តុលាការកំពូលបញ្ជាឱ្យឥណ្ឌាគោរពសមភាពស្ត្រី-បុរសនៅក្នុងវិស័យយោធា
ជាសេចក្តីសម្រេច ជាប្រវត្តិសាស្ត្រ ! តុលាការកំពូលឥណ្ឌាទើបចេញបញ្ជា នៅថ្ងៃចន្ទទី ១៧ កុម្ភៈ ឱ្យឥណ្ឌាគោរពសមភាពស្ត្រីនិងបុរស នៅក្នុងវិស័យយោធា។ ថ្វីបើស្ត្រីឥណ្ឌាចាប់មានសិទ្ធិធ្វើទាហាន កាន់អាវុធ បើកយន្តហោះចម្បាំង និងទៅសមរភូមិមុខមែន ប៉ុន្តែរហូតមកទល់ពេលនេះ ទាហានស្រីមិនអាចមានតួនាទីខ្ពស់ និងធ្វើការបានយូរទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ទោះបីជារដ្ឋាភិបាលបានអះអាងថា “ស្ត្រីនិងបុរស មិនអាចមានសមត្ថភាពរាងកាយស្មើគ្នា ឬថាពលទាហាននៅមិនទាន់អាចផ្លាស់ប្តូរគំនិត ព្រមទទួលស្ត្រីជាមេទ័ព” ក៏ដោយ ក៏តុលាការកំពូលឥណ្ឌាមិនខ្វល់ និងបានចេញក្រឹត្យ ដែលមានខ្លឹមសារផ្ទុយពីគំនិតរបស់រដ្ឋាភិបាល។ តុលាការបានសម្រេចនៅថ្ងៃចន្ទទី ១៧កុម្ភៈ ថា ទាហានឥណ្ឌាទាំងពីរភេទ ត្រូវតែមានសិទ្ធិដូចគ្នា មិនថាភេទស្រី ឬភេទប្រុសទេ។
រហូតមកទល់ពេលនេះ ឥណ្ឌាមានស្ត្រីតែប្រមាណ ៤% ធ្វើការក្នុងវិស័យយោធា។ ស្ត្រីអាចចូលបម្រើកងទ័ព អាចធ្វើជាទាហានបានតែក្នុងរយៈពេលកំណត់ ១៤ឆ្នាំយ៉ាងច្រើនបំផុត។ ម្យ៉ាងទៀត ទាហានភេទស្រី អាចឡើងឋានន្តរសក្តិ មានតួនាទីជាមេបញ្ជាការ បានតែក្នុងផ្នែកនីតិប្បញ្ញត្ត និងផ្នែកបំពាក់បំប៉នយោធាតែប៉ុណ្ណោះ។
ការតស៊ូទាមទារសិទ្ធិស្មើ និងដូចបុរស ក្នុងការងារ បានចាប់ផ្តើម តាំងពីឆ្នាំ២០០៦មក។ យោធាស្ត្រីឥណ្ឌា បានប្តឹងតវ៉ាជាបឋម ទៅតុលាការជាន់ខ្ពស់ ញូវដែលី បន្ទាប់មកទៅតុលាការកំពូល ដែលស្ថាប័នតុលាការខ្ពស់ជាងគេបំផុតរបស់ប្រទេស។
នៅក្នុងសេចក្តីសម្រេចជាប្រវត្តិសាស្ត្រ តុលាការកំពូលបានចាត់ទុក ផ្នត់គំនិតមើលស្រាលភេទ (ស្ត្រី) មិនអាចយកមកធ្វើជាកត្តាបែងចែងរើសអើងក្នុងជួរកងទ័ពបានទេ។ ដូច្នេះ ដោយជាក់ស្តែង ស្ត្រីត្រូវអាចកាន់តួនាទី មានប្រាក់បៀវត្សរ៍ ទទួលប្រយោជន៍សង្គម និងប្រាក់ចូលនិវត្តន៍ ដូច ទាហានបុរស។
“ដល់វេលាដែលឥណ្ឌាត្រូវទទួលស្គាល់ការពិតថា មន្ត្រីភេទស្ត្រីក្នុងវិស័យយោធា មិនមែនជាជំនួយការក្នុងស្ថាប័នដែលគ្រប់គ្រងដោយបុរស។ ហើយវត្តមានរបស់ស្ត្រីក្នុងស្ថាប័ន ជាការ អនុគ្រោះរបស់បុរសទេ”។ នេះជាសេចក្តីប្រកាសរបស់តុលាការ ដោយសង្ឃឹមថាសេចក្តីសម្រេចនេះ នឹងចូលរួមចំណែកធ្វើឱ្យមានការផ្លាស់ប្តូរផ្នត់គំនិត នៅឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ