Oumuamua ៖ បំណែកមកពីក្រៅប្រព័ន្ធព្រះអាទិត្យ
ចុះផ្សាយនៅថ្ងៃ៖
ស្តាប់ - ០៨:១៤
នៅសប្តាហ៍នេះ សេង ឌីណា សូមលើកឡើង អំពីអាថ៌កំបាំងជុំវិញបំណែកដ៏ចម្លែកមួយ ដែលមកពីក្រៅប្រព័ន្ធព្រះអាទិត្យ ដែលគេបានរកឃើញ កាលពីឆ្នាំ២០១៧ ហើយដែលគេឲ្យឈ្មោះថា "Oumuamua"។
នៅថ្ងៃទី១៩ ខែតុលា ឆ្នាំ២០១៧ តាមរយៈការសង្កេតដោយតេឡេស្កុប Pan-STARRS នៅហាវ៉ៃ តារាវិទូបានរកឃើញវត្ថុថ្មីមួយហោះកាត់ក្នុងចន្លោះ រវាងគន្លងផែនដី និងភពអង្គារ។ កាលពីដំបូង អ្នកវិទ្យាសាស្រ្តគិតថា អ្វីដែលគេទើបនឹងរកឃើញថ្មីនេះ គឺជាបំណែកអាចម៍ផ្កាយ ហើយក៏បានដាក់ឈ្មោះទៅតាមស្តង់ដាឈ្មោះរបស់អាចម៍ផ្កាយ (1I/2017 U1)។
ក៏ប៉ុន្តែក្រោយមក ក្រោយពីបានសិក្សាលម្អិតដោយប្រើតេឡេស្កុបជាច្រើនផ្សេងទៀត ក្នុងនោះរួមមានទាំងតេឡេស្កុបអវកាសហឺបលផង អ្នកវិទ្យាសាស្រ្តក៏បានរកឃើញថា បំណែកដែលគេទើបនឹងរកឃើញថ្មីនេះមានលក្ខណៈដ៏ចម្លែក គឺមានទម្រង់ជាអាចម៍ផ្កាយក៏មិនចំជាអាចម៍ផ្កាយ ផ្កាយដុះកន្ទុយក៏មិនចំជាផ្កាយដុះកន្ទុយ។ ពិសេសជាងនេះទៅទៀត គេក៏បានគណនាឃើញផងដែរថា គន្លងរបស់វាបញ្ជាក់យ៉ាងច្បាស់ថា វាមិនមែនជាបំណែកដែលស្ថិតនៅក្នុងប្រព័ន្ធព្រះអាទិត្យរបស់យើងនោះទេ តែមានប្រភពមកពីកន្លែងផ្សេង។
នៅពេលនោះហើយ ដែលគេបានសម្រេចដាក់ឈ្មោះថ្មី ហើយដោយសារតែបំណែកនេះត្រូវបានរកឃើញដោយតេឡេស្កុបនៅហាវ៉ៃ គេក៏បានដាក់ឈ្មោះទៅតាមភាសារបស់អ្នកស្រុកហាវ៉ៃ គឺ អ៊ូមូអាមូអា (Oumuamua) ដែលមានន័យថា « អ្នកនាំសារដែលមកពីឆ្ងាយ »។
មកទល់នឹងពេលនេះ គេដឹងបានត្រឹមតែថា អ៊ូមូអាមូអានេះ គឺជាវត្ថុមកពីក្រៅប្រព័ន្ធព្រះអាទិត្យតែប៉ុណ្ណោះ ក៏ប៉ុន្តែ គេនៅតែមិនទាន់ដឹងច្បាស់នៅឡើយទេថា តើវាជាអ្វីពិតប្រាកដ? ហើយមានលក្ខណៈដ៏ចម្លែកមួយទៀត ដែលធ្វើឲ្យអ្នកវិទ្យាសាស្រ្ត នៅមានយោបល់ខ្វែងគ្នានៅឡើយ គឺចម្លែកត្រង់ថា អ៊ូមូអាមូអានេះ នៅពេលធ្វើដំណើរចេញពីព្រះអាទិត្យទៅ វាមានល្បឿនកើនឡើងហួសពីអ្វីដែលគេព្យាករ ទៅតាមគោលការណ៍នៃកម្លាំងទំនាញ ហើយរហូតមកទល់នឹងពេលនេះ អ្នកវិទ្យាសាស្រ្តនៅតែមិនទាន់អាចកំណត់បាននៅឡើយថា តើមានអ្វី ដែលធ្វើឲ្យអ៊ូមូអាមូអាអាចបង្កើនល្បឿនបានបែបនេះ?
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ