តើគេអាចរកឃើញភពក្រៅប្រព័ន្ធព្រះអាទិត្យដោយរបៀបណា?
ចុះផ្សាយនៅថ្ងៃ៖
ស្តាប់ - ០៩:០១
នៅសប្តាហ៍នេះ សេង ឌីណា សូមលើកឡើង អំពីការស្វែងរកភពក្រៅប្រព័ន្ធព្រះអាទិត្យ ជាពិសេស អំពីតេឡេស្កុបអវកាសកេព្ល័រ (Kepler Space Telescope) ដែលជាតេឡេស្កុបជំនាញខាងប្រមាញ់រកភពក្រៅប្រព័ន្ធព្រះអាទិត្យ។
នៅក្នុងការសិក្សាទៅលើចក្រវាល ដើម្បីឆ្លើយទៅនឹងសំណួរថា តើនៅក្នុងចក្រវាលនេះមានតែយើង ឬក៏អាចមានជីវិតនៅកន្លែងផ្សេងទៀត អ្នកវិទ្យាសាស្រ្តផ្តោតការសិក្សាលើចំណុចដ៏ចម្បងមួយ គឺការស្វែងរកភពក្រៅប្រព័ន្ធព្រះអាទិត្យ ដែលគេហៅតាមភាសាអង់គ្លេសថា « Exoplanet » ជាពិសេស គឺស្វែងរកភពដែលអាចមានលក្ខខណ្ឌអំណោយផលដល់ជីវិត។
នៅឆ្នាំ១៩៩៥ គេបានរកឃើញភពក្រៅប្រព័ន្ធព្រះអាទិត្យជាលើកដំបូង។ ភពនេះត្រូវបានរកឃើញដោយ តារាវិទូស្វីសពីររូប គឺលោក មីស្ហែល ម៉ាយ៉រ (Michel Mayor) និងឌីដ្យេ កេឡូស (Didier Queloz) តាមរយៈការសង្កេតដោយប្រើតេឡេស្កុប Haute-Provence Observatory ស្ថិតនៅប៉ែកខាងត្បូងប្រទេសបារាំង។
ភពក្រៅប្រព័ន្ធអាទិត្យដែលគេទើបរកឃើញនេះត្រូវបានគេដាក់ឈ្មោះថា 51 Pegasi b Pegasi b ជាប្រភេទភពឧស្ម័ន វិលជុំវិញផ្កាយមួយដួងដែលមានទីតាំងស្ថិតនៅក្នុងបណ្តុំផ្កាយសេះ ឬ Pegasus ហើយ51 ស្ថិតនៅចម្ងាយប្រមាណជា ៥០ឆ្នាំពន្លឺ។
នៅថ្ងៃទី៦ ខែមីនា ឆ្នាំ២០០៩ រ៉ុកកែតអវកាសធុន Delta II ត្រូវបានគេបាញ់បង្ហោះចេញពីមជ្ឈមណ្ឌលអវកាស នៅ Cape Canaveral រដ្ឋផ្លូរីដា។ នៅផ្ទុកពីលើរ៉ុកកែតនោះ គឺតេឡេស្កុបអវកាសកេព្ល័រ (Kepler Space Telescope) ហើយបេសកកម្មចម្បងរបស់វា គឺតាមសង្កេតមើលជាប់ជាប្រចាំនូវតំបន់ដ៏តូចមួយប៉ុណ្ណោះ ក្នុងកាឡាក់ស៊ីមីលីវេ តែជាតំបន់ ដែលប្រមូលផ្តុំទៅដោយផ្កាយប្រមាណជា ១៥ម៉ឺនដួង ស្រដៀងនឹងព្រះអាទិត្យរបស់យើង។
នៅក្នុងរយៈពេលជាង ៩ឆ្នាំ ចាប់តាំងពីពេលបាញ់បង្ហោះនៅឆ្នាំ២០០៩ រហូតដល់អស់ថាមពលលែងដំណើរការ ហើយត្រូវបញ្ចប់បេសកកម្មជាស្ថាពរ នៅឆ្នាំ២០១៨កន្លងទៅ តេឡេស្កុបអវកាសកេព្ល័របានរកឃើញភពក្រៅប្រព័ន្ធព្រះអាទិត្យ រហូតដល់ទៅជាង ២៦០០ ដោយជាប្រភេទភពចម្រុះ គឺទាំងប្រភេទភពឧស្ម័ន ដូចជា ភពព្រហស្បតិ៍ និងទាំងភពសិលាស្រដៀងនឹងផែនដី ដោយក្នុងចំណោមនោះ ក៏រួមមានផងដែរ ភពដែលស្ថិតក្នុងតំបន់ ដែលអាចមានអំណោយផលដល់ជីវិត ដែលគេហៅតាមភាសាអង់គ្លេសថា Habitable Zone៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ