មហាធៀរ មហាម៉ាត់៖ សភានឹងបោះឆ្នោតជ្រើសរើសនាយករដ្ឋមន្រ្តីថ្មី នៅថ្ងៃចន្ទ
សភាម៉ាឡេស៊ីនឹងបោះឆ្នោតជ្រើសរើសនាយករដ្ឋមន្រ្តីថ្មី នៅថ្ងៃចន្ទ ដើមសប្តាហ៍ ក្រោយ ដើម្បី បិទបញ្ចប់វិបត្តិនយោបាយ ដែលបណ្តាលមកពីការលាលែងពីតំណែង ដ៏គួរឲ្យភ្ញាក់ផ្អើលរបស់លោកនាយករដ្ឋមន្រ្តី មហាធៀរ មហាម៉ាត់។ នេះបើតាមការប្រកាសរបស់លោកមហាធៀរ ខ្លួនឯង នៅបន្ទាប់ពីលោកបានចូលគាល់ព្រះមហាក្សត្រម៉ាឡេស៊ី កាលពីថ្ងៃព្រហស្បតិ៍ម្សិលមិញ។ បើតាម លោកមហាធៀរ ម៉ាឡេស៊ី នឹងរៀបចំការបោះឆ្នោតសាជាថ្មី បើសិន ជាគ្មានបេក្ខជនណាម្នាក់ បានទទួលសំឡេងគាំទ្រ ភាគច្រើន នៅរដ្ឋសភា។
ចុះផ្សាយនៅថ្ងៃ៖
ស្តាប់ - ០២:៥៥
បន្ទាប់ពីជួបប្រជុំជាមួយ សមាជិកសភាទាំង ២២២រូប នៅដើមសប្តាហ៍នេះ ព្រះមហាក្សត្រម៉ាឡេស៊ីបានទទួលជួប លោកមហាធៀរ មហាម៉ាត់ ដែលបានប្រកាសលាលែងពីតំណែងនាយករដ្ឋមន្រ្តីកាលពីថ្ងៃ ចន្ទ។ តាំងពីថ្ងៃចន្ទ ម៉ាឡេស៊ីបានធ្លាក់ចុះក្នុងវិបត្តិនយោបាយ សាជាថ្មី បន្ទាប់ពី ការចុះចេញពីតំណែង ដ៏គួរឲ្យភ្ញាក់ផ្អើល របស់លោកមហាធៀរ ហើយនិងការប៉ុនប៉ងមិនបានសម្រេច ក្នុងការបង្កើតរដ្ឋាភិបាល ដោយគ្មាន គូប្រជែង របស់លោកមហាធៀរ គឺ លោកអាន់វ៉ា អ៊ីប្រាហ៊ីម។
នៅក្រោយចូលគាល់ព្រះមហាក្សត្រ នៅព្រឹកថ្ងៃព្រហស្បតិ៍ម្សិលមិញ លោកមហាធៀរ ដែលពេលនេះកំពុងដឹកនាំរដ្ឋាភិបាលបណ្តោះអាសន្ន បានលើកឡើងថា ព្រះមហាក្សត្រម៉ាឡេស៊ី បានសម្រេចទុកសិទ្ធិឲ្យសភាម៉ាឡេស៊ី ជាអ្នកបោះឆ្នោត សម្រេចជ្រើសរើស នាយករដ្ឋមន្រ្តីថ្មី បន្តពីលោកមហាធៀរ មហាម៉ាត់។
នៅម៉ាឡេស៊ី ព្រះមហាក្សត្រជាអ្នកជ្រើសរើសបេក្ខជននាយករដ្ឋមន្រ្តី ទៅតាមការស្នើរបស់គណបក្ស នយោបាយនានា មុននឹងដាក់ឈ្មោះបេក្ខជន នាយករដ្ឋមន្រ្តី ទៅឲ្យសភាជាអ្នកបោះឆ្នោត គាំទ្រ។ បេក្ខជនដែលបានទទួលសំឡេងគាំទ្រភាគច្រើន ១១២ ក្នុងចំណោមសំឡេងសរុបនៅសភា ចំនួន ២២២ នោះ នឹងអាចក្លាយជានាយករដ្ឋមន្រ្តី។ ប៉ុន្តែ បើតាម លោកមហាធៀរដដែល នៅថ្ងៃ ចន្ទ បើសិន បេក្ខជននាយករដ្ឋមន្រ្តី មិនអាចទទួលបានសំឡេងគាំទ្រ ភាគច្រើន នៅសភា នោះ ការបោះឆ្នោត មុនកាលកំណត់មួយនឹងរៀបចំ សាជាថ្មី នៅម៉ាឡេស៊ី។
គណបក្សបី នៃអតីតរដ្ឋាភិបាលចម្រុះ ដឹកនាំដោយលោកមហាធៀរ មហាម៉ាត់ បានអះអាងថា គេបានដាក់រួចហើយ ឈ្មោះ លោកអាន់វ៉ា អ៊ីប្រាហ៊ីម ជាបេក្ខជននាយករដ្ឋមន្រ្តីថ្មីរបស់ម៉ាឡេស៊ី។ ជាមួយនឹងសំឡេងគាំទ្ររបស់សមាជិកសភា មកពីគណបក្សរបស់លោក ហើយនិងគណបក្សដែលជាសម្ព័ន្ធមិត្ត លោកអាន់វ៉ា អ៊ីប្រាហ៊ីម មានសំឡេងគាំទ្រសរុប ៩២នាក់។ ដើម្បីអាចបានសំឡេងភាគច្រើន ដល់១១២ លោកអ៊ីប្រាហៀម ត្រូវការស្វែងរកប្រមូលសំឡេងពីគណបក្សតូចៗដទៃទៀត នៅសភាម៉ាឡេស៊ី។
ម៉ាឡេស៊ី បានត្រលប់ទៅធ្លាក់ក្នុងវិបត្តិនយោបាយសាជាថ្មី បន្ទាប់ពីលោកមហាធៀរបានប្រកាសលាលែងពីមុខតំណែងនាយករដ្ឋមន្រ្តី ក្នុងខណៈពេលដែលសមាជិកសភាមួយចំនួន របស់គណបក្សកាន់អំណាចចម្រុះ ដកខ្លួន ចង់ត្រលប់ទៅចាប់ដៃ ជាមួយគណបក្សប្រឆាំង ដើម្បីបង្កើតរដ្ឋាភិបាលថ្មី។ តាមអ្នកជំនាញ និន្នាការរបស់ពួកគេទាំងនោះ គឺ ចង់ផាត់លោកអ៊ីប្រាហ៊ីម ចេញពីរដ្ឋាភិបាលថ្មី និងទប់ស្កាត់កុំឲ្យលោកអ៊ីប្រាហ៊ីម អាចស្នងតំណែងជានាយករដ្ឋមន្រ្តីបន្តពីលោកមហាធៀរ។ បន្តាប់ពីឈ្នះឆ្នោត ដ៏ធំធេង កាលពីឆ្នាំ ២០១៨ ដោយមកពីមានការចូលរួបរួមជាមួយគណបក្សប្រឆាំង របស់លោកអាន់វ៉ា អ៊ីប្រាហ៊ីម លោកមហាធៀរ ធ្លាប់បាសន្យា ប្រគល់តំណែងនាយករដ្ឋមន្រ្តី ទៅឲ្យអ៊ីប្រាហ៊ីម នៅ១ ឆ្នាំ ឬ ២ឆ្នាំ ក្រោយការបោះឆ្នោត។ ការសន្យាប្រគល់តំណែង ទៅឲ្យលោកអ៊ីប្រាហ៊ីម ត្រូវធ្វើនៅឆ្នាំ ២០២០ នេះ ប៉ុន្តែ ម៉ាឡេស៊ីបានធ្លាក់ក្នុងវិបត្តិនយោបាយ ដោយសារការប្រកាសចុះចេញពីតំណែងនាយករដ្ឋមន្រ្តី របស់លោកមហាធៀរ មហាម៉ាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ