ការស្គាល់តិចតួចជនជាតិអាស៊ីនៅក្នុងប្រទេសបារាំងជាហេតុផលចំបងដែលធ្វើឲ្យសារមន្ទីរប្រវត្តិសាស្រ្តអន្តោប្រវេសន៍នៅទីក្រុងប៉ារីសរៀបចំការតាំងពិព័រណ៌បង្ហាញ រូបថត ឯកសារ វត្ថុបុរាណ និងសម្ភារៈមួយចំនួន ដើម្បីបើកភ្នែកឲ្យគេស្គាល់ប្រភព និងអត្តសញ្ញាណជនជាតិអាស៊ីនៅក្នុងប្រទេសបារាំង។ ពិព័រណ៌ដែលមានឈ្មោះថា Immigrations Est et Sud-Est Asiatiques depuis 1860 បង្ហាញពីលំហូរជនអន្តោប្រវេសន៍អាស៊ីខាងកើត និងអាស៊ីខាងត្បូងនៅក្នុងប្រទេសបារាំងចាប់តាំងពីឆ្នាំ១៨៦០។ ប្រវត្តិជនអន្តោប្រវេសន៍អាស៊ីខាងកើត និងអាស៊ីខាងត្បូងនៅបារាំង អាចជារឿងចាស់ផង និងរឿងថ្មីផង។ សព្វថ្ងៃនេះ ជនអន្តោប្រវេសន៍អាស៊ីទាំងនេះ ដែលមានដើមកំណើរមកពីប្រទេសកម្ពុជា វៀតណាម ចិន ឡាវ កូរ៉េ ថៃ និងហ្វីលីពីន តំណាង៦%នៃប្រជាជនអន្តោប្រវេសន៍នៅបារាំង។ ដោយផ្តោតទៅលើដំណើរហូរចូលជនអន្តោប្រវេសន៍នៅបារាំង នៅក្នុងរយៈពេល១៥០ឆ្នាំមកនេះ ពិព័រណ៌ បង្ហាញភស្តុតាងដានរបស់ជនជាតិខ្មែរ ចិន វៀតណាមដែលត្រូវបារាំងដឹកបញ្ជូនមកជួយច្បាំងនៅក្នុងសង្រ្គាមលោកទាំងពីរ។ ពិព័រណ៌ សារមន្ទីជាតិប្រវត្តិសាស្រ្តអន្តោប្រវេសន៍ ដែលស្ថិតនៅសង្កាត់ទី១២ក្នុងទីក្រុងប៉ារីសប្រព្រឹត្តទៅ ចាប់ពីថ្ងៃទីទី១០តុលារហូតដល់ថ្ងៃទី១៨កុម្ភៈឆ្នាំ២០២៤។
