ហេតុអ្វី Dark Energy អាចកំណត់ជោគវាសនាចក្រវាល?
ចុះផ្សាយនៅថ្ងៃ៖
ស្តាប់ - ០៨:៣២
នៅសប្តាហ៍នេះ សេង ឌីណា សូមលើកឡើង អំពីថាមពលងងឹត (Dark Energy) ដែលជាអាថ៌កំបាំងដ៏ចម្បងមួយ ហើយដែលអាចជាអ្នកកំណត់ជោគវាសនានៃចក្រវាលរបស់យើង។
រហូតមកទល់នឹងពេលបច្ចុប្បន្ន Dark Energy នេះនៅតែជាអាថ៌កំបាំងដ៏ធំមួយ ហើយផ្ទុយពី Dark Matter ដែលគេអាចសង្កេតឃើញដោយប្រយោលតាមរយៈបាតុភូត Gravitational Lensing ថាមពលងងឹត ឬ Dark Energy វិញ គេនៅមិនទាន់អាចរកវិធីសង្កេតមើលឃើញដើម្បីយកធ្វើជាភស្តុតាងពិតប្រាកដនៅឡើយនោះទេ ពោលគឺ អ្វីៗស្ថិតនៅត្រឹមតែជាទ្រឹស្តីហើយគេនៅតែមិនទាន់ដឹងច្បាស់នៅឡើយថា តើ Dark Energy នេះគឺជាអ្វីពិតប្រាកដ?
ទោះជាយ៉ាងណា អ្នកវិទ្យាសាស្រ្តជាច្រើនគិតថា ការស្វែងយល់ពី Dark Energy នេះ វាមានសារៈសំខាន់ ដើម្បីអាចយល់ពីអនាគតនៃចក្រវាលរបស់យើង ពីព្រោះថា ប្រសិនបើ Dark Energy នេះ មានឥទ្ធិពលចាញ់កម្លាំងទំនាញសកល នៅថ្ងៃណាមួយ ចក្រវាលរបស់យើងនេះនឹងលែងរីកមាឌ រួចហើយចាប់ផ្តើមរួចតូចមកវិញបន្តិចម្តងៗ រហូតដល់ពេលមួយគ្រប់សារធាតុទាំងអស់នឹងត្រូវប្រមូលផ្តុំគ្នាទៅជាចំណុចតែមួយ ដែលគេហៅថា Singularity ពោលគឺ វិលត្រឡប់ទៅរកស្ថានភាពដើមវិញ កាលពីមុនហេតុការណ៍ Big Bang។
ផ្ទុយទៅវិញ ប្រសិនបើ Dark Energy មានឥទ្ធិពលលុបលើកម្លាំងទំនាញសកល ចក្រវាលរបស់យើងនឹងចេះតែបន្តរីកមាឌបែបនេះជារៀងរហូតឥតឈប់ រហូតដល់ពេលមួយ គ្រប់អ្វីៗទាំងអស់ នៅក្នុងចក្រវាលរបស់យើងនេះ រាប់ចាប់តាំងពីកាឡាក់ស៊ី ផ្កាយ ភព រហូតទៅដល់អាតូមតូចល្អិត នឹងត្រូវរលាយបែកខ្ញែកចេញពីគ្នា ហើយចក្រវាលនឹងត្រូវបញ្ចប់ជីវិត នៅក្នុងសេណារីយ៉ូមួយ ដែលគេឲ្យឈ្មោះតាមភាសាអង់គ្លេសថា “Big Rip”៕
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាស
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ