ក្រោយដាក់ឲ្យដំណើរការក្នុងឆ្នាំ២០១៨ យុវជនភូមិភាគឦសានភាគច្រើនបន្តការសិក្សានៅសកលវិទ្យាល័យក្រចេះជំនួសឲ្យការឡើងមករៀននៅភ្នំពេញ។ ស្ថិតលើដីអតីតព្រលានយន្តហោះជំនាន់សង្គមរាស្ត្រនិយម នៃបណ្ដោយផ្លូវជាតិលេខ៧ ភូមិស្រែស្ដៅ សង្កាត់អូឬស្សី ក្រុងក្រចេះ សកលវិទ្យាល័យមួយនេះបណ្ដុះបណ្ដាលលើជំនាញកសិកម្ម-សហគមន៍ ពាណិជ្ជកម្ម-សហគ្រិនភាព និងរដ្ឋបាលសាធារណៈ។ ក្នុងចំណោមជំនាញទាំងបីសិស្សនិស្សិតរើសជំនាញកសិកម្មច្រើន ដោយសាររដ្ឋាភិបាលកំពុងដំណើរការជ្រើសរើសមន្ត្រីកសិកម្មឃុំ។ ជាមួយគ្នានេះយុវជនភូមិភាគឦសានគេក៏បានបង្ហាញក្ដីសុបិន្តចង់ក្លាយជាមន្ត្រីកសិកម្មដែរ ស្របពេលក្រសួងក៏លើកទឹកចិត្តឲ្យពួកគេខិតខំពីឥឡូវ។
