ម៉ូលីយែរ បិតាហាសនាដកម្មបារាំងនាសតវត្សរ៍ទី ១៧ មានឥទ្ធិពលជ្រួតជ្រាប មិនថា នៅក្នុងសង្រ្គមអក្សរសិល្បិ៍បារាំង ឬបរទេស រហូតធ្វើឲ្យភាសាបារាំង ត្រូវគេដាក់ឈ្មោះថា ជាភាសាម៉ូលីយែរ។ កវីម៉ូលីយែរបានបាត់បង់ជីវិត ទៅមែន ប៉ុន្តែ នៅរយៈពេលជាង៣០០ឆ្នាំមកនេះ ស្នាដៃរបស់លោកម៉ូលីយែរ មិនចេះសាបសូន្យ និងផ្ទុយទៅវិញត្រូវបានគេបកប្រែ យកទៅដំឡើងសម្រាប់ការសំដែងរឿងល្ខោន ក្នុងប្រទេសជាច្រើន ជាពិសេសតាមបណ្តាប្រទេសនិយាយភាសាបារាំង។ នៅក្នុងឱកាសខួប ៤០០ឆ្នាំ របស់ម៉ូលីយ៉ែរ ដែលចាប់កំណើតនៅទីក្រុងប៉ារីស ថ្ងៃទី១៥ មិថុនា ១៦២២ វិទ្យុបារាំងអន្តរជាតិ បានរៀបចំអត្ថបទ កម្រងឯកសារ និងវីដេអូជាច្រើន ជាមួយសាក្ខីកម្មរបស់អ្នកជំនាញ បារាំង លោកMatrial Poirson។
៤សតវត្សរ៍កន្លងផុតទៅ។ ស្នាដៃអក្សរសិល្បិ៍របស់កវីម៉ូលីយែរដែលជាភាពរុងរឿងរបស់ជាតិបារាំងនៅតែបច្ចុប្បន្នភាព។ តើអ្នកណាម្នាក់ដែលមិនល្បីស្គាល់ស្នាដៃរឿងល្ខោនណាមួយរបស់កវីនិពន្ធដ៏ឆ្នើមមានទេពកោសល្យលេចធ្លោរូបនេះ? មានលក្ខណៈកំប្លុកកំប្លែង ប៉ុន្តែ តិះដៀល ស្នាដៃនិពន្ធរបស់បិតាហាសនាដកម្មបារាំងប្រចាំសតវត្សរ៍ទី១៧ លាតត្រដាងពីការស្រេកឃ្លានសេរីភាព គំនិតងើបបះបោរ ប្រឆាំង រាល់ជនផ្តាច់ការ ភាពលាក់ពុតត្បុត និងជាពិសេស ប្រឆាំងនឹងក្រុមមនុស្សដ៏មានអំណាច ដូចជាឪពុក ប្តី មនុស្សក្លែងបន្លំ។
ដើម្បីស្វែងយល់ច្បាស់ពីវណ្ណកម្ម ភាពល្បីល្បាញរបស់ម៉ូលីយែរ ដែលមានឈ្មោះដើមហៅថា ហ្សង់បាទីស ប៉ូកឺឡាំង វិទ្យុបារាំងអន្តរជាតិបានស្វែងរកសក្ខីកម្មពីលោកMartial Poirson ដែលជាសាស្ត្រាចារ្យផ្នែកប្រវត្តិសាស្រ្តវប្បធម៌ និងជាអ្នកសរសេររឿងល្ខោន។ លើសពីនោះ លោកMartial Poirson ក៏ជាអ្នកទទួលខុសត្រូវ ពិព័រណ៌នៅរាជវាំងវ៉ែរសៃ Versailles ដែលមានឈ្មោះថា Molière, la fabrique d’une gloire nationale។
ម៉ូលីយែរ គ្មានព្រំដែន
កេរ្តិ៍ដំណែលរបស់ម៉ូលីយែរមាននៅពាសពេញពិភពលោក។ ស្នាដៃរឿងល្ខោនរបស់លោកត្រូវបានគេយកទៅបកប្រែ និងសំដែង នៅតាមប្រទេសជាច្រើន។ តាមលោក Martial Poirson ដែលជាអ្នករៀបចំ សន្និសីទឈ្មោះថា ម៉ូលីយែរ គ្មានព្រំដែន នៅ រោងល្ខោន Montansier នៅរាជវាំងវ៉ែរសៃ Versailles ម៉ូលីយែរជាកវីនិពន្ធនិយាយភាសាបារាំងដ៏ល្បីជាងគេនៅក្នុងពិភពលោក។ នៅអាហ្វ្រិក ក៏ដូចជានៅអាមេរិក ចិន ព័រទុយហ្កាល់ រុស្ស៊ី កម្ពុជា វៀតណាម វណ្ណកម្មរបស់ម៉ូលីយែរត្រូវបានគេបកប្រែ និងយកទៅដំឡើងសំដែង ដែលសមស្របនឹងស្ថានភាព វប្បធម៌ប្រទេសរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ