រដ្ឋាភិបាលប្តូរឈ្មោះក្រសួង «ឧស្សាហកម្ម និងសិប្បកម្ម» ទៅជា «ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍»
រដ្ឋាភិបាលរបស់លោកនាយករដ្ឋមន្ត្រី ហ៊ុន សែន បានឯកភាពឱ្យប្តូរឈ្មោះក្រសួង «ឧស្សាហកម្ម និងសិប្បកម្ម» ទៅជា «ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍»។ ការប្តូរឈ្មោះនេះធ្វើឡើងតាមការស្នើរបស់រដ្ឋមន្ត្រីក្រសួងឧស្សាហកម្ម និងសិប្បកម្មនាពេលបច្ចុប្បន្ននេះ ក្នុងគោលបំណងជំរុញការអភិវឌ្ឍផ្នែកវិទ្យាសាស្ត្រ និងបច្ចេកវិទ្យា ក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:១៤
រាជរដ្ឋាភិបាលកម្ពុជាតាមរយៈលិខិតរបស់ទីស្តីការគណៈរដ្ឋមន្ត្រី កាលពីថ្ងៃទី២៤ ខែមករា បានយល់ព្រមជាគោលការណ៍ឲ្យប្តូរឈ្មោះក្រសួងឧស្សាហកម្ម និងសិប្បកម្ម ទៅជា “ក្រសួងឧស្សាហកម្ម និងវិទ្យាសាស្ត្រ បច្ចេកវិទ្យា និងនវានុវត្តន៍”។ និងអនុញ្ញាតឲ្យធ្វើវិសោធនកម្មច្បាប់ទាំងឡាយ និងឯកសារគតិយុត្តផ្សេងៗ ដែលមានការពាក់ព័ន្ធដល់រចនាសម្ព័ន្ធ និងការប្រព្រឹត្តិទៅនៃក្រសួងថ្មី។
លិខិតរបស់ទីស្តីការគណៈរដ្ឋមន្ត្រីដដែល ឲ្យដឹងទៀតថា រាជរដ្ឋាភិបាល ណែនាំឱ្យផ្តល់ការយកចិត្តទុកដាក់ គាំទ្រ និងបង្កលទ្ធភាពទៅតាមសភាពជាក់ស្តែង ដើម្បីធ្វើឱ្យផ្នែកស្រាវជ្រាវលើវិទ្យាសាស្ត្រ បច្ចេកវិទ្យា និងរបកគំហើញផ្សេងៗ (នវានុវត្តន៍) របស់កម្ពុជា ឱ្យទទួលបានប្រសិទ្ធភាព និងទូលំទូលាយក្នុងប្រយោជន៍ជំរុញឱ្យវិស័យវិទ្យាសាស្ត្រមានការរីកចម្រើន និងផ្ទេរបច្ចេកវិទ្យាស្របតាមបរិបថនៃបដិវត្តន៍ឧស្សាហកម្មជំនាន់ទី៤.០។
លោក អ៊ំ សុថា អ្នកនាំពាក្យក្រសួងឧស្សាហកម្ម និងសិប្បកម្ម បានអះអាងប្រាប់វិទ្យុបារាំងអន្តរជាតិនៅថ្ងៃទី២៥ ខែមករានេះថា ការប្តូរឈ្មោះនេះ គឺជាគោលនយោបាយរបស់រដ្ឋាភិបាល ដែលចង់ឲ្យមានក្រសួងទទួលបន្ទុកវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ដោយសារតែកន្លងមកមិនទាន់មានក្រសួងណា ដែលទទួលភារកិច្ចនេះជាក់លាក់។
លោកបន្តថា បន្ទាប់ពីការរៀបចំរចនាសម្ព័ន្ធថ្មីរួចរាល់ហើយ ក្រសួងនឹងដើរតួនាទីជាអ្នកគ្រប់គ្រងដឹងនាំ និងជាសេនាធិការរបស់រាជរដ្ឋាភិបាល ជំរុញការអភិវឌ្ឍន៍ផ្នែក វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាកត្តាជំរុញដល់ការអភិវឌ្ឍវិស័យនានានៅក្នុងប្រទេស ជាពិសេសគឺវិស័យសេដ្ឋកិច្ច ឧស្សាហកម្ម និងពាណិជ្ជកម្មជាដើម។
លោក បណ្ឌិត មាស នី អ្នកស្រាវជ្រាវខាងការអភិវឌ្ឍសង្គម បានអះអាងប្រាប់វិទ្យុបារាំងថា លោកមិនសូវជាចាប់អារម្មណ៍នឹងការប្តូរឈ្មោះក្រសួងនេះទេ ប៉ុន្តែអ្វីដែលលោកចាប់អារម្មណ៍គឺការអនុវត្តការងារឲ្យមានប្រសិទ្ធភាព ដោយហេតុថាកន្លងមក ក្រសួងឧស្សាហកម្ម និងសិប្បកម្ម ហាក់មានការខិតខំប្រឹងប្រែងតិចណាស់ ដើម្បីជួយពលរដ្ឋក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ