តើមានភពក្រៅប្រព័ន្ធព្រះអាទិត្យប៉ុន្មានដែលគេបានរកឃើញ?
ចុះផ្សាយនៅថ្ងៃ៖
ស្តាប់ - ០៧:៤៩
នៅសប្តាហ៍នេះ សេង ឌីណា សូមលើកឡើង អំពីចំនួននៃភពក្រៅប្រព័ន្ធព្រះអាទិត្យ ដែលគេបានរកឃើញ ព្រមទាំងលក្ខណៈពិសេសនៃភពអស់ទាំងនោះ ធៀបនឹងភពក្នុងប្រព័ន្ធព្រះអាទិត្យរបស់យើង។
ចាប់តាំងពីពេលដែលភពក្រៅប្រព័ន្ធព្រះអាទិត្យត្រូវបានគេរកឃើញជាលើកដំបូង កាលពីឆ្នាំ១៩៩៥ រហូតមកទល់នឹងសព្វថ្ងៃនេះ អ្នកវិទ្យាសាស្រ្តបានរកឃើញភពក្រៅប្រព័ន្ធព្រះអាទិត្យ ចំនួនជាង ៤៣០០ ដែលគេអាចបញ្ជាក់បានច្បាស់លាស់ថាពិតជាភព និងជាង ៥ពាន់ផ្សេងទៀត កំពុងរង់ចាំការសិក្សាលម្អិតបន្ថែម។
ជាទូទៅ ភពក្រៅប្រព័ន្ធព្រះអាទិត្យដែលមានលក្ខណៈចម្រុះខុសប្លែកៗគ្នាអស់ទាំងនេះត្រូវបានគេបែងចែកទៅជា ៤ប្រភេទខុសៗគ្នា។
១-ភព « ស្រដៀងនឹងណិបទូន » ឬ « Neptune-Like »
ភពប្រភេទនេះ គឺជាភព ដែលមានទំហំ ម៉ាស់ និងធាតុផ្សំ ស្រដៀងគ្នាទៅនឹងភពណិបទូន និងអ៊ុយរ៉ានុស នៅក្នុងប្រព័ន្ធព្រះអាទិត្យរបស់យើង ពោលគឺជាភព ដែលអាចមានស្នូលប៉ែកខាងក្នុងជាសិលា ក៏ប៉ុន្តែ ស្រទាប់ខាងលើជាឧស្ម័ន និងទឹកកក ហើយដែលពេលខ្លះ គេតែងហៅជាភាសាអង់គ្លេស « Ice Giant »។
២-ភពឧស្ម័ន ឬ « Gas Giant »
ជាភពដែលមានម៉ាស់ និងទំហំយ៉ាងធំសម្បើមៗ ហើយមានធាតុផ្សំចម្បងជាអ៊ីដ្រូសែន និងអេលីយ៉ូម ពោលគឺ មានលក្ខណៈស្រដៀងគ្នាទៅនឹងភពព្រហស្បតិ៍ និងភពសៅរ៍ នៅក្នុងប្រព័ន្ធព្រះអាទិត្យរបស់យើង។
ក៏ប៉ុន្តែ ខុសពីភពឧស្ម័នក្នុងប្រព័ន្ធព្រះអាទិត្យរបស់យើង ដែលស្ថិតនៅប៉ែកខាងក្រៅ ឆ្ងាយពីព្រះអាទិត្យ ភពឧស្ម័ន ដែលគេរកឃើញក្រៅប្រព័ន្ធព្រះអាទិត្យ មានខ្លះស្ថិតនៅយ៉ាងកៀកបំផុតទៅនឹងផ្កាយរបស់វា ហើយដែលគេប្រសិទ្ធនាមតាមភាសាអង់គ្លេសថា « Hot Jupiter »។
៣-ភព « Super Earth »
ឈ្មោះថា Super Earth នេះ គឺគេមិនសំដៅលើលក្ខណៈស្រដៀងនឹងភពផែនដីរបស់យើងនោះទេ ក៏ប៉ុន្តែ សំដៅលើភពដែលមានទំហំធំជាងផែនដី ក៏ប៉ុន្តែ តូចជាងភពណិបទូន។ ភពប្រភេទនេះ មានម៉ាស់ធំជាងផែនដី ចាប់ពី ២ដង ទៅ ១០ដង អាចមានធាតុផ្សំជាសិលា ឬជាឧស្ម័ន ឬធាតុផ្សំទាំងពីរនៅជាមួយគ្នា ជាប្រភេទភព ដែលមិនមាននៅក្នុងប្រព័ន្ធព្រះអាទិត្យរបស់យើង ក៏ប៉ុន្តែ នៅក្នុងចំណោមភពក្រៅប្រព័ន្ធព្រះអាទិត្យ គឺមានច្រើន ប្រហាក់ប្រហែលនឹងប្រភេទភពឧស្ម័ន (Gas Giant)។
ដោយសារតែភពប្រភេទនេះមិនមាននៅក្នុងប្រព័ន្ធព្រះអាទិត្យរបស់យើង ប្រភេទភព Super Earth នេះ នៅតែមានអាថ៌កំបាំងជាច្រើន ដែលអ្នកវិទ្យាសាស្រ្តនៅមិនទាន់យល់ច្បាស់។ ក៏ប៉ុន្តែ គេដឹងបានថា ភពប្រភេទ Super Earth គឺជាប្រភេទភព ដែលអាចស្ថិតក្នុងតំបន់ដែលមានអំណោយផលដល់ជីវិត (Habitable Zone)។
៤-ភពសិលា
ស្រដៀងនឹងភពទាំង ៤ នៅប៉ែកខាងក្នុងប្រព័ន្ធព្រះអាទិត្យរបស់យើង គឺភពអង្គារ ភពផែនដី ភពសុក្រ និងភពពុធ។ នៅក្នុងចំណោមភពក្រៅប្រព័ន្ធព្រះអាទិត្យ ភពដែលគេចាត់បញ្ចូលជាប្រភេទភពសិលា គឺអាចមានទំហំប្រហាក់ប្រហែលនឹងភពផែនដី ឬតូចជាងផែនដី ក៏ប៉ុន្តែ អាចធំជាងផែនដីយ៉ាងច្រើនបំផុតត្រឹម២ដងប៉ុណ្ណោះ ពីព្រោះ បើធំជាងផែនដីលើសពី២ដងទៅ វានឹងត្រូវបញ្ចូលទៅក្នុងប្រភេទ Super Earth។
ក្នុងចំណោមភពក្រៅប្រព័ន្ធព្រះអាទិត្យ ដែលគេបានរកឃើញទាំងជាង ៤៣០០ មកទល់នឹងពេលនេះ ភពសិលា គឺជាប្រភេទភព ដែលមានចំនួនតិចជាងគេ គឺមានតែ ១៦៣តែប៉ុណ្ណោះ។ ក៏ប៉ុន្តែ គឺប្រភេទភពសិលានេះហើយ ដែលគេផ្តោតការចាប់អារម្មណ៍ស្វែងរកខ្លាំងជាងគេ ដោយសារតែគេគិតថា បើគេចង់រកជីវិតក្រៅភពផែនដី គឺនៅលើភពប្រភេទសិលានេះឯង ដែលជាកន្លែងមានប្រូបាប៊ីលីតេខ្ពស់ជាងគេ៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ