ចិនកោះហៅទូតអាមេរិកមកតវ៉ារឿងលក់អាវុធឲ្យតៃវ៉ាន់
រដ្ឋាភិបាលចិនបានឲ្យដឹងនៅថ្ងៃព្រហស្បតិ៍នេះថាខ្លួនបានកោះហៅមន្រ្តីទូតអាមេរិកប្រចាំទីក្រុងប៉េកាំងមកជួប ដើម្បីធ្វើការតវ៉ាជាផ្លូវការ ចំពោះសេចក្តីសម្រេចលក់អាវុធទៅឲ្យតៃវ៉ាន់។ ចិនបានទាមទារឲ្យអាមេរិកលុបចោលវិញនូវកិច្ចសន្យាលក់គ្រឿងសព្វាវុធនេះ ដោយបានព្រមានថា នឹងដាក់ទណ្ឌកម្មដល់ក្រុមហ៊ុនណាដែលពាក់ព័ន្ធនឹងកិច្ចសន្យានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កិច្ចសន្យាលក់គ្រឿងសព្វាវុធ ទៅឲ្យតៃវ៉ាន់ ដែលមានតម្លៃជាទឹកប្រាក់សរុបរហូតដល់ទៅជិត ២ពាន់លានដុល្លារ ហើយក្នុងនោះក៏មាននាវាចម្បាំងដ៏ទំនើបចំនួន ២គ្រឿងផងដែរ ត្រូវបានរដ្ឋាភិបាលអាមេរិកបញ្ជូនទៅសុំភ្លើងខៀវពីសភា កាលពីថ្ងៃពុធម្សិលមិញ ហើយគេរំពឹងថា ការអនុម័តគម្រោងលក់គ្រឿងសព្វាវុធនេះទំនងជានឹងមិនចោទជាបញ្ហាអ្វីធំដុំនោះទេ ពីព្រោះថា បច្ចុប្បន្ននេះ សភាអាមេរិកស្ថិតក្រោមការគ្រប់គ្រងរបស់គណបក្សសាធារណរដ្ឋ ដែលជាទូទៅគាំទ្រការលក់គ្រឿងសព្វាវុធទៅឲ្យតៃវ៉ាន់។
ភ្លាមៗក្រោយពីទទួលដំណឹងនេះ ចិនបានបញ្ចេញប្រតិកម្មតបវិញភ្លាមៗ ដោយបានកោះហៅមន្រ្តីទូតអាមេរិកឲ្យទៅជួប ដើម្បីធ្វើការតវ៉ា ហើយបានប្រាប់ទៅរដ្ឋាភិបាលអាមេរិកថា ការលក់គ្រឿងសព្វាវុធទៅឲ្យកោះតៃវ៉ាន់នេះ គឺជាការរំលោភយ៉ាងធ្ងន់ធ្ងរលើច្បាប់អន្តរជាតិ លើវិធាននៃទំនាក់ទំនងអន្តរជាតិ និងជាពិសេស គឺជាការបំពានទៅលើអធិបតេយ្យភាព និងសន្តិសុខជាតិរបស់ចិន។
នៅក្នុងសេចក្តីប្រកាសព័ត៌មានចេញផ្សាយ នៅថ្ងៃព្រហស្បតិ៍នេះ ក្រសួងការបរទេសចិនបានទាមទារឲ្យអាមេរិកលុបចោលវិញនូវគម្រោងលក់អាវុធគ្រឿងសព្វាវុធនេះ ដើម្បីបញ្ចៀសកុំឲ្យមានភាពប្រេះឆា នៅក្នុងទំនាក់ទំនងអាមេរិក-ចិន។ លើសពីនេះទៅទៀត ចិនក៏បានព្រមានផងដែរថានឹងដាក់ទណ្ឌកម្មទៅលើរាល់ក្រុមហ៊ុនណា ដែលពាក់ព័ន្ធនឹងកិច្ចសន្យាលក់គ្រឿងសព្វាវុធទៅឲ្យកោះតៃវ៉ាន់នេះ។
គួរបញ្ជាក់ថា តាំងពីដើមរៀងមក ថ្វីដ្បិតតែតៃវ៉ាន់ស្ថិតនៅក្រោមរបបគ្រប់គ្រងដាច់ដោយឡែក តែចិនតែងតែទាមទារឲ្យគ្រប់ប្រទេសទាំងអស់គោរពនូវនយោបាយ “ចិនមួយ” ពោលគឺ តៃវ៉ាន់ គ្រាន់តែជាខេត្តមួយរបស់ចិនប៉ុណ្ណោះ មិនមែនជាប្រទេសឯករាជ្យនោះទេ។ សហរដ្ឋអាមេរិកវិញ ចាប់តាំងពីឆ្នាំ១៩៧៩មក ក៏បានទទួលស្គាល់នយោបាយចិនមួយនេះដែរ ក៏ប៉ុន្តែ ក្នុងពេលជាមួយគ្នា បន្តរក្សាទំនាក់ទំនងពិសេសជាមួយកោះតៃវ៉ាន់ ជាពិសេស សភាអាមេរិកបានបង្កើតច្បាប់មួយ ដាក់កាតព្វកិច្ចឲ្យរដ្ឋាភិបាលផ្គត់ផ្គង់គ្រឿងសព្វាវុធទៅឲ្យតៃវ៉ាន់។
ឆ្លើយតបទៅនឹងការរិះគន់របស់ចិន មន្រ្តីអ្នកនាំពាក្យក្រសួងការបរទេសអាមេរិកបានលើកឡើងថា ការលក់គ្រឿងសព្វាវុធទៅឲ្យកោះតៃវ៉ាន់នៅពេលនេះ គឺជាអ្វីដែលអាមេរិកតែងតែធ្លាប់ធ្វើតាំងពីដើមរៀងមក ហើយវាមិនមែនជាការចាកពីនយោបាយចិនមួយនោះទេ ហើយថា អាមេរិកនៅតែចាត់ទុកទំនាក់ទំនងទ្វេភាគីជាមួយចិន ជាទំនាក់ទំនងដែលមានសារៈសំខាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ