ស្ថិតនៅកណ្តាលទន្លេមេគង្គទល់មុខក្រុងក្រចេះសម្រស់កោះទ្រង់អន្ទងចិត្តអ្នកដំណើរពីចំងាយនិងទេសចរបរទេសចូលទស្សនាមិនថា ដំណើរកំសាន្តខ្លីឬវែងនោះទេ។ ដើម្បីទៅដល់ជង្រុកក្រូចថ្លុងកោះទ្រង់ត្រូវចំណាយលុយ១ពាន់រៀលជិះទូកដចម្លង។ ក្រោយរំកិលខ្លួនឡើងលើទូកដអ្នកដំណើរនឹងទាក់ភ្នែកជាមួយទេសភាពចម្រុះ ផ្ទៃទឹករេរាំ ទូកនេសាទសំចតនៅច្រាំងម្ខាង ឆ្នេរខ្សាច់របស់កោះព័ទ្ធដោយលំហរទឹក។ រីឯនៅមុខផ្ទះប្រជាពលរដ្ឋពីដើមផ្លូវរហូតចុងភូមិសុទ្ធតែមានដើមក្រូចដែលមានផ្លែសំយុងចុះក្រោម។ បើតាមអ្នកដាំដុះក្រូចថ្លុងកោះទ្រង់ជាដំណាំពេញនិយមមិនដែលជោរជន់លើទីផ្សារជាមួយរសជាតិមួយគ្មានពីរនៅកម្ពុជាទន់និងផ្អែម។
