ឧបទ្វីបកូរ៉េ៖សហរដ្ឋអាមេរិកបដិសេធលើគ្រប់ឱសានវាទរបស់កូរ៉េខាងជើង
លោក Stephen Biegun ប្រេសិតអាមេរិកទទួលបន្ទុកចរចាសំណុំរឿងនុយក្លេអ៊ែរកូរ៉េខាងជើងបានស្ថិតក្នុងទីក្រុងសេអ៊ូល ទឹកដីកូរ៉េខាងត្បូងតាំងពីថ្ងៃអាទិត្យ ទី១៥ ធ្នូ។ ថ្លែងនៅថ្ងៃចន្ទ ទី១៦ ធ្នូ លោក Biegun បានចាត់ទុកការទាមទាររបស់កូរ៉េខាងជើងថាមានលក្ខណៈប្រឆាំង និងមិនស្វាគមន៍។ នៅក្នុងន័យនេះ លោក Biegun បានបញ្ជាក់ច្បាស់ៗថា អាមេរិកមិនត្រូវការឱសានវាទមួយណាទេ និងថា អាមេរិកមានកម្មវត្ថុមួយច្បាស់លាស់។ គួររម្លឹកថា ក្រុងព្យុងយ៉ាងទុកពេលឲ្យអាមេរិករហូតដល់ថ្ងៃទី៣១ ធ្នូដើម្បីទទួលយកតាមសំណើរបស់ខ្លួន។ បើមិនអ៊ីចឹងទេ ក្រុងព្យុងយ៉ាងនឹងអនុម័តយុទ្ធសាស្រ្តថ្មីស្តីពីបញ្ហានុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:០០
សំណើដែលកូរ៉េខាងជើងបានដាក់ឲ្យអាមេរិក គឺសុំឲ្យមានការលើកទណ្ឌកម្មសេដ្ឋកិច្ចចេញវិញ។ តែអាមេរិកបន្តទាមទារឲ្យកូរ៉េខាងជើងរំសាយនុយក្លេអ៊ែរជាមុនសិន។ លោក Stephen Biegun ប្រេសិតអាមេរិកទទួលបន្ទុកចរចាសំណុំរឿងនុយក្លេអ៊ែរកូរ៉េខាងជើងបានថ្លែងនៅមុខក្រុមអ្នកកាសែតនាថ្ងៃចន្ទ ទី១៦ ធ្នូថា អាមេរិកបានឮតាមការទាមទារចង់បានរបស់កូរ៉េខាងជើង តែលោកមានការសោកស្តាយដែលសេចក្តីថ្លែងការណ៍របស់ក្រុងព្យុងយ៉ាងប្រឆាំងអាមេរិក កូរ៉េខាងត្បូង ជប៉ុន និងប្រទេសអឺរ៉ុបមួយចំនួនមានលក្ខណៈប្រឆាំង អវិជ្ជមាន និងមិនស្វាគមន៍។ នៅក្នុងន័យនេះ លោក Biegun បានបញ្ជាក់ច្បាស់ៗថា អាមេរិកមិនត្រូវការឱសានវាទណាមួយ ហើយអាមេរិកមានកម្មវត្ថុមួយពិតប្រាកដ។
គួររម្លឹកថាថ្មីៗនេះ កូរ៉េខាងជើងបានដាក់ឱសានវាទត្រឹមថ្ងៃទី៣១ ធ្នូដើម្បីឲ្យអាមេរិកសម្រាល ឬដកទណ្ឌកម្មសេដ្ឋកិច្ចចេញពីខ្លួន។ បើពុំនោះសោតទេ ក្រុងព្យុងយ៉ាងនឹងអនុម័តយុទ្ធសាស្រ្តថ្មីស្តីពីបញ្ហានុយក្លេអ៊ែរ តែមិនបានលំអិតអ្វីបន្ថែមទេមកទល់ពេលនេះ។ ដើម្បីដាក់គំនាបបន្ថែម ក្រុងព្យុងយ៉ាងបានធ្វើការសាកល្បងផ្សេងៗ ពិសេសគ្រាប់មីស៊ីលបាលីស្ទិកពីមជ្ឈមណ្ឌលបាញ់បញ្ជូនផ្កាយរណបសូហេ នេះបើតាមព័ត៌មានរបស់ប្រទេសជប៉ុន។ យ៉ាងណាក៏ដោយ លោក Biegun ដែលបានជួបសន្ទនាជាមួយប្រធានាធិបតីកូរ៉េខាងត្បូងលោកមូន ចៃអ៊ីនបានបញ្ជាក់ថា អាមេរិកដឹងយ៉ាងច្បាស់ពីសមត្ថភាពរបស់កូរ៉េខាងជើងក្នុងការបន្តបង្ករឿងនៅថ្ងៃខាងមុខ។
តែលោក Biegun បានចាត់ទុកទង្វើបង្ករឿងរបៀបនេះថាគ្មានប្រយោជន៍សម្រាប់ឈានទៅស្វែងរកសន្តិភាពយូរអង្វែងមួយនៅឧបទ្វីបកូរ៉េ។ ដោយចង់បញ្ជូនសារត្រង់ទៅកាន់មេដឹកនាំកូរ៉េខាងជើងលោកគីម ជុងអ៊ុន លោក Biegun បានថ្លែងយ៉ាងដូច្នេះថា « វាល្មមដល់ពេលសម្រាប់យើងដើម្បីធ្វើការងាររបស់យើង។ យើងគួរបញ្ចប់ភាពប្រទាញប្រទង់គ្នា។ យើងនៅទីនេះ ហើយលោកដឹងត្រូវធ្វើយ៉ាងម៉េចដើម្បីអាចជួបយើងបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ