អាជ្ញាធរហុងកុងលុបចោលការចរចារជាមួយក្រុមបាតុករ
អស់រយៈពេលជាច្រើនសប្តាហ៍កន្លងទៅ បន្ទាប់ពីមានការប្រឈមមុខដាក់គ្នា រវាងក្រុមបាតុករ ទាមទារលទ្ធិប្រជាធិបតេយ្យ និងអាជ្ញាធរក្រុងហុងកុង ភាគីទាំងពីរបានព្រមព្រៀងគ្នា ថានឹងជួបចរចាគ្នា នៅថ្ងៃសុក្រ ទី១០ តុលានេះ។ ប៉ុន្តែអ្វីៗបានក្រឡាប់ចាក់ ដោយអាជ្ញាធរហុងកុង បានលុបចោលគម្រោងជួបចរចានេះ ដោយចោទថាក្រុមបាតុករនៅតែមានចេតនាធ្វើការបះបោរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅថ្ងៃព្រហ្បតិ៍ទី៩តុលា អាជ្ញាធរក្រុងហុងកុង បានប្រកាសឲ្យដឹងថា ខ្លួនបានលុបចោលគម្រោងជួបចរចាជាមួយក្រុមបាតុករទាមទារលទ្ធិប្រជាធិបតេយ្យ ដែលបានកំណត់ថានឹងធ្វើនៅថ្ងៃសុក្រទី១០ តុលា។ អ្នកតំណាងរដ្ឋបាលក្រុងហុងកុង បានថ្លែងថា មូលហេតុដែលធ្វើឲ្យអាជ្ញាធរសម្រេចលុបចោលការចរចារ ដោយសាតែ ក្រុមបាតុករនៅតែបន្តអំពាវនាវឲ្យមានការបះបោរប្រឆាំងនឹងអាជ្ញាធរ។ ដូច្នេះ មានន័យថា ក្រុមបាតុករគ្មានចេតនាណាមួយ នឹងស្វែងរកការព្រមព្រៀងគ្នាដោយសន្តិវិធីនោះទេ។
សូមរំលឹកថា អស់រយៈពេលជាច្រើនសប្តាហ៍កន្លងមកហើយដែល ក្រុមនិស្សិត និងសកម្មជនប្រជាធិបតេយ្យនៅហុងកុង បានចេញមកធ្វើបាតុកម្មជាច្រើនម៉ឺននាក់ ទាមទារឲ្យមានការបោះឆ្នោតដោយសេរី ដើម្បីជ្រើសតាំងថ្នាក់ដឹកនាំតំបន់ស្វ័យត្នហុងកុង។ ចាប់តាំងពីថ្ងៃចន្ទដើមសប្តាហ៍ នេះ ស្ថានភាពមានភាពស្ងប់ស្ងាត់បន្តិច ប៉ុន្តែ ក្រុមបាតុករនៅតែបន្តជួបជុំគ្នាដដែល។
ប្រធានសហព័ន្ធនិស្សិតហុងកុង បានថ្លែងថា គ្មានអ្វីអាចបង្អាក់ការទាមទាររបស់និស្សិត និងក្រុមបាតុករទាំងអស់បានទេ ដរាបណា នៅតែមានមនុស្សមកចូលរួមធ្វើបាតុកម្ម។ អ្វីដែលក្រុមបាតុករទាមទារ គឺជាការចង់បានរបស់ប្រជាជនហុងកុងទូទៅ ពោលគឺពួកគេត្រូវការឲ្យមានការបោះឆ្នោតជ្រើសរើសថ្នាក់ដឹកនាំរបស់ខ្លួន ប្រកបដោយសេរី យុត្តិធម៌ មិនមែនតាមតែការសម្រេចរបស់គណៈបក្សកុម្មុយនិស្តចិនប៉េកាំងនោះទេ។
ក្រៅពីនេះ ក្រុមបាតុករ បានទាមទារឲ្យអភិបាលក្រុងហុងកុងបច្ចុប្បន្ន គឺលោក ឡឹង ឈុនយីង ឲ្យចុះចេញពីដំណែង ដោយពួកគេចោទថា លោកអភិបាលក្រុងរូបនេះ ជាអាយ៉ងរបស់ក្រុងប៉េកាំង។ មួយវិញទៀត មានរឿងអាស្រូវមួយទៀត ទើបតែបានលេចឮ ថាលោក ឡឹង ឈុនយីង បានទទួលប្រាក់ចំនួនជាង ៦លានដុល្លារអាមេរិក កាលពីឆ្នាំ២០១១ ពីក្រុមហ៊ុនអូស្ត្រាលីមួយ។ រឿងអាស្រូវស៊ីសំណូកនេះ រឹតតែធ្វើឲ្យ ក្រុមបាតុករក្រេវក្រោធ មិនពេញចិត្តកាន់តែខ្លាំង ទៅនឹងការគ្រប់គ្រងរបស់រដ្ឋបាលហុងកុង ដែលធ្វើតែតាមការបង្គាប់របស់ក្រុងប៉េកាំង ហើយប្រឡាក់ប្រឡូសដោយអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ