អស់រយៈពេល២ទសវត្សរ៍កន្លងទៅនេះ ស្ថានីយ៍អវកាសអន្តរជាតិ គឺជាកន្លែងតែមួយគត់ ដែលអនុញ្ញាតឲ្យមនុស្សយើងមានវត្តមានជាអចិន្រ្តៃយ៍នៅក្នុងទីអវកាស ហើយស្ថានីយ៍អវកាសអន្តរជាតិនេះ ដែលជាកិច្ចសហប្រតិបត្តិការចម្រុះជាតិ រវាងប្រទេសចំនួន ១៥ ក្នុងនោះ រួមមានទាំង សហរដ្ឋអាមេរិក រុស្ស៊ី ជប៉ុន កាណាដា និងប្រទេសចំនួន ១១ នៅក្នុងតំបន់អឺរ៉ុប មានប្រទេសដ៏សំខាន់មួយ ដែលត្រូវបានគេផាត់ចេញ គឺប្រទេសចិន។ ក៏ប៉ុន្តែ នៅពេលនេះ ចិនកំពុងរៀបចំដំឡើងស្ថានីយ៍អវកាសមួយផ្ទាល់ខ្លួនឯង។
ផ្នែកទីមួយនៃស្ថានីយ៍អវកាសចិនត្រូវបានគេបាញ់បង្ហោះ កាលពីថ្ងៃទី២៩ ខែមេសាកន្លងទៅ ដោយផ្ទុកពីលើរ៉ុកកែតឆាងចឹង ដែលគេស្គាល់ជាទូទៅតាមឈ្មោះជាភាសាអង់គ្លេសថា Long March 5B បាញ់បង្ហោះចេញពីមជ្ឈមណ្ឌលអវកាសវិនឆាង លើកោះហៃណានប្រទេសចិន។
ផ្នែកដំបូងនៃស្ថានីយ៍អវកាសចិននេះ មានឈ្មោះថា « ធានហឺ » (Tianhe) មានទទឹង ៤ម៉ែត្រ និងបណ្តោយ ១៦ម៉ែត្រ គឺជាម៉ូឌុលមេ (Core Module) ដែលមានកន្លែងសម្រាប់ទទួលអវកាសយានិកឲ្យស្នាក់នៅចំនួន ៣នាក់ មានប្រព័ន្ធបញ្ជា ប្រព័ន្ធផ្គត់ផ្គង់ថាមពល និងប្រព័ន្ធទ្រទ្រង់ជីវិត។
បន្ថែមពីលើនេះ ម៉ូឌុលធានហឺមានកន្លែងសម្រាប់តភ្ជាប់ជាមួយយានផ្សេង ដែលហៅតាមភាសាអង់គ្លេសថា Docking Port ចំនួន ៥ កន្លែង គឺ ៤ នៅខាងមុខ និង១នៅខាងក្រោយ។ គឺនៅ Docking Port ខាងក្រោយនេះហើយ ដែលជាកន្លែងសម្រាប់តភ្ជាប់ជាមួយនឹងយានដឹកសម្ភារៈ គឺយានឈ្មោះ « ធានចូវ » (Tianzhou) ដែលចិនគ្រោងបាញ់បង្ហោះ នៅថ្ងៃទី២០ឧសភាខាងមុខ។
បន្ថែមពីលើម៉ូឌុលធានហឺនេះ ចិនគ្រោងបញ្ជូនម៉ូឌុលចំនួនពីរទៅបន្ថែមទៀត សម្រាប់ប្រើជាមន្ទីរពិសោធន៍។ ម៉ូឌុលទីមួយ ឈ្មោះ « វឹនធាន » (Wentian) គ្រោងបាញ់បង្ហោះនៅក្នុងចន្លោះខែឧសភានិងមិថុនាឆ្នាំ២០២២ ដោយត្រូវទៅតភ្ជាប់ជាមួយនឹង Docking Port ខាងមុខប៉ែកខាងឆ្វេងម៉ូឌុលធានហឺ ចំណែកម៉ូឌុលទីពីរ ឈ្មោះ « មឹងធាន » (Mengtian) ត្រូវបាញ់បង្ហោះនៅក្នុងចន្លោះខែសីហានិងកញ្ញាឆ្នាំ២០២២ ហើយត្រូវតភ្ជាប់ នៅប៉ែកខាងស្តាំ។
គិតជាសរុប ស្ថានីយ៍អវកាសចិន ដែលមានឈ្មោះរួមថា « ធានគុង » (Tiangong) នឹងត្រូវមាន៣ផ្នែក (ឬ៣ម៉ូឌុល) គឺ ម៉ូឌុលមេធានហឺនៅចំកណ្តាល ម៉ូឌុលវឹនធាន និងម៉ូឌុលមឹងធានជាមន្ទីរពិសោធន៍ស្ថិតនៅខាងឆ្វេង និងខាងស្តាំ ចេញជារាងអក្សរ « T » ហើយបន្ថែមពីលើនេះទៅទៀត Docking Port នៅប៉ែកខាងក្រោយ ទុកជាកន្លែងសម្រាប់ទទួលយានដឹកសម្ភារៈ (យានធានចូវ) ចំណែក Docking Port នៅប៉ែកខាងមុខ ទុកទទួលយានដឹកអវកាសយានិក (យានស្ហឹនចូវ)។
ជារួមទៅ គេអាចសង្កេតឃើញថា ស្ថានីយ៍អវកាសចិននេះ នៅក្រោយពេលដំឡើងចប់សព្វគ្រប់ នឹងត្រូវមានរូបរាង និងរចនាសម្ព័ន្ធស្រដៀងគ្នាច្រើនទៅនឹងស្ថានីយ៍អវកាសមៀរ (MIR) របស់រុស្ស៊ី ដែលធ្លាប់ត្រូវបានគេដាក់ឲ្យដំណើរការក្នុងគន្លងតារាវិថីជុំវិញផែនដី នៅក្នុងចន្លោះពីឆ្នាំ១៩៨៦ ដល់ឆ្នាំ២០០១កន្លងទៅ៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ