សំណុំរឿង EBA៖ វិស័យឯកជនស្នើឲ្យរដ្ឋាភិបាលខ្មែរជជែកពីបញ្ហាដែលជាកង្វល់របស់អឺរ៉ុប
ប្រតិកម្មចំពោះការសម្រេចរបស់សហភាពអឺរ៉ុប ក្នុងសំណុំរឿង EBA នៅកម្ពុជា នៅតែបន្តធ្លាក់ចុះមកមិនទាន់ចប់នៅឡើយ។ នាថ្ងៃសុក្រ ទី១៤កុម្ភៈម្សិលមិញ វិស័យឯកជននៅកម្ពុជា នាំមុខដោយសភាពាណិជ្ជកម្ម បានសម្ដែងការសោកស្ដាយ ចំពោះការដកការអនុគ្រោះពន្ធផ្នែកខ្លះពីកម្ពុជា ក្រោមកិច្ចព្រមព្រៀងអ្វីៗគ្រប់យ៉ាងលើកលែងតែសព្វាវុធ ឬ EBA។ នៅចំពោះមុខការសម្រេចដូច្នេះ វិស័យឯកជនបានអំពាវនាវឲ្យរដ្ឋាភិបាលកម្ពុជាបន្តកិច្ចសន្ទនាអំពីបញ្ហាដែលជាកង្វល់របស់សហភាពអឺរ៉ុប។ បញ្ហាទាំងនោះមានជាអាទិ៍៖ បញ្ហាសិទ្ធិមនុស្ស សិទ្ធិនយោបាយ និងសិទ្ធិការងារជាដើម។
ចុះផ្សាយនៅថ្ងៃ៖
សេចក្ដីសម្រេចរបស់គណៈកម្មការអឺរ៉ុប គឺជារឿងគួរឲ្យសោកស្ដាយ។ នេះគឺជាការគូសបញ្ជាក់របស់វិស័យឯកជនកម្ពុជា ពីរថ្ងៃបន្ទាប់ពីគណៈកម្មការអឺរ៉ុបប្រកាសអំពីការសម្រេចដកការអនុគ្រោះពន្ធផ្នែកខ្លះពីកម្ពុជា។
បើតាមការគូសបញ្ជាក់របស់វិស័យឯកជន សេចក្ដីសម្រេចរបស់គណៈកម្មការអឺរ៉ុបផ្ដល់ផលប៉ះពាល់សេដ្ឋកិច្ច៖ និយាយជារួម កម្ពុជាត្រូវខាតបង់ទឹកប្រាក់ប្រមាណ១,៣ពាន់លានដុល្លារនៅក្នុងមួយឆ្នាំ និងនិយាយដោយឡែក តម្លៃទំនិញដែលអឺរ៉ុបលែងអនុគ្រោះពន្ធឲ្យនោះ ក៏នឹងត្រូវកើនឡើងប្រមាណ១៤០លានដុល្លារអាមេរិកផងដែរ។ សូមជម្រាបថា ទំនិញដែលអឺរ៉ុបលែងផ្ដល់ការអនុគ្រោះពន្ធដល់កម្ពុជា រួមមាន៖ ផលិតផលខ្លះក្នុងផ្នែកកាត់ដេរសម្លៀកបំពាក់និងស្បែកជើង ផលិតផលសម្រាប់ធ្វើដំណើរទាំងអស់ និងផលិតផលស្ករស។
យ៉ាងណាក៏ដោយ វិស័យឯកជនកត់សម្គាល់ថា រដ្ឋាភិបាលកម្ពុជាបានអនុវត្តកំណែទម្រង់ស៊ីជម្រៅជាកញ្ចប់តាំងពីខែមីនាឆ្នាំ២០១៩ ដើម្បីកាត់បន្ថយការចំណាយនៃការធ្វើធុរកិច្ច។ កំណែទម្រង់នេះ បើតាមវិស័យឯកជន គឺវាអាចកាត់កងការខាតបង់ដោយសារការដកការអនុគ្រោះពន្ធរបស់អឺរ៉ុបបាន ប្រសិនបើមានការអនុវត្តបានត្រឹមត្រូវ។ និយាយដល់កំណែទម្រង់ វិស័យឯកជនមើលឃើញថា រដ្ឋាភិបាលកម្ពុជាអាចបន្តធ្វើកំណែទម្រង់រចនាសម្ព័ន្ធបន្ថែមទៀត ដើម្បីជួយពង្រឹងការអនុវត្តច្បាប់និងកាត់បន្ថយការប្រកួតប្រជែងមិនស្មើភាព ដែលការណ៍នេះ នឹងជួយពន្លឿនការធ្វើពិពិធកម្មសេដ្ឋកិច្ចកម្ពុជា ទីផ្សារនាំចេញ និងប្រភពនៃការវិនិយោគ។
វិស័យឯកជនក៏បានអំពាវនាវផងដែរ ឲ្យរដ្ឋាភិបាលកម្ពុជាបន្តកិច្ចសន្ទនាអំពីបញ្ហានានាដែលជាកង្វល់របស់សហភាពអឺរ៉ុប។ បញ្ហាទាំងនោះរួមមាន បញ្ហាសិទ្ធិមនុស្ស សិទ្ធិនយោបាយ និងសិទ្ធិការងារ។ ចំណែកវិស័យឯកជនផ្ទាល់ បានប្ដេជ្ញាបន្តកិច្ចសហការយ៉ាងជិតស្និទ្ធជាមួយគ្រប់ភាគីពាក់ព័ន្ធ ដើម្បីពង្រឹងនិងលើកកម្ពស់សិទ្ធិមនុស្សព្រមទាំងសិទ្ធិការងារនៅកម្ពុជា ឲ្យមានស្តង់ដារស្របទៅតាមឧត្តមានុភាពអន្ដរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ