ភពក្រៅប្រព័ន្ធព្រះអាទិត្យបែបណាដែលអាចមានលក្ខខណ្ឌអំណោយផលដល់ជីវិត?
ចុះផ្សាយនៅថ្ងៃ៖
ស្តាប់ - ០៨:៣៩
នៅសប្តាហ៍នេះ សេង ឌីណា សូមលើកឡើង អំពីការស្វែងរកភពក្រៅប្រព័ន្ធព្រះអាទិត្យ ដែលអាចមានលក្ខខណ្ឌអំណោយផលដល់ជីវិត។
នៅក្នុងការស្វែងរកជីវិតក្រៅភព អ្នកវិទ្យាសាស្រ្តផ្តោតជាចម្បងលើការស្វែងរកភពក្រៅប្រព័ន្ធព្រះអាទិត្យទាំងឡាយណា ដែលអាចមានលក្ខខណ្ឌអំណោយផលដល់ជីវិត។ ក៏ប៉ុន្តែ សំណួរសួរថា តើអ្វីទៅជា « លក្ខខណ្ឌដែលអំណោយផលដល់ជីវិត »?
ដោយសារតែជីវិតនៅលើភពផែនដី គឺជាទម្រង់ជីវិតតែមួយគត់ដែលយើងធ្លាប់ឃើញ និងធ្លាប់ស្គាល់ ដូច្នេះ យើងមិនមានជម្រើសអ្វីផ្សេងទៀតនោះទេ ក្រៅតែពីយកជីវិតនៅលើផែនដីនេះធ្វើជាចំណុចគោល ហើយស្វែងរកភពក្រៅប្រព័ន្ធព្រះអាទិត្យ ដែលមានលក្ខណៈស្រដៀងគ្នាទៅនឹងភពផែនដីរបស់យើង។
យើងអាចសង្កេតឃើញថា ក្រៅពីត្រូវមានស្រទាប់បរិយាកាស និងអុកស៊ីសែន លក្ខខណ្ឌចាំបាច់បំផុតសម្រាប់ជីវិត គឺត្រូវមានទឹកក្នុងសភាពរាវ។ ហេតុដូច្នេះហើយបានជាគេចាំបាច់ត្រូវស្វែងរកភព ដែលមិនស្ថិតនៅជិតផ្កាយរបស់វាខ្លាំងពេក ដែលនាំឲ្យសីតុណ្ហភាពក្តៅខ្លាំងធ្វើឲ្យទឹកហួតអស់ ហើយក៏មិនស្ថិតនៅឆ្ងាយពីផ្កាយខ្លាំងពេក ដែលនាំឲ្យសីតុណ្ហភាពត្រជាក់ខ្លាំងធ្វើឲ្យទឹកត្រូវកក។ ផ្ទុយទៅវិញ គេរកភពទាំងឡាយណា ដែលស្ថិតនៅចម្ងាយឆ្ងាយល្មមពីផ្កាយ មានសីតុណ្ហភាពល្មមនឹងអាចឲ្យទឹកស្ថិតនៅជាសភាពរាវបាន គឺតំបន់ ដែលគេឲ្យឈ្មោះជាភាសាអង់គ្លេសថា « Habitable Zone » ឬ « Goldilocks Zone »។
បន្ថែមពីលើទៀត វាក៏អាស្រ័យផងដែរ ទៅលើប្រភេទផ្កាយ ដែលភពនោះវិលជុំវិញ ក៏ដូចជាអាស្រ័យទៅលើស្រទាប់បរិយាកាស និងកម្លាំងនៃដែនម៉ាទិចរបស់ភព។ ជាក់ស្តែង គឺដូចជាភពផែនដីរបស់យើង ដែលស្ថិតនៅក្នុងតំបន់ Habitable Zone ដែលនាំឲ្យមានសីតុណ្ហភាពក្តៅល្មមអាចឲ្យទឹកស្ថិតនៅជាសភាពរាវផង ហើយបន្ថែមពីលើនេះទៅទៀត ភពផែនដីមានដែនម៉ាញេទិច ដែលបង្កើតឡើងដោយរង្វិលនៃស្នូលផែនដី បូករួមជាមួយនឹងបរិយាកាស ដែលគ្របដណ្តប់ដោយស្រទាប់អូហ្សូននៅផ្នែកខាងលើ បង្កើតបានជាខែលដ៏រឹងមាំមួយ ដើម្បីការពារជីវិត ពីវិទ្យុសកម្មរបស់ព្រះអាទិត្យ៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ