អ្នកជំនាញបារម្ភថា ភ្លើងឆេះព្រៃដ៏ធំដូចនៅអូស្ត្រាលី អាចនឹងក្លាយជារឿងធម្មតាទៅអនាគត
ភ្លើងឆេះព្រៃ ជាច្រើនទីតាំង មិនអាចពន្លត់បាន ដូចនៅអូស្ត្រាលីបច្ចុប្បន្ននេះ អាចនឹងក្លាយជា រឿងធម្មតា ដែលកើតឡើងជាប្រចាំ ទៅថ្ងៃអនាគត។ នេះបើតាមការអះអាង របស់អ្នកជំនាញស្រាវជ្រាវ ផ្នែកឧត្តុនិយម និងអាកាសធាតុ។ យោងតាមរបាយការណ៍ស្រាវជ្រាវ ដែលទើបតែបោះផ្សាយ អ្នកជំនាញបានសន្និដ្ឋានថា ការប្រែប្រួលអាកាសធាតុ របស់ផែនដីយើង បានញ៉ាំងឲ្យមានកត្តាអំណោយផលជាច្រើន បង្កឲ្យមានភ្លើងឆេះព្រៃ កាន់តែច្រើន ទៅថ្ងៃអនាគត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
“យើងមិនអាច ទប់ស្កាត់ការប្រែប្រួលអាកាសធាតុ ធ្វើឲ្យវាបញ្ច្រាសមកវិញបាន ក្នុងរយៈពេលមួយដែលយើងចង់បាននោះទេ។ លក្ខខណ្ឌអាកាសធាតុបច្ចុប្បន្ននេះ ក៏នឹងមិនអាច បាត់ទៅវិញដែរ”។ នេះគឺជាការលើកឡើង របស់លោក Richard Betts អ្នកជំនាញផ្នែកឧត្តុនិយម នៅ នាយកដ្ឋានជាតិឧត្តុនិយមអង់គ្លេស។ លោកទើបតែបាន ចូលរួមសរសេរអត្ថបទសិក្សាមួយ ដោយបានស្រង់វិភាគ ទៅលើរបាយការណ៍ស្រាវជ្រាវវិទ្យាសាស្ត្រ ចំនួន៥៧ផ្សេងគ្នា គិតចាប់ពីឆ្នាំ២០១៣មក ទាក់ទិននឹងទំនាក់ទំនង រវាង ភ្លើងឆេះព្រៃ និងការប្រែប្រួលអាកាសធាតុ។
យោងតាមការវិភាគលើរបាយការណ៍ទាំង៥៧នេះ អ្នកជំនាញបានសន្និដ្ឋានថា ការប្រែប្រួលអាកាសធាតុ បានជំរុញឲ្យមានការកើនឡើងកាន់តែញឹកញាប់ និងម្តងៗកាន់តែធ្ងន់ធ្ងរ នូវករណីភ្លើងឆេះព្រៃ។ មានកត្តាជាច្រើន ដែលត្រូវបានជំរុញដោយការប្រែប្រួលអាកាសធាតុ ក្នុងនោះដូចជា អាកាសធាតុក្តៅកាន់តែខ្លាំង សំណើមមានកាន់តែតិចទៅៗ ភ្លៀងកាន់តែខ្សត់ខ្សោយ ព្រមជាមួយនឹងខ្យល់ស្ងួតបក់ខ្លាំង។
អ្នកជំនាញ លើកឡើងថា ករណីភ្លើងឆេះព្រៃកើនឡើងខ្លាំង និងមានទំហំធំៗ ត្រូវបានគេសង្កេតឃើញ ប៉ុន្មានឆ្នាំចុងក្រោយនេះ មិនមែនតែនៅអូស្ត្រាលីទេ គឺមាននៅភាគខាងលិចសហរដ្ឋអាមេរិក នៅកាណាដា នៅតំបន់ព្រៃអាម៉ាហ្សូន នៅភាគខាងត្បូងអឺរ៉ុប និងនៅតំបន់ស្កង់ឌីណាវី ភាគខាងជើងបំផុតរបស់អឺរ៉ុបផងដែរ។ រដូវកាលដែលសីតុណ្ហភាពឡើងក្តៅខ្លាំង និងស្ងួតខ្លាំង ដែលអំណោយផលដល់ការឆេះរាលភ្លើងព្រៃ បានកើនឡើង អូសបន្លាយចំនួន២០% ហើយទំហំភ្លើងព្រៃឆេះ ក៏បានកើនឡើង ប្រមាណ២៥%ដែរ។ នេះបើផ្អែកលើទិន្នន័យ អង្កេតរបស់ក្រុមអ្នកជំនាញ។
លោកសាស្ត្រាចារ្យ Richard Betts បានលើកឡើងថា៖ “សីតុណ្ហភាពនៅអូស្ត្រាលីបច្ចុប្បន្នក្តៅហួតហែងខ្លាំងណាស់។ កម្រិតកំដៅនេះ អាចនឹងក្លាយជាកម្រិតសាមញ្ញធម្មតា ទៅថ្ងៃអនាគត នៅទូទាំងពិភពលោកតែម្តង ដោយសារតែផែនដីយើង ឡើងកំដៅ ប្រមាណជា៣អង្សារសេ”។ បើផ្អែកតាមតួលេខរបស់អង្គការឧត្តុនិយមអន្តរជាតិ សីតុណ្ហភាពមធ្យមរបស់ផែនដី អាចនឹងឡើងប្រមាណចន្លោះពី ៣ ទៅ៥អង្សារសេ ក្នុងរវាងមួយទសវត្សខាងមុខ បើសិនជាគ្មានការខំប្រឹងប្រែង ក្នុងការកាត់បន្ថយ ការបញ្ចេញចោល នូវឧស្ម័នកាបូនិកទេនោះ។
គួរកត់សំគាល់ថា គិតពីខែតុលាមក ភ្លើងបានឆាបឆេះបំផ្លាញព្រៃ ទំហំប្រមាណជាង១១លានហិកតា នៅអូស្ត្រាលី និងបានសម្លាប់មនុស្សអស់២៨នាក់។ រហូតមកទល់ពេលនេះ អាជ្ញាធរ នៅមិនទាន់អាចពន្លត់ភ្លើងទាំងនោះបានទេ។ តែយ៉ាងណា បើតាមការព្យាករណ៍ នៅថ្ងៃអង្គារទី ១៤មករានេះ នឹងមានភ្លៀងធ្លាក់ខ្លាំងក្នុងពេលដ៏ឆាប់នេះ នៅអូស្ត្រាលី ដែលដំណឹងនេះ បានផ្តល់ក្តីសង្ឃឹមខ្លះ ដល់ក្រុមការងារពន្លត់ភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ