វិធានការទប់កូវីដ១៩ ៖ ឥណ្ឌាប្រឈមនឹងវិបត្តិខ្ទប់ពលករចំណាកស្រុក
រដ្ឋាភិបាលឥណ្ឌាបានប្រកាសបិទខ្ទប់ពលរដ្ឋទូទាំងប្រទេសនៅតែក្នុងផ្ទះ តាំងពីថ្ងៃពុធទី ២៥មីនា រហូតដល់ថ្ងៃទី១៥មេសា។ ប៉ុន្តែ តើត្រូវអង្គុយស្ងៀមចាំឱ្យដាច់ពោះស្លាប់ នៅនឹងកន្លែង ឬត្រូវប្រថុយដើរត្រលប់ទៅស្រុក ? ប្រជាពលរដ្ឋក្រីក្រខ្លាំង គ្មានជំរើសអ្វីក្រៅពីរំលោភបម្រាមរបស់រដ្ឋាភិបាលទេ។ ពលករឥណ្ឌាជាច្រើនម៉ឺននាក់ កំពុងធ្វើដំណើរទៅត្រលប់ទៅស្រុកកំណើតវិញ ខ្លះដោយថ្មើរជើង ខ្លះដោយជិះកង់រមក... និងជាច្រើនសិបនាក់ទៀតត្រូវអាជ្ញាធរចាប់យកទៅឃុំឃាំង នៅថ្ងៃចន្ទទី ៣០មីនា។
ចុះផ្សាយនៅថ្ងៃ៖
សេចក្តីសម្រេចរបស់រដ្ឋាភិបាល ខ្ទប់ពលរដ្ឋទូទាំងប្រទេសឱ្យក្នុងផ្ទះរយៈពេលបីសប្តាហ៍ បានបង្កបង្កើតឱ្យមានវិបត្តិមនុស្សធម៌យ៉ាងធ្ងន់ធ្ងរ ជាពិសេសសម្រាប់ប្រជាពលរដ្ឋក្រីក្រដែលធ្វើចំណាកស្រុកមកធ្វើការនៅតាមទីក្រុងធំដូចជា ក្រុងញូវដេលី ប៊ុមបេ ...។
គេមិនដឹងថាតើមានពលរដ្ឋឥណ្ឌាធ្វើចំណាកស្រុកមករកការងារធ្វើនៅទីក្រុងប៉ុន្មាននាក់ អាចត្រលប់ទៅស្រុកកំណើតវិញបានទាន់ពេលវេលា និងប៉ុន្មាននាក់ត្រូវជាប់កុនដោយបម្រាមរបស់រដ្ឋាភិបាលទេ។ បើតាមសារព័ត៌មានក្នុងស្រុក មានពលរដ្ឋរាប់ម៉ឺននាក់កំពុងនៅតាមផ្លូវ នៅឡើយ។
អត់ការងារធ្វើ ប្រជាពលរដ្ឋចំណាកស្រុក គ្មានជំរើសអ្វីក្រៅពីត្រូវធ្វើដំណើរត្រលប់ទៅភូមិកំណើតវិញទេ ប៉ុន្តែដោយភាពក្រីក្រ មិនអាច ធ្វើដំណើរ តាមរថយន្តក្រុង រថភ្លើង ត្រលប់ទៅផ្ទះវិញបានទាន់ពេលវេលា ពលករជាច្រើនរយនាក់បានបង្ខំចិត្ត ដឹកកូនដឹកចៅ ដើរ តាមបណ្តោយផ្លូវថ្នល់តាំងពីប៉ុន្មានថ្ងៃមកហើយ ក្នុងរយៈចម្ងាយរាប់រយគីឡូម៉ែត្រ ខ្លះគ្មានទឹកនិងអាហារទទួលទានផង។ មានតែថវិកាបន្តិចបន្តួចហើយ មិនអាចទិញអ្វីបាននៅតាមផ្លូវ និងត្រូវជំនះការហាមឃាត់ទៀត។
ទូរទស្សន៍ប្រចាំតំបន់ភាគខាងជើងប្រទេស (រដ្ឋឧតាប្រាដែស) បានបង្ហាញរូបភាពគួរឱ្យអាសូរក្រៃ ប៉ូលិសបាញ់ថ្នាំសម្លាប់មេរោគលើហ្វូងពលករដែលកំពុងធ្វើដំណើរឆ្លងកាត់ក្រុងដើម្បីទៅស្រុក។ កាលពីថ្ងៃអាទិត្យទី ២៩មីនា នៅរដ្ឋស៊ូរ៉ាត ភាគខាងលិចប្រទេស ក្រោយពីបានណែនាំថាលែងមានមធ្យោបាយធ្វើដំណើរទាំងហ្វូងៗមក ប៉ូលិសឥណ្ឌាបានបាញ់ឧស្ម័នបង្ហូរទឹកភ្នែកបំបែកហ្វូងមនុស្សជាង៥០០នាក់ ដែលប្រមូលផ្តុំគ្នាស្រែកសុំការអនុញ្ញាតពីអាជ្ញាធរត្រលប់ទៅស្រុកកំណើតវិញ ព្រោះអត់ការងារធ្វើ។ ៩៣នាក់ត្រូវបានចាប់ខ្លួន នៅថ្ងៃចន្ទទី ៣០មីនា យកទៅឃុំឃាំង ពីបទរំលោភបម្រាមរដ្ឋាភិបាល។
សម្រាប់អាជ្ញាធរសុខាភិបាល ការដឹកផ្ទេរពលរដ្ឋទាំងហ្វូងៗ ពីទីក្រុងទៅជនបទ គឺជាការនាំមេរោគទៅចម្លងគ្នាកាន់តែលឿន និងអាចធ្វើតំបន់ជនបទរងបន្ទុក និងផលវិបាកយ៉ាងធ្ងន់ធ្ងរ ទាំងក្នុងវិស័យសុខាភិបាល ទាំងក្នុងវិស័យផ្សេងៗទៀត។ ក្នុងវិធានការទប់ស្កាត់ការរាតត្បាតរបស់កូវីដ១៩ រដ្ឋាភិបាលបានទម្លាយថវិកា ២៣ពាន់លានដុល្លារដើម្បីជួយប្រជាពលរដ្ឋក្រីក្រ ក្នុងទម្រង់ជាការផ្ទេរសាច់ប្រាក់ឱ្យ ឬជាជំនួយឧបត្ថម្ភ និងបានស្នើឱ្យអាជ្ញាធរមូលដ្ឋាន ផ្តល់ជំនួយជាស្បៀងអាហារ និងជម្រកដល់ពលករចំណាកស្រុក ដែលត្រូវធ្វើដំណើរត្រលប់ចូលស្រុកវិញ។
រហូតមកទល់ថ្ងៃចន្ទទី ៣០មីនា ឥណ្ឌាមានរាប់ឃើញអ្នកឆ្លងកូរ៉ូណាវីរុស ចំនួន ១០៧១ករណី ក្នុងនោះ ២៩នាក់បានស្លាប់។ ជាអត្រាដ៏ទាបណាស់បើប្រៀបទៅនឹងចំនួនប្រជាពលរដ្ឋសរុបក្នុងប្រទេស និងបើប្រៀបទៅនឹងអ៊ីតាលីឬអាមេរិក។ ប៉ុន្តែ ភ្នាក់ងារសុខាភិបាលខ្លាចក្រែងថាឥណ្ឌាអាចនឹងមានផ្ទុះករណីកូវីដ១៩ខ្លាំងនៅរវាងប៉ុន្មានសប្តាហ៍ខាងមុខ ហួសសមត្ថភាពរបស់ប្រព័ន្ធសុខាភិបាលដែលទន់ខ្សោយស្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ