សមិទ្ធិករភាពយន្តបារាំងលោកPhilippe Freling នាំយកភាពយន្តឯកសារទាក់ទងភូមិសាស្ត្រឥណ្ឌូចិនមកចាក់បញ្ចាំងក្នុងប្រទេសកម្ពុជានាឱកាសខួប៧០ឆ្នាំនៃទិវាបុណ្យឯកជាតិ។ រឿងទាំងនោះមានចំណងជើងថា ឥណ្ឌូចិនសង្គ្រាមជប៉ុនដែលចែកជាពីរភាគ (ភាគ ទី១ សត្វចចកក្នុងហ្វូងចៀម ភាគទី២ផែនដីឆាបឆេះក្នុងភ្លើងសង្គ្រាម) ហើយបន្ទាប់មកទៀតរឿងក្រោមចំណងជើងថា ឥណ្ឌូចិនពេលស្ត្រីចូលធ្វើសង្គ្រាម។ រឿងទាំងនេះចាក់បញ្ចាំងនៅថ្ងៃទី១០-១១ខែវិច្ឆិកា នៅវិទ្យាស្ថានបារាំងក្នុងម៉ោងពេលដែលបានកំណត់ដោយវិទ្យាស្ថានបារាំង(institutfrancais-cambodge.com)។ សមិទ្ធិករភាពយន្តបារាំងលោកPhilippe Freling បានគូសបញ្ជាក់ថា មូលហេតុដែលលោកផលិតរឿងទាក់ទងភូមិសាស្ត្រនៅឥណ្ឌូចិនព្រោះចង់ឲ្យគេស្គាល់ប្រទេសកម្ពុជាឲ្យបានច្រើនព្រោះនៅពេលនិយាយពីសង្គ្រាមឥណ្ឌូចិនគេស្គាល់វៀតណាមជាងកម្ពុជា។
