដោយទឹកដោះម្តាយ អាចបញ្ចៀសមរណភាពកុមារក្រោមអាយុ៥ឆ្នាំ បាន ៨២៣០០០នាក់ ក្នុងមួយឆ្នាំៗនៅលើពិភពលោក និង អាចបញ្ចៀសជំងឺឆ្លងកុមារជាច្រើនមុខ។ មិនតែប៉ុណ្ណោះការបំបៅដោះកូន អាចជួយកាត់បន្ថយគ្រោះមរណៈរបស់មាតាពីជំងឺមហារីកដោះ បានដល់ទៅពីរម៉ឺននាក់ក្នុងមួយឆ្នាំៗ។ ដូច្នេះមានមូលហេតុ១០យ៉ាងដែលស្ត្រីគួរបំបៅដោះកូន។
សូមជម្រាបជូនថា ការបំបៅដោះកូនដោយទឹកដោះម្ដាយនឹងជួយសន្សំសំចៃប្រព័ន្ធសុខាភិបាលកម្ពុជារហូតដល់៥លានដុល្លារនិងជួយសន្សំសំចៃការចំណាយក្នុងគ្រួសារ១០៧លានដុល្លារក្នុងមួយឆ្នាំដែលជាតម្លៃ នៃការទិញផលិតផលទឹកដោះគោ សម្រាប់ទារកដែលមិនបៅទឹកដោះម្ដាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ