នៅថ្ងៃទី១៥ ឧសភា ២០២១ កម្មវិធីអកាសចិនបានបោះជំហានជាប្រវត្តិសាស្រ្តមួយ ដែលអាចជាចំណុចចាប់ផ្តើមដ៏សំខាន់នៃការប្រជែងអវកាសក្នុងសម័យថ្មី គឺចិនទទួលជោគជ័យក្នុងការចុះចតយានប្រភេទរ៉ូវ័រ នៅលើដីភពអង្គារ។
នៅក្នុងគម្រោងធានវិននេះ ដែលជាបេសកកម្មលើកដំបូងបង្អស់របស់ចិនទៅកាន់ភពអង្គារ ចិនបញ្ជូនយានទាំង៣ប្រភេទ នៅក្នុងបេសកកម្មតែមួយ គឺមានទាំង Orbiter សម្រាប់ហោះក្នុងគន្លងតារាវិថី, Lander សម្រាប់ចុះចត និង Rover សម្រាប់ផ្លាស់ទីនៅលើដីភពអង្គារ។
ធានវិនត្រូវបានទីភ្នាក់ងារអវកាសចិន (CNSA) បាញ់បង្ហោះ កាលពីថ្ងៃទី២៣ កក្កដា ឆ្នាំ២០២០ ដោយផ្ទុកពីលើរ៉ុកកែតឆាងចឹង ដែលគេស្គាល់ជាទូទៅតាមឈ្មោះជាភាសាអង់គ្លេសថា Long March 5 បាញ់បង្ហោះចេញពីមជ្ឈមណ្ឌលអវកាសវិនឆាង លើកោះហៃណានប្រទេសចិន។
ក្រោយពីធ្វើដំណើរអស់រយៈពេលជិត ៧ខែ ធានវិនបានទៅដល់ភពអង្គារ នៅថ្ងៃទី១០កុម្ភៈឆ្នាំ២០២១ ហើយពេលទៅដល់ក្បែរភពអង្គារ យានធានវិនបានបញ្ឆេះម៉ូទ័រ ទៅតាមយន្តការដែលគេឲ្យឈ្មោះជាភាសាអង់គ្លេសថា « Orbit insertion maneuver » ដើម្បីបន្ថយល្បឿនឲ្យយឺតល្មមអាចឲ្យកម្លាំងទំនាញភពអង្គារទាញចូលទៅក្នុងគន្លងតារាវិថី។
ក្រោយពីបានចំណាយពេលជាង៣ខែ ប្រមូលទិន្នន័យនៅក្នុងគន្លងតារាវិថី ជាពិសេសថតរូបភាពលម្អិតអំពីសណ្ឋានដីភពអង្គារ នៅត្រង់ទៅតាំងដែលត្រូវចុះចតរ៉ូវ័រ ធានវិនត្រូវផ្តាច់ខ្លួនជាពីរ គឺ Orbiter បន្តស្ថិតនៅក្នុងគន្លងតារាវិថី ចំណែក Lander ដែលមានផ្ទុករ៉ូវ័រនៅលើនោះផង ត្រូវចេញពីគន្លងតារាវិថី ដើម្បីសំដៅទៅចុះចតលើដីភពអង្គារ។
ក្រោយពីឆ្លងកាត់ដំណាក់កាលដ៏សែនស្មុគស្មាញ ដែលក្រុមអ្នកវិទ្យាសាស្រ្តរបស់ណាសា តែងតែនាំគ្នាហៅថា “Seven Minutes of Terror” រ៉ូវ័ររបស់ចិន ដែលមានឈ្មោះថា « ជូរ៉ុង » (Zhurong) បានចុះចតដោយជោគជ័យលើដីភពអង្គារ។ ៤ថ្ងៃក្រោយចុះចត រូបថតដំបូងបង្អស់ដែលយាន ជូរ៉ុង ថតនៅលើដីភពអង្គារ ត្រូវបានទីភ្នាក់ងារអវកាសចិនចេញផ្សាយ នៅថ្ងៃទី១៩ឧសភា។
តាមគម្រោង យានជូរ៉ុង ត្រូវបានសាងសង់ឡើងឲ្យអាចមានដំណើរការលើដីភពអង្គាររយៈពេល ៩០ថ្ងៃ ដើម្បីសិក្សាលម្អិតអំពីធាតុផ្សំ និងសណ្ឋានដីរបស់ភពអង្គារ ក្នុងពេលដែល Orbiter ដែលស្ថិតនៅក្នុងគន្លងតារាវិថី បន្តប្រមូលទិន្នន័យពីក្នុងគន្លងតារាវិថីដើម្បីបន្តសិក្សាទៅលើភពអង្គារនោះផង ហើយក៏នឹងដើរតួផងដែរជាផ្កាយរណប ដើម្បីភ្ជាប់ទំនាក់ទំនង រវាងយានជូរ៉ុង និងភពផែនដី៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ