ចិនធានាថា ការប្រឹងប្រែងរបស់ខ្លួនក្នុងការប្រឆាំងមេរោគ Covid-១៩ ទទួលបានលទ្ធផលវិជ្ជមាន
នៅក្នុងប្រទេសចិន មេរោគ Covid-១៩ កំពុងបន្តសម្លាប់ និងចម្លងមនុស្សថ្មីៗជារៀងរាល់ថ្ងៃ។ គិតត្រឹមថ្ងៃព្រហស្បតិ៍ ទី២០ កុម្ភៈ ចំនួនអ្នកស្លាប់សរុបមាន ២ ១១៨នាក់ និងអ្នកឈឺសរុបមានជាង ៧៤ ៥០០នាក់។ តែអ្វីជាការកត់សម្គាល់ ចំនួនអ្នកឆ្លងថ្មីក្នុងថ្ងៃព្រហស្បតិ៍មានតែ ៣៩៤នាក់ប៉ុណ្ណោះ ពោលមានការធ្លាក់ចុះខ្លាំង បើធៀបនឹងថ្ងៃពុធ ទី១៩ កុម្ភៈដែលមានអ្នកឆ្លងថ្មីដល់ទៅ ១ ៦៩៣នាក់។ ព័ត៌មាននេះបានចុះផ្សាយដោយរដ្ឋអំណាចសុខាភិបាលចិន តែមិនបានបញ្ជាក់ពីមូលហេតុដែលបានធ្វើឲ្យអ្នកឆ្លងថ្មីធ្លាក់ចុះទេ។ ទោះជាយ៉ាងនេះក្តី អង្គការសុខភាពពិភពលោកបានសាទរចំពោះការរីកចម្រើនដ៏ធំធេងក្នុងការទប់ស្កាត់ការឆ្លងរាលដាលនៃមេរោគ Covid-១៩។ ចំណែកប្រមុខការទូតចិនលោកវ៉ាង យីបានថ្លែងពីទីក្រុងវៀងចន្ទន៍ ប្រទេសឡាវដោយចាត់ទុកការថយចុះនៃអ្នកចម្លងថ្មីថា ជាសកម្មភាពស្វាហាប់របស់ចិនក្នុងការប្រឆាំងនឹងមេរោគកូរ៉ូណាថ្មី។
ចុះផ្សាយនៅថ្ងៃ៖
ស្តាប់ - ០២:០៥
ការថ្លែងរបស់លោកវ៉ាង យីយ៉ាងដូចនេះបានធ្វើឡើង បន្ទាប់ពីលោកបានជួបប្រជុំជាមួយសមភាគីអាស៊ានទាំង ១០ប្រទេសនៅក្នុងកិច្ចប្រជុំមួយស្តីពីមេរោគកូរ៉ូណាថ្មីរៀបចំក្នុងទីក្រុងវៀងចន្ទន៍ ប្រទេសឡាវ។ តាមប្រមុខការទូតចិន មេរោគ Covid-១៩ បានស្ថិតក្រោមការគ្រប់គ្រង និងព្យាបាលបាន មុននឹងបន្ថែមថា អ្វីដែលរដ្ឋាភិបាលចិនកំពុងធ្វើពេលនេះ មិនមែនដើម្បីការពារតែពលរដ្ឋចិនប៉ុណ្ណោះទេ តែក៏ដើម្បីការពារពលរដ្ឋក្នុងលោកផងដែរ។ ការដែលអាស៊ានបានរៀបចំឲ្យមានកិច្ចប្រជុំស្តីពីមេរោគកូរ៉ូណាថ្មីនេះឡើងមិនមែនជារឿងចៃដន្យទេ។ មិនចៃដន្យព្រោះតំបន់កំពុងរងផលប៉ះពាល់សេដ្ឋកិច្ច និងសុខភាពដែលកើតចេញពីវិបត្តិមេរោគផ្លូវដង្ហើមថ្មីនៅចិនមួយនេះ។ គួររម្លឹកថា អាស៊ានធ្លាប់បានរៀបចំកិច្ចប្រជុំស្រដៀងគ្នានេះកាលពីឆ្នាំ ២០០៣ ក្នុងពេលដែលមានផ្ទុះជំងឺសារសន៍នៅក្នុងប្រទេសចិន៕
ករណីឆ្លងមេរោគ Covid-១៩ បានកើតមាននៅក្នុងប្រទេសអាស៊ានមួយចំនួន ដូចយ៉ាងហ្វីលីពីន សិង្ហបុរី ថៃ ឬមួយវៀតណាម ក្នុងនោះ ហ្វីលីពីន សិង្ហបុរី និងវៀតណាមបានបិទជើងហោះហើរពីចិនដីគោក និងផ្អាកការចូលក្នុងប្រទេសខ្លួនដោយគ្មានទិដ្ឋាការជាមួយនឹងការត្រួតពិនិត្យសុខភាពនៅច្រកចេញ ចូល។ ចំណែកថៃមិនបានចាត់វិធានការរបៀបនេះទេ តែចំនួនអ្នកទេសចរមកពីចិនដីគោកបានធ្លាក់ចុះដល់ទៅ ៩០% ក្នុងខែកុម្ភៈ។ ប្រមុខការទូតហ្វីលីពីនលោក Teodoro Locsin បានថ្លែងអរគុណចិនចំពោះវិធានការផ្ទៃក្នុងមិនធ្លាប់មាន និងយ៉ាងឆាប់រហ័ស។ តែទន្ទឹមគ្នានេះ លោក Teodoro ក៏បានកត់សម្គាល់ពីផលប៉ះពាល់សេដ្ឋកិច្ចធំធេងសម្រាប់សេដ្ឋកិច្ចអាស៊ីអាគ្នេយ៍ដែរ។
តើការវិវឌ្ឍរបស់មេរោគ Covid-១៩ កំពុងចុះខ្សោយឥទ្ធិពល និងឈានទៅរកទីបញ្ចប់ ឬយ៉ាងណា?។ លោកវ៉ាង យីគ្រាន់តែបានឆ្លើយថា បន្ទាប់ពីចិនបានប្រឹងប្រែងយ៉ាងលំបាកលំបិនមក ចិនគ្រប់គ្រងស្ថានការណ៍បាន ហើយស្ថានការណ៍បាន និងកំពុងផ្លាស់ប្តូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ