«សម្បុរស» ត្រូវបានអ្នកដែលវិទ្យុបារាំងRFIជួបសម្ភាស ទទួលស្គាល់ថាជា ស្តង់ដារនៃភាពស្រស់ស្អាត ក្នុងក្រសែភ្នែកមនុស្សភាគច្រើនក្នុងសង្គមកម្ពុជា។ នៅចំពោះមុខនេះ ពួកគេកត់សម្គាល់ដែរថា ការប្រើប្រាស់ឡេដើម្បីប្ដូរពណ៌ស្បែកឲ្យស កំពុងតែមានភាពនិយម ខណៈផលិតផលឬឡេធ្វើឲ្យស្បែកសជាច្រើនម៉ាកកំពុងតែវាយលុយនៅក្នុងទីផ្សារ។ ស្របពេលជាមួយគ្នានេះ វេជ្ជបណ្ឌិតផ្នែកសើស្បែកបានគូសបញ្ជាក់ថា ចំនួនអ្នកកើតជំងឺសើស្បែកដោយការប្រើប្រាស់ឡេ មានសន្ទុះកើនឡើងគួរឲ្យបារម្ភនារយៈពេលចុងក្រោយនេះ។
