អាជ្ញាធរនិងពលរដ្ឋមួយចំនួនរស់នៅក្រុងព្រះសីហនុបានលើកឡើងស្រដៀងគ្នាថា សកម្មភាពសេដ្ឋកិច្ចក្នុងក្រុងផ្ដើមរើបឡើងបន្តិច បន្ទាប់ពីការបោះឆ្នោតជាតិកាលពីខែកក្កដាឆ្នាំ២០២៣។ ការងើបឡើងនៃសេដ្ឋកិច្ចស្ដែងតាមរយៈការផ្តើមជួសជុលឡើងវិញនូវសំណង់អគារជាប់គាំងមួយចំនួននិងការចូលចតរបស់នាវាធំៗនៅកំពង់ផែខេត្តប្រមាណជា២០លើកក្នុងឆ្នាំ២០២៣។ អាជ្ញាធរក្រុងព្រះសីហនុបង្ហាញក្ដីរំពឹងថា ២០២៤ អាចជាការរស់ឡើងវិញនៃសំណង់អគារជាប់គាំងក្នុងព្រះសីហនុ នៅក្រោមយន្តការអនុគ្រោះរបស់រដ្ឋាភិបាលទៅកាន់អ្នកវិនិយោគ។
