មកស្គាល់ប៉ែកខាងក្នុងស្ថានីយ៍អវកាសអន្តរជាតិជាមួយតូម៉ាប៉េស្កេ
ចុះផ្សាយនៅថ្ងៃ៖
ស្ថានីយ៍អវកាសអន្តរជាតិ (ISS) ប្រៀបដូចជាផ្កាយរណបដ៏ធំមួយ ដែលវិលជុំវិញផែនដី ប៉ុន្តែប៉ែកខាងក្នុងវិញ គឺជាមន្ទីរពិសោធន៍វិទ្យាសាស្រ្ត ដែលអាចទទួលអវកាសយានិក ពី ៣ ទៅ ៦នាក់ ឲ្យស្នាក់នៅជាប់ជាប្រចាំ។ តើខាងក្នុងស្ថានីយ៍អវកាសនេះមានរូបរាងបែបណា? តើគេរស់នៅលើនោះបានយ៉ាងដូចម្តេច (កន្លែងគេង បាយ ទឹក បង្គន់...)? តាមរយៈវីដេអូនេះ អវកាសយានិកបារាំង តូម៉ា ប៉េស្កេ (Thomas Pesquet) ដែលធ្លាប់ស្នាក់នៅទីនោះ ៦ខែ កាលពីពេលកន្លងមក ហើយបច្ចុប្បន្នកំពុងបំពេញបេសកកម្មលើកទីពីរនៅទីនោះ នាំលោកអ្នកឲ្យស្គាល់ប៉ែកខាងក្នុងស្ថានីយ៍អវកាសអន្តរជាតិ។
ទិន្នន័យសង្ខេបអំពីស្ថានីយ៍អវកាសអន្តរជាតិ (International Space Station)
- ទំហំ៖ បណ្តោយ ៧៣ម៉ែត្រ និងទទឹងស្លាប ១០៩ម៉ែត្រ
- រយៈកម្ពស់៖ ៤០០គីឡូម៉ែត្រ
- ល្បឿន៖ ២៨០០០គីឡូម៉ែត្រក្នុងមួយម៉ោង (ជិត ៨គីឡូម៉ែត្រក្នុង១វិនាទី) ធ្វើដំណើរ១ជុំផែនដីដោយប្រើពេលប្រមាណជា ៩០នាទី
- ថ្ងៃ-យប់៖ ក្នុងរយៈពេល ២៤ម៉ោង ស្ថានីយ៍អវកាសអន្តរជាតិអាចធ្វើដំណើរវិលជុំវិញផែនដីចំនួន ១៦ដង ដែលមានន័យថា ២៤ម៉ោងនៅលើដី មានថ្ងៃមានយប់ដល់ទៅ ១៦ដង នៅលើស្ថានីយ៍អវកាសអន្តរជាតិ ហើយអវកាសយានិកដែលនៅលើនោះ អាចមើលឃើញថ្ងៃរះ ១៦ដង និងថ្ងៃលិច ១៦ដង
- ផ្នែកដំបូងបង្អស់នៃស្ថានីយ៍អវកាសអន្តរជាតិត្រូវបានបាញ់បង្ហោះ នៅឆ្នាំ១៩៩៨ ហើយអាចចាប់ផ្តើមទទួលអវកាសយានិកឲ្យស្នាក់នៅជាលក្ខណៈអចិន្រ្តៃយ៍ចាប់ពីឆ្នាំ២០០០
- គិតជាសរុប មានមនុស្ស ២៤២នាក់ មកពីប្រទេសចំនួន ១៩ផ្សេងគ្នា ដែលធ្លាប់ធ្វើដំណើរទៅកាន់ស្ថានីយ៍អវកាសអន្តរជាតិ
- ពីលើដីនេះទៅ នៅពេលយប់ គេអាចមើលឃើញស្ថានីយ៍អវកាសអន្តរជាតិដោយភ្នែកទទេ ដោយមើលឃើញជាចំណុចភ្លឺប្រហាក់ប្រហែលផ្កាយព្រឹកតែផ្លាស់ទីក្នុងល្បឿនលឿនឆ្លងកាត់ផ្ទៃមេឃ (ផ្កាយហោះ)។ ព័ត៌មានទាក់ទងនឹងទីតាំង និងពេល ដែលស្ថានីយ៍អវកាសអន្តរជាតិត្រូវហោះកាត់ មាននៅលើវេបសាយរបស់អេសា www.esa.int
ព័ត៌មានលម្អិតទាក់ទងនឹងស្ថានីយ៍អវកាសអន្តរជាតិ៖ https://www.nasa.gov/mission_pages/station/main/index.html
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ