អូស្ត្រាលី៖ គណបក្សប្រឆាំងឈ្នះឆ្នោត
ថ្ងៃសៅរ៍ ទី៣១ឧសភា នាយករដ្ឋមន្ត្រីអភិរក្សនិយម លោក Scott Morrison បានចាញ់ការឆ្នោត ហើយតំណែងប្រមុខដឹកនាំរដ្ឋាភិបាលថ្មី នឹងបានធ្លាក់ទៅខាងថ្នាក់ដឹកនាំគណបក្សពលករ ដែលជាបក្សប្រឆាំងដ៏លេចធ្លោ។ នៅពេលរាប់សន្លឹកឆ្នោតបានតែជាងពាក់កណ្តាល លោក Scott Morrison បានទទួលស្គាល់បរាជ័យ និងបានថ្លែងអបអរសារទដល់មេបក្សប្រឆាំង គឺលោក អង់តូនី អាល់បាណេស៊ី (Anthony Albanese) ។ មេបក្សប្រឆាំងរូបនេះ បានថ្លែងសុន្ទរកថាស្តីពីភាពជោគជ័យរបស់ខ្លួនថា «ពលរដ្ឋអូស្ត្រាលីបានបោះឆ្នោតដើម្បីការផ្លាស់ប្តូរ»។
ចុះផ្សាយនៅថ្ងៃ៖
ស្តាប់ - ០២:១៣
ប្រជាជនអូស្ត្រាលីដែលត្រូវបោះឆ្នោត ប្រមាណ១៧,២លាននាក់ ត្រូវសម្រេចជ្រើសរើសសមាជិកសភាចំនួន១៥១អាសនៈ សម្រាប់បេក្ខជនតំណាងរាស្ត្រ មានអាណត្តិ៣ឆ្នាំ ហើយនិងជ្រើសរើសសមាជិកព្រឹទ្ធសភា ប្រមាណ៤០រូបនៃអាសនៈ៧៦ ដែលតម្រូវឲ្យផ្លាស់ប្តូររៀងរាល់៦ឆ្នាំម្តង។ គណបក្សដែលបានទទួលសំឡេងភាគច្រើនក្នុងការបោះឆ្នោតនេះ គឺ ត្រូវឈ្នះជាស្វ័យប្រវត្តិ ដើម្បីរៀបចំបង្កើតរដ្ឋាភិបាល។
អ្នកវិភាគស្ថានការណ៍នយោបាយអូស្ត្រាលី មើលឃើញថា ការណ៍ដែលលោក Scott Morrison ចាញ់ឆ្នោត ពីព្រោះតែភាពអសកម្មរបស់រដ្ឋាភិបាល ហើយពិសេសគឺអសកម្មក្នុងវិស័យប្រឆាំងទប់ទល់នឹងការប្រែប្រួលអាកាសធាតុ។ អ្នកវិភាគបញ្ជាក់ថា រដ្ឋាភិបាលចេះតែថាស្រឡាញ់បរិស្ថាន គាំទ្រការកាត់បន្ថយឧស្ម័យកាបូនិក ក៏ប៉ុន្តែ នៅពីចំណែកម្ខាងគឺបានគាំទ្រយ៉ាងពេញទំហឹងឧស្សាហកម្មផលិតធ្យូងថ្ម។ ដែលវិស័យនេះ ជាប្រភពចំណូលសេដ្ឋកិច្ចមួយយ៉ាងធំសម្រាប់ប្រទេស។
អូស្ត្រាលីត្រូវគេមើលឃើញថាបានប្រឈមនឹងវិបត្តិធម្មជាតិ ធ្ងន់ ខ្លាំង និងកាចសាហាវ នាប៉ុន្មានបួនប្រាំឆ្នាំចុងក្រោយនេះ។ នៅក្នុងប្រទេសមួយដែលត្រូវគេកត់សម្គាល់យ៉ាងខ្លាំងពីគ្រោះទឹកជំនន់ ភ្លើងឆេះព្រៃ និងគ្រោះរាំងស្ងួតខ្លាំង, មេដឹកនាំគណបក្សពលករលោក Anthony Albanese និងជាប្រមុខរដ្ឋាភិបាលថ្មី បានសន្យាគិតគូរពីបរិស្ថាន និងជំរុញកែប្រែអូស្ត្រាលីឲ្យក្លាយជាប្រទេសដែលជឿនលឿនខ្លាំងខាងថាមពលដែលស្អាតនិងកកើតឡើងវិញ។ ទន្ទឹមនឹងគ្នានេះ លោក Anthony Albanese បានសន្យាបង្កើតអង្គភាពប្រឆាំងអំពើពុករលួយ និងធ្លាប់បានចោទប្រកាន់រដ្ឋាភិបាលរបស់លោក Scott Morrison ថាគ្មានតម្លាភាព និងមានយុត្តិធម៌តិចតួចជាងគេបំផុតក្នុងប្រវត្តិសាស្ត្រអូស្ត្រាលី។
មេបក្សប្រឆាំង លោក Anthony Albanese អាយុ៥៧ឆ្នាំ មានដើមកំណើតជាតិអ៊ីតាលី ក្នុងគ្រួសារក្រីក្រ។ លោកនឹងជាក្លាយជាប្រមុខរដ្ឋាភិបាលអូស្ត្រាលីដំបូងគេ ដែលមានកំណើតជាកូនកាត់អ៊ីតាលី និងគ្មានឈ្មោះអង់គ្លេសបែបអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ